Umwami wa Pop waherekejwe n’inkuru mbi: Isura ya Michael Jackson umaze imyaka icumi apfuye

Yanditswe na Muvunyi Arsène
Kuya 25 Kamena 2019 saa 12:31
Yasuwe :
0 0

Kuri uyu wa 25 Kamena 2019 haribukwa imyaka icumi ishize Michael Jackson wafatwaga nk’umwami w’injyana ya Pop ashizemo umwuka, agasezera ku Isi yari amazeho imyaka 50.

Kuva ubwo abantu ntabwo bongeye kumureba imbonankubone aririmba mu ijwi ryakundwaga na benshi, no mu mbyino ze zirimo ubuhanga.

Umunsi yitaba Imana Isi yacitse ururondogoro ku bwo kubura uyu mugabo wari umaze imyaka isaga 30 yarayigaruriye, kugeza ubwo ishakiro ry’amakuru rya Google ryahagaze bitewe n’abantu benshi cyane barikoreshaga, bashaka kumenya amakuru y’impano.

Michael Jackson yapfuye ubwo yiteguraga ibitaramo yagombaga gikorera mu Bwongereza. Muri icyo gihe yari afite ikibazo cyo kubura ibitsotsi, ku buryo umuganga we Dr Murray yabanzaga kumuha imiti kugira ngo agoheke.

Mbere y’amasaha make kugira ngo apfe, yari yabuze ibitotsi burundu, asaba uyu muganga wahembwaga ibihumbi $150 ku kwezi, kumuha umuti witwa propofol ubundi uhabwa abantu bagiye kubagwa kugira ngo basinzire.

Isuzuma ryakorewe umurambo wa Michael Jackson ryagaragaje ko iyo miti ari yo yamuhitanye ndetse umuganga we akatirwa igifungo cy’imyaka ine.

Indirimbo zirenga ijana Michal Jackson yakoze zarakunzwe kandi n’ubu ziracyakunzwe, ibintu bimwambika ikamba ry’umwami w’injyana ya Pop.

Benshi bibuka Michael Jackson nk’umuhanzi n’umubyinnyi w’umuhanga n’umuhate we mu guharanira isi nziza abinyujije mu ndirimbo ze zakunzwe nka Heal the World, Will you be there n’izindi.

Nyamara amateka ye yajemo kidobya y’abagabo bamushinja kuba yarabafashe ku ngufu ubwo bari bakiri abana.

Abashinja gufatwa ku ngufu ni Wade Robson ufite imyaka 36 na James Safechuck ufite imya 40. Batanze ubuhamya biciye muri filime mbarankuru yiswe “Leaving The Neverland” yatambukijwe kuri televiziyo ya HBO muri Werurwe uyu mwaka.

N’ubwo mu 2005 yari yagize umwere, ubuhamya bw’aba bagabo bwazamuye amarangamutima ya benshi ndetse bamwe barabyizera.

Umunyamakuru w’icyamamare Oprah Winfrey ni umwe muri benshi bagiye ku ruhande rw’aba bashinja Michael Jackson.

Inzu ndangamurage ya Indianapolis yamanuye bimwe mu bikoresho bya Michael Jackson yamurikaga, mu rwego rwo kwitandukanya na we.

Ikinyamakuru New York Post cyatangaje ko Umu-DJ witwa Coleman wacurangaga indirimbo za Michael Jackson mu bukwe butandukanye yahisemo kuzisiba mu mashini ye kuko yumvaga biteye isoni kumvisha abanti ibihangano by’ufatwa nk’inkozi y’ibibi.

Yahisemo kandi gusubika igitaramo cyagombaga gucurangwamo indirimbo ze muri iyi mpeshyi.

Ku rundi ruhande hari abirinze kwinjira cyane muri iki kibazo, bakomeza gukunda no gucuranga indirimbo za Michael Jackson.

Kuri ubu ziracyacuruzwa ahantu hatandukanye kuri murandasi, radiyo zirazicuranga no mu tubyiniro dutandukanye.

Bavuga ko umurage wa Michael Jackson nk’umuhanzi ukwiye gutandukanywa n’ibikorwa bibi ashinjwa.

Uwitwa DJ Stacy yagize ati “ Sinabyemeza cyangwa ngo mbihakane. Niba ari byo koko birababaje nihanganishije abahohotewe. Ariko ni we muhanzi ufite impano ihebuje w’ibihe byose. Nta wundi uzamera nka we.”

Umuyobozi w’ikigo cya The Rock & Roll Hall of Fame kibika amateka y’ababaye ibyamamare mu ngeri zitandukanye, yavuze ko Michael Jackson akwiye kwibukirwa ‘ku muziki we n’impano ye’ aho kugendera ku byaha ashinjwa.

Umukobwa wa Michael Jackson, Paris Jackson ni umwe mu babajwe cyane n’ibyo umubyeyi we ashinjwa ndetse byatumye ashaka no kwiyahura.

Kugeza ubu abakunzi b’uyu mugabo bacitsemo ibice. Ubwo “Leaving The Neveland” yajyaga hanze muri Werurwe ubushakashatsi bwakoze n’ikigo cya SEMrush , bwagaragaje ko 33% by’abatanze ibitekerezo kuri iyi filime binyuze kuri Twitter bamuvugaga neza, 39% barifashe mu gihe 27% bamuvugaga nabi.

Imibyinire ya Michael Jackson yatumye benshi bamukunda
Wade Robson yavuze ko Michaeal Jackson yatangiye kumufata ku ngufu afite imyaka irindwi
Michael Jackson na James Safechuck umushinja kumusambanya akiri umwana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza