Umuhanzi w’Umunyamerika yapfiriye ku rubyiniro

Yanditswe na Uwiduhaye Theos
Kuya 20 Mutarama 2020 saa 03:30
Yasuwe :
0 0

Umuhanzi David Charles Olney wamamaye mu muziki wa Leta Zunze Ubumwe za Amerika no ku Isi, yapfuye ari ku rubyiniro ari kuririmba.

David Charles Olney yishwe n’indwara y’umutima ubwo yari ari ku rubyiniro muri Florida ku wa Gatandatu tariki 18 Mutarama 2020 nk’uko biri ku rubuga rwe. Yari afite imyaka 71.

David Charles Olney yahagaritse indirimbo bari bagezemo hagati we na Scott Miller wamufashaga ku rubyiniro, aravuga ati ‘Munyihanganire’ ahita yubika umutwe nkuko byatangajwe na Scott Miller bari bari kuririmbana mu iserukiramuco ry’ahitwa Santa Rosa Beach.

Scott yavuze ko uyu musaza atigeze ashyira guitar ye hasi cyangwa se ngo yikubite hasi.

Amy Rigby nawe bari kumwe ku rubyiniro, yavuze uyu musaza yakomeje akicara abantu bakagira ngo ari kuruhuka.

Ati “Yakomeje aricara afite guitar ye, yambaye ingofero nziza n’ikote ryo muri Suède ryiza[…] Bwari ubwa mbere yari agaragaye ameze nk’uri gufata akaruhuko. Twabuze umuntu w’ingirakamaro.”

Olney ni umwe mu bahirimbaniye umuziki muri Amerika. Yakoze album zirenga 20. Album ye ya kabiri iriho indirimbo yise ‘Deeper Well’ yanasubiwemo na Emmylou Harris mu 1995 kuri album ye yise Wrecking Ball.

Abandi basubiyemo indirimbo ze barimo Del McCoury, Slaid Cleaves n’itsinda rya The Wailin’ Jennys. Olney yabanaga n’umugore we n’abana babiri.

Yavutse mu 1948, atangira gukora umuziki kuva mu 1971 kugeza mu 2020 ubwo yashiragamo umwuka ari ku rubyiniro.

Olney yapfuye ubwo yari ku rubyiniro ari kuririmba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .