00:00:00 IGIHE NETWORK KN KINYARWANDA EN ENGLISH FR FRANCAIS

Uganda: Sheebah agiye gutamaza umugabo wamukoze ku gitsina

Yanditswe na Uwiduhaye Theos
Kuya 18 May 2022 saa 05:06
Yasuwe :

Umuhanzikazi Sheebah Karungi yatangaje ko agiye gushyira hanze amazina y’umugabo bivugwa ko yamukoreye ihohoterwa rishingiye ku gitsina agashaka ko kumufata ku ngufu.

Ikinyamakuru Chimpreports cyandikirwa muri Uganda nicyo cyatangaje iyi nkuru. Cyatangaje ko uyu muhanzi ashobora kuvuga umuntu ukomeye wamuhohoteye uyu munsi cyangwa ikindi gihe ariko muri iki cyumweru, nk’uko Polisi ya Uganda yabitangaje.

Yagize iti “Sheebah ashobora kuvuga umuntu ukomeye wamuhohoteye kuri uyu wa Gatatu cyangwa nyuma yaho.”

Uyu muntu bivugwa ko akuze kandi yahoze muri Guverinoma ya Uganda kandi ari mu myanya yo hejuru. Ngo mu bihe byashize yavuzwe mu bintu n’ubundi bijyanye n’ihohoterwa rishingiye ku gitsina yakoze.

Uyu muntu ngo arindwa bikomeye na polisi ya Uganda ndetse n’abasirikare.

Amakuru avuga ko Sheebah yegereye Ishami rya Polisi rishinzwe Ubugenzacyaha, CID; agatangaza byinshi kuri uyu muntu kugira ngo iperereza rikorwe.

Mu cyumweru cyashize nibwo Sheebah yafashe umwanzuro wo kujya ku mbuga nkoranyambaga avuga ko hari umuntu ukomeye wamusanze mu modoka asinziriye akamuhohotera.

Sheebah mu butumwa yashyize kuri Twitter buherekejwe n’amashusho yanditse agira ati “Sinitaye ku byo utekereza iyo uri kumbona ku rubyiniro cyangwa mu mashusho runaka yanjye y’indirimbo bitewe n’uko mba nambaye.”

“Byaba byiza wubashye umubiri wanjye. Ni uwanjye, nawukoresha icyo nshaka ariko wowe ntabwo ubyemerewe. Ushobora kureba ariko ntabwo kunkoraho ubyemerewe.”

Uwo muntu ngo yakorakoye Sheebah kugeza aho yifashishije abarinzi be akamukora mu gitsina ku gahato.

Iyi nkuru ikijya hanze, hari abatunze agatoki umunyamakuru Andrew Mwenda, bavuga ko ariwe wakoreye ibi Sheebah ku wa 23 Mata 2022, ubwo Lt Gen Muhoozi Kainerugaba usanzwe ari Umugaba w’Ingabo za Uganda zirwanira ku butaka, yizihizaga isabukuru y’imyaka 48.

Muhoozi yanditse kuri Twitter agaragaza ko mu itohoza yakoze yasanze Mwenda arengana.

Sheebah nawe ubwo yajyaga kuri polisi kuri uyu wa Kabiri tariki 17 Gicurasi yatangaje ko Mwenda atari we wamuhohoteye.

Umunyamakuru Daniel Lutaaya wa NBS TV aheruka kugaragaza amafoto ya Sheebah, avuga ko aheruka no kuririmba mu isabukuru ya Gilbert Bukenya, wabaye Visi Perezida wa Uganda bityo ari aho abantu bakwiriye gukeka ko bishoboka ko ariho icyaha cyabereye.

Sheebah agiye gushyira hanze umuyobozi ukomeye muri Uganda wamukoze mu gitsina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .