Ubuzima burura bwa Lous and the Yakuza, umunyarwanda ugezweho mu muziki i Burayi

Yanditswe na Uwiduhaye Theos
Kuya 3 Ugushyingo 2020 saa 07:54
Yasuwe :
0 0

Marie Pierra Kakoma[Lous and the Yakuza], Umunyarwandakazi uba i Bruxelles mu Bubiligi ukunzwe mu muziki w’abakoresha Igifaransa, afite amateka akomeye y’ubuzima ndetse akunze kuvuga ko ariyo akomoraho inganzo y’umuziki we.

Mu myaka 17 ishize Lous and the Yakuza yari afite imyaka irindwi y’amavuko, gusa icyo gihe mu cyumweru yandikaga indirimbo zirenga 10. Yandikaga ari iwabo aho ababyeyi be bari batuye mu Bubiligi, akandika amagambo yisuka atazi aho ari kuyavana nk’uko yabibwiye W Magazine.

Avuga ko ikintu yagiye akunda kubwirwa n’ababyeyi be cyamufashije mu buzima ari amagambo bakundaga kumubwira agira ati ‘niba ushaka kuba umudozi w’inkweto, ba umwiza kurusha abandi mu gace utuyemo.’

Yakomeje avuga ko n’ubwo bamubwiraga gutyo ariko bo bumvaga nta mpano yo gukora umuziki afite.

Ati “Ntabwo nari mfite impano. Ababyeyi banjye batekerezaga ko ukora ubuhanzi ari uko ufite impano. Baravugaga bati nta n’ubwo uri umuririmbyi mwiza. Tuzaba tubaye ababyeyi gito nituramuka tugusunikiye mu cyerekezo cy’umuziki.”

Gusa we avuga ko yari afite intego n’ubwo nta muntu wo mu muryango we cyangwa mu nshuti wigeze abibona muri icyo gihe. Yemeza ko n’ubwo wenda bumvaga ko nta mpano afite, we yashakaga gukurikiza amahame y’ababyeyi mu kazi kugira ngo abemeze abereke ko icyo yiyemeje agomba kukigeraho, nk’uko nabo bakunda kubikora bikamubera icyitegererezo.

Imyandikire y’indirimbo ze usanga ayisanisha na filime ziteye ubwoba, aho ibintu biteye ubwoba hari ukuntu bigirwa urwenya. Yavuze ko ari inkuru y’ubuzima yabayemo, aho bumwe bwari bwuzuyemo uburibwe ndetse n’ihungabana, ariko bikaba byarahindutse ibintu yaseka uyu munsi.

Uyu mukobwa ubusanzwe ni umuririmbyi, umwanditsi w’indirimbo, umuraperi akaba n’umurika imideli. Avuka kuri se wo muri Repubulika Iharanira Demokarasi ya Kongo na nyina w’Umunyarwandakazi.

Yavukiye i Lubumbashi muri RDC mu 1996. Icyo gihe ababyeyi be bari bafite izina rikomeye mu kuvura muri icyo gihugu, aho se yari umuhanga mu bijyanye no kwita ku bagore bibarutse mu gihe nyina yari umuhanga mu byo kuvura abana.

Akiri muto yatangiye guhura n’ibizazane aho nyuma yo kuvuka kwe muri RDC hatangiye kuba intambara z’urudaca, ndetse muri icyo gihe nyina w’Umunyarwandakazi agafungwa amezi abiri.

Nyuma yaje gufungurwa bigizweho uruhare na se. Mu 2000 we nyina hamwe n’abandi bavukana bagiye mu Bubiligi. Se yasigaye mu RDC akomeza akazi ke k’ubuganga ari n’umuyobozi mu ishuri ry’ubuganga.

Yabwiye Dazed Magazine ati “Twagiye mu Bubiligi kubera intambara. Muri RDC bafungaga abanyarwanda mu 1998. Mama wanjye na we yafunzwe amezi abiri ariko Papa aramufasha arafungurwa. Rero, yari afite umunsi umwe wo kuhava ni uko twagiye mu Bubiligi. Byari byoroshye nk’Umunye-Congo kujya mu Bubiligi kubera bari barakonije iki gihugu. Yagiyeyo mu 1998 hamwe na murumuna wanjye, twe twaje kumusangayo nyuma y’imyaka ibiri ndi kumwe n’abandi twavukanaga twari twarasigaranye.”

Mu Bubiligi, nyina wa Lous and the Yakuza wari umuhanga mu byo kuvura abana, yisanze ari umukozi ufasha n’ubundi uwari usanzwe afasha muganga w’amenyo. Aba mu kazu gato hamwe n’abana be bane.

Lous and the Yakuza ati “Yaravugaga ati mfite impamyabumenyi none ntabwo nakora ibyo nize. Ibi n’ibiki ndi gukora hano? Yari yarahungabanye ntabwo yabyakiraga.”

Ishusho y’inzozi z’ibyo yumvise byabaye mu Rwanda ntiramuvamo …

Mu 2005 ubwo Lous and the Yakuza yari afite imyaka icyenda umuryango we wafashe umwanzuro wo kumuzana mu Rwanda we na murumuna we. Icyo gihe ngo ababyeyi be bari bamubwiye ko we n’umuvandimwe we ‘bagiye mu biruhuko’.
Ababyeyi be n’abandi bavandimwe be babiri bahise bajya gutura mu Bubiligi aho batuye bya burundu mu 2011, na we akaza kubasangayo.

Uyu mukobwa avuga ko ubuzima ntacyo bwari bumubwiye cyane ko yari akiri umwana, yakinaga n’abandi mu mihanda ndetse akabyuka kare saa kumi n’imwe n’igice akareba filime zo mu Buyapani.

Akomeza avuga ko cyari igihugu kikiri mu bibazo byatewe na Jenoside yabaye mu 1994, ndetse n’ubwo yari umwana hari byinshi yibuka.

Ati “Cyari igihugu kikiva muri Jenoside. Hari hari abantu bakennye ahantu hose, hari abana benshi b’imfubyi. Ntekereza ko umwe mu bantu batatu yabaga nta kaboko cyangwa akaguru, ibintu byanteraga urujijo kuko nari umwana. Umuryango wari iruhande rwanjye wari warahungabanye.”

Yakomeje ati “Munyihanganire mbivuge. Nibuka ko nari mfite imyaka icyenda mbaza umuntu wadufashaga, nti ‘Jenoside ni iki?’ kubera ntari mbifiteho amakuru nashakaga kumenya ibyo aribyo. Undi mu kunsubiza ati abantu bakinaga football bifashishije imitwe y’abana. Byanteye kujya ngira inzozi mbi, buri gihe bikaza mu ntekerezo no mu nzozi zanjye mu myaka 10, nyuma gusa y’iyo nteruro, natekereje ibyo bintu byose. Ryari rihungabana rinini cyane.”

Avuga ko ikintu yishimira ari uko yagiye akura akabona abantu bafite umwete wo gusana u Rwanda, bafatanya kugira ngo byongere kuba byiza.

Yaciriwe inzira mu muziki mu buryo butangaje ….

Ku myaka 15 yatangiye kugerageza kuvugisha ubuyobozi bwa Columbia Records ngo atangire umuziki ariko ntiyoroherwa, mu gihe yashakaga inzu ireberera umuziki we inyungu. Nyuma yaho yaje gushyira umuziki we kuri Soundcloud, umwe mu bayobozi ba Sony mu Bufaransa aza kuzibona, abona ni umwana w’umuhanga kandi ufite itandukaniro.

Ku myaka 18 umuryango we wamwirukanye mu rugo kubera umuziki. Avuga ko inshuti zashidikanyaga ku muziki we ubwo yari akiri umukene, ubu zisigaye ziza kumuvugisha zifite ipfunwe.

Ati “Naciriwe imanza n’inshuti zanjye, ababyeyi ndetse n’abagize uruganda rwa muziki. Ariko, iyo abantu banshyiraga mu gikarito, nageragezaga kugisenya nkavamo.”

Uyu mukobwa aririmba cyane mu Gifaransa ariko avuga ko n’Ikidage n’Igiswayile nabyo abyifashisha mu muziki we. Ngo ndetse hari amagambo amwe akoresha mu ndirimbo ze akura mu rurimi rw’Ikinyarwanda.

Izina rye Lous urisomye uhereye iburyo ubona ijambo ry’icyongereza “Soul” risobanura roho naho Yakuza ni ijambo ryo mu Kiyapani risobanura itsinda ry’abajura.

Producer El Guincho niwe wamukoreye album ye ya mbere yitwa ‘‘Gore” yagiye hanze ku wa 16 Ukwakira 2020. Iyi album ye avuga ko iriho ubutumwa butandukanye burimo ubuvuga ku bakora uburaya, gufatwa ku ngufu,guhera mu cyeragati, kwigunga n’ibindi.

Album nshya ya Lous and The Yakuza yitwa ‘Gore’ iri mu njyana ya Hip Hop. Iriho indirimbo nka ‘Dilemme’ yatumye yamamara cyane ndetse imaze kurebwa na miliyoni zirenga esheshatu kuri YouTube, ‘Bon acteur’, ‘Tout est gore’, ‘Amigo’ na ‘Solo’.

Mu ntangiriro za 2017, uyu mukobwa afatanyije n’inshuti ze batangije band yaririmbaga mu tubari i Bruxelles mu Bubiligi, aho asanzwe aba. Nyuma yaje gusinya amasezerano muri Columbia Records binyuze muri Sony Music yo mu Bufaransa.
‘Dilemme’ ifatwa nk’indirimbo yamufunguriye amarembo ku ruhando mpuzamahanga, yagiye hanze muri Nzeri umwaka ushize. Yakinwe inshuro zirenga miliyoni 10 kuri Spotify. Umuziki wa Lous and The Yakuza wibanda ku njyana zirimo uruhurirane rwa Trap, R&B, na pop.

Uyu mukobwa ahanzwe amaso ku muziki w'i Burayi cyane cyane mu bavuga Igifaransa
Lous and The Yakuza ni umwe mu bahanzi bagezweho ku ruhando mpuzamahanga bakomoka mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .