Stromae mu babereye icyitegererezo Lous and The Yakuza, Umunyarwandakazi ukunzwe mu muziki w’Igifaransa

Yanditswe na Uwiduhaye Theos
Kuya 22 Ukwakira 2020 saa 06:25
Yasuwe :
0 0

Lous and The Yakuza ni umwe mu banyarwandakazi bari kwitwara neza mu muziki, cyane cyane wigaruriye imitima y’abavuga ururimi rw’Igifaransa biganjemo Abanyaburayi.

Uyu mukobwa w’imyaka 24 witwa Marie Pierre Kakoma, avuka kuri se wo muri Repubulika ya Demokarasi ya Congo na nyina w’Umunyandakazi. Yavukiye i Lubumbashi muri RDC mu 1996.

Bitewe n’ibibazo by’intambara byabaye muri icyo gihugu, mu 2000 umuryango we wimukiye mu Bubiligi afite imyaka ine, ariko se asigara muri icyo gihugu.

Mu 2005 bavuye mu Bubiligi bafata icyemezo cyo gutura mu Rwanda mu Mujyi wa Kigali ari naho nyina akomoka, baza kuhava mu 2011 basubira i Burayi. Ubusanzwe ni umuririmbyi, umwanditsi w’indirimbo, umuraperi akaba n’umurika imideli.

Mu gace ka mbere ka filime mbarankuru nto ivuga ku buzima bwe mu muziki, yiswe ‘Lous Plurielle - Lous & El Guincho: la révélation’, aho aba aganira na Producer El Guincho wamukoreye album ye ya mbere yitwa ‘‘Gore” yagiye hanze ku wa 16 Ukwakira 2020, batangaje byinshi.

Hari aho baganira uko bahuye n’uko buri wese yagiye yiyumvamo undi.

Lous and The Yakuza hari aho avuga ko ubwa mbere abona ibikorwa bya Producer El Guincho, byaturutse ku ndirimbo ye yitwa ‘Bombay’, arongera avuga ko ubwa kabiri ari ubwo yabonaga iyitwa ‘Malamente’.

Avuga ko kuri we yabonaga ibintu akora bigoranye kuko yahuzaga injyana zitandukanye zirimo Flamenco, Trip-Hop na Hip-Hop, ashaka kubibyaza Flamenco igezweho.

Producer El Guincho mu kumusubiza ati “Nturuka mu birwa bya Canaries wowe ugaturuka ku maraso y’Umunyarwanda n’Umunye-Congo, ntekereza ko dusangiye ‘imitekerereze y’abimukira’ ariko ibirenze ibyo, ufite umwihariko wo gutekereza no kwirwanaho.”

Lous and The Yakuza mu gusubiza aravuga ati “Nahise numva ko agiye gukora ku muziki wanjye. Ni ibisanzwe nk’iyo numvise ikintu cy’abahanzi, reka tuvuge umuziki wo muri Paraguay, ntabwo mbizi, cyangwa se umuziki wo muri Colombia. Numva ko nzashyikirana nabo binyuze mu kumva umuziki wabo.”

El Guincho avuga ko iyi album ya mbere y’uyu mukobwa ariyo izagaragaza uwo ariwe mu muziki.

Undi mu gusubiza ati “Umwongerezakazi FKA twigs afite umuziki we wihariye, na James Blake wo muri icyo gihugu ni uko, ndetse n’Umunyarwanda Stromae ni uko bimeze, nanjye nashakaga guhanga umuziki wanjye wihariye.”

Album nshya ya Lous and The Yakuza yitwa ‘Gore’ iri mu njyana ya Hip Hop. Iriho indirimbo nka ‘Dilemme’ yatumye yamamara cyane ndetse imaze kurebwa na miliyoni zirenga esheshatu kuri YouTube, ‘Bon acteur’, ‘Tout est gore’, ‘Amigo’ na ‘Solo’.

Mu ntangiriro za 2017, uyu mukobwa afatanyije n’inshuti ze batangije band yaririmbaga mu tubari i Bruxelles mu Bubiligi.

Muri uwo mwaka urangira, yatumiwe gucuranga muri La ChillZone, nyuma yo gusinya amasezerano muri Columbia Records binyuze muri Sony Music yo mu Bufaransa.

‘Dilemme’ ifatwa nk’indirimbo yamufunguriye amarembo ku ruhando mpuzamahanga, yagiye hanze muri Nzeri umwaka ushize. Yakinwe inshuro zirenga miliyoni 10 kuri Spotify. Umuziki wa Lous and The Yakuza wibanda ku njyana zirimo uruhurirane rwa Trap, R&B, na pop.

El Guincho wakoze indirimbo ziri kuri album ya Lous and The Yakuza
FKA Twigs, umwongerezakazi w'umuhanzi watumye Lous and The Yakuza agira imitekerereze yo gukora umuziki ufite itandukaniro
Lous and The Yakuza avuga ko James Blake ari umwe mu bahanzi batumye agira indi mitekerereze mu muziki
Stromae ni umwe mu bahanzi bahaye icyerekezo umuziki wa Lous and The Yakuza, basangiye amaraso y'Ubunyarwanda

Reba zimwe mu ndirimbo za Lous and The Yakuza

Indirimbo z’abahanzi batumye atekereza gukora umuziki wihariye


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .