00:00:00 IGIHE NETWORK KN KINYARWANDA EN ENGLISH FR FRANCAIS

Rurageretse hagati ya Symphony Band na Ariel Wayz wakuwe mu ndirimbo nshya

Yanditswe na Uwiduhaye Theos
Kuya 29 May 2022 saa 07:57
Yasuwe :

Symphony Band yashyize hanze indirimbo nshya yise ‘My day’ yahuriyemo na Bwiza nyuma yo kuba yari irimo Ariel Wayz ariko uyu muhanzi akagorana kugeza aho byarangiye akuwemo.

Iyi ndirimbo y’urukundo igaruka ku bantu bakundana baba baterana imitoma umwe abwira undi ko amufasha akagira umunsi mwiza buri gihe.”

Ariel Wayz akimara kubona indirimbo ya Bwiza Symphony yagiye hanze na we yahise ashyira hanze indi isa nk’ayo yise “Nkomeza” nyuma aza kuyisiba ku rubuga rwa YouTube.

Mbere iyi ndirimbo yari irimo Ariel Wayz wahoze muri Symphony Band ariko akaza kuvamo, Niyontezeho Etienne ucuranga Piano akaba ari na we muyobozi wa Symphony Band, yabwiye IGIHE bashakaga ko n’ubundi uyu mukobwa ari we uririmbamo ariko akaza kubura.

Ati “ Indirimbo twayikoze kera Ariel akiri muri Symphony. Ejo bundi muri Werurwe twashakaga gushyira hanze iyi ndirimbo twari twarayisubiyemo hari ibintu yagombaga gusubiramo tukanafata amashusho bikarangira. Twaramuhamagaye duhana gahunda zigenda zipfa, twamwandikira ntasubize.”

Yakomeje avuga ko bahise bafata umwanzuro wo gushaka undi mukobwa umusimbura. Ngo Bwiza bamuhisemo kuko ariwe mukobwa babonye wahuza n’ibyo bifuzaga ku musimbura wa Ariel muri iyi ndirimbo.

Ati “Ariel ntabwo twamukuyemo ahubwo yarabuze. Impamvu twashakaga ko agaragaramo ni uko tuzi ko ari imwe mu ndirimbo akunda. Bwiza twamuhisemo kuko twabonye yahuza n’indirimbo yacu kandi niko byagenze.”

Eloi Mugabe uri mu bagize itsinda rireberera inyungu Ariel Wayz , yavuze ibintu Symphony ivuga atari ko bimeze.

Ati “Indirimbo ntabwo ari iya Symphony gusa kuko na Ariel yayigizemo uruhare igihe yari akirimo. Turi gutekereza icyo gukora. Ku wa 10 Gicurasi Ariel yari yabandikiye ntibamusubiza. Bashatse gusohora indirimbo mu gihe na we yari afite imishinga yindi. Yarabajije ati ko mfite akanya noneho indirimbo twayishyira hanze? Ntibamusubiza.”

Yavuze ko Ariel atigeze amenyeshwa ko indirimbo bagiye kumukuramo. Ngo kuri bo ntabwo ari ubwa mbere bamukuye mu ndirimbo cyane ko no muri ‘Respect’ bamukuyemo bagashyiramo Nel Ngabo na Igor Mabano, ibintu bafata nk’agasuzuguro.

Jean Claude Uhujimfura ushinzwe kwamamaza ibikorwa bya Kikac Music ari nayo Bwiza abarizwamo , yabwiye IGIHE ko uyu mukobwa bamuhisemo kubera ko ari umwe mu bari gukora cyane muri iki gihe.

Ati “Bwiza niwe mukobwa uri gukora cyane muri iki gihe ntekereza ko ariyo mpamvu bamuhisemo. Baratwegereye batubwira ko bifuza ko dukorana turabyemera, gusa nyuma twamenye ko indirimbo yari irimo undi muhanzi batubwira ko nta kibazo kuko n’ubundi yari iyabo ku buryo Bwiza amusimbuye nta kibazo byateza, turabyemera.”

Bikimara kumenyekana ko iyi ndirimbo igiye kujya hanze, abinyujije ku rukuta rwe rwa Instagram, Ariel Wayz yabaye nk’uwijundika Symphony Band kuba yaramukuyemo.

Yagize ati “Dusubiye mu myaka yashize hari umushinga w’indirimbo nakoranye na Symphony Band, kandi ntababeshye sinawuhomba! Symphony muriteguye tuwurekure?”

Icyo gihe uyu muhanzikazi yari ari kuririmba iyi ndirimbo abiherekesha amagambo yashyize ku mashusho yashyize kuri Instagram.

Reba iyi ndirimbo hano

Indirimbo Bwiza aheruka gushyira hanze

Indirimbo Ariel aheruka gushyira hanze

Bwiza (uri hagati) yasimbuye Ariel Wayz mu ndirimbo ya Symphony
Ariel Wayz yahoze ari umwe mu bagize Symphony Band

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .