Rita Kagaju yashyize hanze amashusho y’indirimbo ivuga ku bakobwa batinya kubenga abasore

Yanditswe na Uwiduhaye Theos
Kuya 29 Nzeri 2019 saa 10:02
Yasuwe :
0 0

Ange Rita Kagaju ufite ubuhanga buhambaye mu kuririmba n’umwihariko wo kuba abasha kubijyanisha no kwicurangira gitari, yashyize hanze amashusho y’indirimbo yise ‘No Offense’ ivuga ku bakobwa batinya kubwira abahungu ‘oya’.

No Offense yagiye hanze mu buryo bw’amashusho yari imaze ukwezi kurenga igiye hanze mu buryo bw’amajwi. Amashusho yayo yakorewe mu Rwanda na Bob Chris Raheem naho amajwi akorwa na Chris Chita.

Irimo ubutumwa bw’umukobwa uba abwira umuhungu wamubaye hafi igihe kinini ariko agatinya kumusaba ko bakundana, amubwira ko bitashoboka ko bajya mu rukundo.

Rita Kagaju yabwiye IGIHE ko iyi ndirimbo nk’izindi zose ze yaje isa nk’aho imutunguye.

Ati “Ntabwo ari inkuru mpamo, navuga ko iyo nanditse indirimbo akenshi mba nabiteguye. Indirimbo nyinshi nandika ziza mu buryo butunguranye gusa zikaza zifite intego cyangwa se ubutumwa runaka. Indirimbo zanjye nyinshi ndumva ko hari icyo zivuze nyuma y’iminota mike nzanditse. Nkatangira kurwana no kumenya n’iki iyi ndirimbo iri kugerageza kumbwira.”

Abajijwe impamvu yahisemo kwandika avuga ubu butumwa bujyanye n’umukobwa ubwiza ukuri umuhungu ko atamwiyumvamo n’ubwo basanzwe ari inshuti, yavuze ko byatewe n’uko mu rukundo akenshi usanga umukobwa ari umunyantege nke ku mu muhungu.

Ati “Akenshi mu bantu benshi bakundana, abakobwa baba bameze nk’abafite ububasha buke ku bahungu, iyi ndirimbo ni ukwerekana uko abakobwa nabo ari abanyembaraga mu rukundo. Ikabwira abakobwa kuba abanyakuri bakabwira abahungu amarangamutima yabo batitaye ku buryo birafatwa.”

Yavuze ko iyi ndirimbo ari ijwi ry’abakobwa batinya kuvugisha ukuri ngo bahakanire abahungu bifuza ko bakundana kubera gutinya igitutu cy’abantu, anavuga ko bidakwiriye kubaho mu rukundo rw’ibinyoma.

Ati “Umukobwa uvuze oya akunze kwitwa amazina n’abantu; bamwe bakavuga ko ari umwirasi, umwibone n’ayandi. Abakobwa bari mu rukundo bumva batishimiye ntabwo bakwiriye kujya ku gitutu cy’abantu batinya ibyo abantu bategereje kubabonaho. Ino ndirimbo ni ijwi ryo kubwira abakobwa ko nabo bafite ububasha bwo kuvugisha ukuri aho kuba mu rukundo rw’ibinyoma.”

Rita Kagaju yari aherutse gusubiramo indirimbo ya Rudeboy wahoze muri P Square yitwa ‘Reason With Me’.

Byatumye yigarurira benshi bakunda umuziki mu bice bitandukanye muri Afurika, barimo abo muri Nigeria iwabo wa Rudeboy, Ghana, Burundi, Kenya n’ahandi ku buryo usanga mu bitekerezo bitangwa ku ndirimbo ze baba biganjemo.

Ange Ritha Kagaju yakoze izindi zirimo ‘A song to him’, ‘If f You Only Knew’, ‘No Offense’ yakoreye amashusho n’izindi. Abarizwa mu nzu ifasha abahanzi ya Ida Records.

Ni umukobwa w’imyaka 18, uvuka mu karere ka Rwamagana mu Ntara y’Iburasirazuba.

Yatangiye kuririmba mu 2015 yiga mu mwaka wa Gatatu w’amashuri yisumbuye yasoje mu 2018 mu ishami ry’Imibare, Ubugenge n’Ubumenyi bw’Isi mu ishuri rya Rwamagana Lutheran School.

Kagaju ni umwe mu bakobwa bato bafite impano ihambaye mu muziki
Rita Kagaju afite ubuganga buhambaye mu gucuranga gitari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza