Ni iki gituma abaraperi benshi muri Amerika bakenyurwa no kwicwa barashwe ?

Yanditswe na Uwiduhaye Theos
Kuya 30 Ukuboza 2020 saa 09:22
Yasuwe :
0 0

Ntabwo ari igitangaza kumva ko umuraperi wo muri Amerika yarashwe bikarangira ashizemo umwuka, ndetse ni ibintu bisanzwe kubera ko benshi bamaze bicwa muri ubu buryo kandi ababarashe abenshi bikarangira batamenyekanye.

Ubu kubona umuraperi w’Umunyamerika wishwe na kanseri cyangwa izindi ndwara biba ari igitangaza ndetse bibaho gake kuko benshi bagiye bapfa mu buryo butunguranye kandi barashwe.

Uhereye mu 1987 Scott La Rock yarishwe , nyuma ye abandi baraperi batandukanye batangiye kwicwa ku buryo mu myaka yo mu 1990 byakomeje kugira umuvuduko ukomeye.

Ibintu byahinduye isura mu 1996 ubwo Tupac wari ugezweho, yarasirwaga urufaya rw’amasasu mu modoka yari arimo mu ijoro ubwo yari yitabiriye umukino w’iteramakofe wahuje Bruce Seldon na Mike Tyson ku wa 7 Nzeri uwo mwaka. Uyu musore yari afite imyaka 25.

Kuwa 9 Werurwe 1997, Christopher Wallace wamamaye nka The Notorious B.I.G. yarasiwe i Los Angeles, arapfa; ibintu bikomeza gufata indi ntera. Kugeza ubu nibura abaraperi basaga 50 bo muri Amerika abamaze kwicwa barashwe mu myaka isaga 20 ishize.

Abaraperi bose bapfa mu buryo bw’amayobera, uwabishe akenshi ntamenyekane

Abaraperi benshi bicwa muri Amerika baba bari mu bihe byiza ndetse bafite igikundiro. Abenshi barasirwa mu modoka cyangwa bari mu ngo zabo abandi bakaraswa bagiye guhaha n’ibindi nk’ibyo.

Inkuru zikurikira impfu z’aba bahanzi usanga zivuga ko ‘hataramenyekana icyateye ubwicanyi, ariko inzego z’umutekano ziri kubikurikirana’ bikarangira, akenshi inzego z’umutekano zipfundikiye dosiye.

Icyihishe inyuma y’impfu za hato na hato z’abaraperi muri Amerika

Mu bushakashatsi bwakozwe mu 2015 na The Conversation, bwagaragaje ko abaraperi barenga 51% bicwa no kuraswa. Muri ubu bushakatsi bwagaragazaga ko 18% kandi by’abaraperi bapfa muri Amerika bicwa n’impanuka, bigatuma izindi ndwara zisanzwe zica aba bahanzi ku kigero cyo hasi; ibintu batandukaniraho n’abandi bahanzi bo muri iki gihugu.

Ubu bushakashatsi bw’impuguke mu by’imitekerereze akaba n’umwarimu muri Kaminuza ya Sydney mu bijyanye na muzika Dianna Theadora Kenny, bwagaragaje ko abaraperi benshi bapfa bishwe.

Uyu mwarimu avuga ko ikintu cya mbere gituma abaraperi bicwa barashwe cyangwa mu bundi buryo, bituruka ku kuba hari aho baba bahurira n’udutsiko dukora ibyaha bikomeye bijyanye n’ibiyobyabwenge n’indi mico y’ububandi.

Yigeze kubwira Washington Post ko ‘ abantu bajya mu muziki ujyanye no kurapa muri Amerika, baba bahora akenshi mu bikorwa bibi bigereranywa n’ibibashora mu ntambara n’ubushyamirane.’

Mu zindi njyana usanga nko muri Metal & punk bo bicwa cyane n’impanuka, Folk & Jazz bakicwa na kanseri mu gihe abakora Blues bo bakunze gupfa bazize indwara zifite aho zihuriye n’umutima.

Dianna Theadora Kenny yatangaje ko abaririmbyi b’indirimbo zihimbaza Imana bo kubera imyemerere yabo badakunze kwicwa n’ibibonetse byose, ndetse bakaba bagira umubare muto w’abahanzi bapfa biyahuye.

2020 nayo yatikiriyemo benshi…

Kimwe n’indi myaka yose, abaraperi bagiye bicwa umusubirizo muri uyu mwaka kandi bose barashwe n’abantu hafi ya bose bagiye baburirwa irengero.

Ku ikubitiro, Bashar Barakah Jackson uzwi nka Pop Smoke wari umaze iminsi ari ku ibere mu muziki muri Leta Zunze Ubumwe za Amerika yitabye Imana nyuma yo kuraswa n’abagizi ba nabi tariki 19 Gashyantare 2020.

Nyuma, polisi yo mu mujyi wa Los Angeles aho uyu muraperi yarasiwe yatangaje ko yarashwe n’agatsiko k’abagizi ba nabi barimo umwe wari wipfutse mu maso wari ufite imbunda. Bamusanze ahitwa Hollywood Hills mu mujyi wa Los Angeles muri Leta ya California aho yari asanzwe atuye.

Nyuma yo kuraswaho uyu muraperi yajyanywe kwa muganga ari naho bemeje inkuru y’urupfu rwe.

Pop Smoke yapfuye imyaka 20 yari umusore mushya uri kuzamura cyane injyana ya Drill igezweho mu rubyiruko muri Amerika no ku Isi yose, yari yarasinye amasezerano na Victor Victor Worldwide na Republic Records nka sosiyete zamufashaga mu bijyanye na muzika.

Yapfuye agezweho mu ndirimbo zitandukanye zirimo “Welcome to the Party”, “Meet the Woo” ndetse na “Dior” na n’ubu iri mu zikunzwe muri uyu mwaka.
Abandi baraperi bapfuye muri uyu mwaka barimo uwitwa Mac P Dawg. Uyu muraperi wakoreraga umuziki muri Los Angeles yarashwe ku wa 6 Mata 2020 ahitwa Korea town hafi ya Los Angeles.

Ku wa 25 Kamena 2020 uwitwa Lawrence Franks, Jr [Huey]wari ufite imyaka 32 nawe yishwe arasiwe mu Mujyi wa St. Louis. Uyu muraperi yarasiwe imbere y’inzu ye iherereye muri Leta ya Missouri, yarashwe n’abantu bari batwaye imodoka. Uyu muraperi yamamaye mu ndirimbo yitwa “Pop, Lock & Drop It” yakunzwe cyane mu 2006.

Ku wa 11 Nyakanga 2020, undi muraperi wo muri Leta Zunze Ubumwe za Amerika, witwaga Lil Marlo, yarasiwe mu Mujyi wa Atlanta muri Leta ya Georgia, ahita apfa.

Lil Marlo w’imyaka 30, Polisi yo muri uwo Mujyi yavuze ko yakiriye telefoni ivuga ko hari impanuka ihabereye, ariko bahageze basanga ahubwo uyu muraperi yarashwe.

Lil Marlo yarashwe mu gihe yari atwaye imodoka. Yasize umwana w’umukobwa n’umuhungu.

Ku wa 4 Kanama 2020 umuraperi FBG Duck ubusaznwe witwaga Carlton D wari ufite imyaka 26, nawe yarishwe. Yarasiwe mu Mujyi wa Chicago aho yari ari guhaha.

Nyuma undi mugenzi we nawe w’imyaka 26 wo muri uwo mujyi wa Chicago witwaga King Von[Dayvon Bennett] ku wa 6 Ugushyingo 2020. Yarashwe nyuma y’ubushyamirane bwabaye hagati y’amatsinda abiri harimo iryamwitiriwe n’indirindi ry’umuraperi witwa Quando Rondo. Umusore witwa Timothy Leeks, yahamijwe kwica uyu muraperi.

Ku wa 12 Ugushyingo umuraperi witwa Melvin Noble [Mo3] wari mu bari kuzamuka neza mu muziki yarasiwe mu Mujyi wa Dallas muri Leta ya Texas, arapfa.
TMZ yatangaje ko uyu musore w’imyaka 28, akimara kuraswa yahise ajyanwa mu bitaro ariko ntibigire icyo bitanga kuko yaje kwitaba Imana bitewe n’ibikomere yagize.

Mo3 yarashwe ubwo yari ari mu modoka agenda, undi muntu uri mu modoka amucaho ageze imbere avamo. Uyu muraperi nawe yasohotse mu modoka ye, undi amurasa amasasu menshi harimo n’ayamufashe mu mutwe inyuma ubwo yari ari kwiruka ahunga.

Abandi barashwe muri uyu mwaka ntibapfe harimo Umuraperikazi Megan Thee Stallion warashwe na mugenzi we Tory Lanez wamurashe inshuro ebyiri mu kirenge akamukomeretsa.

Umuraperi Boosie Badazz na we yarasiwe mu Mujyi wa Dallas ariko ku bw’amahirwe ntiyapfa kuko isasu ryafashe mu kirenge.

2Pac yapfuye ari mu bihe byiza bibabaza benshi bakundaga ibihangano bye
Mo3 yari umwe mu baraperi bari kwitwara neza wishwe muri uyu mwaka
Abaraperi benshi kandi b'igitsinagabo bapfa batarageza imyaka 35
Mu 2015 ubushakashatsi bwakozwe bwerekanye ko abaraperi bo muri Amerika bapfa barashwe ku kigero cyo hejuru
Muri uyu mwaka Pop Smoke yararashwe bimuviramo kwitaba Imana ku myaka 20
Notorious BIG ni umwe mu baraperi bakunzwe muri Amerika mu 1997 yapfuye mu buryo butunguranye arashwe
Umuraperi Lil Marlo yishwe arashwe muri uyu mwaka
Umuraperi Megan Thee Stallion yarashwe na mugenzi we Tory Lanez uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .