Mubyara wa Mani Martin, Humura yaririmbye inkuru mpamo y’umukobwa wabuze umubwira ko amukunda

Yanditswe na Uwiduhaye Theos
Kuya 26 Ukuboza 2020 saa 11:42
Yasuwe :
0 0

Mubyara wa Mani Martin witwa Humura Deborah yashyize hanze indirimbo ivuga ku mukobwa uhora agatima karehareha ategereje kubona umusore bakundana.

Indirimbo y’uyu mukobwa yitwa ‘Nyiyereka’ yagiye hanze kuri uyu wa Gatatu tariki 23 Ukuboza 2020.

Yabwiye IGIHE ko ari indirimbo yanditse abikomoye ku mukobwa mugenzi we, uhora yibaza igituma atabona umuhungu bakundana kandi abona ntacyo abura yaba mu bwiza n’ibindi byatuma akundwa.

Ati “N’inkuru yabaye kuri mugenzi wanjye bitewe n’agahinda yahoraga abivugana numvishe bikwiye ko nabibyaza umusaruro nkakoramo indirimbo. Yahoranaga agahinda kuko atarigera abona umubwira ko amukunda imyaka yose amaze ku isi.”

Muri iyi ndirimbo hari aho aririmba ati “Oya singiye kwifata ngo mpimbe imitoma kandi nzi neza ko ntawe nyiririmbira. Ndarambiwe, guhora nitwa uwabuze umukunzi. Nakuze numva bavuga ngo buri nkweto igira iyayo, mbese iyanjye irihe? Nakobotse amavi nsenga, nsengera uwanjye ngo niba ataravuka nabyo mbimenye. Niba uhari nyiyereka.”

Humura avuga ko nyuma y’iyi ndirimbo agiye gukurikizaho ibindi bihangano ku buryo 2021 abakunzi b’umuziki we bazaryoherwa.

Uyu mukobwa yavukiye mu Mujyi wa Kigali ku Kimisagara. Ni umuririmbyi akaba umwanditsi ndetse agacuranga na Guitar Acoustic. Ni umwana wa gatandatu mu muryango w’abana umunani. Amashuri yisumbuye yayize muri Apace.

Yavutse ku babyeyi bakunda muzika, baririmba banacuranga muri korali mu rusengero bituma akunda umuziki mu buryo bukomeye ndetse yifuza kuwukora nk’umwuga.

Afite indirimbo zirimo iyitwa ‘Kibe’ yari yo ya mbere muri uyu mwaka wa 2020 ariko afite n’indi yari yarakoze mbere yise ‘Umunyenga’ ndetse na ‘Amasoni’.

Humura ni mubyara wa Mani Martin, ni we umufasha mu buzima bwa muzika mu nzu ifasha abahanzi uyu musore afite yitwa Mani Martin Empire [MM Empire].

Deborah ni umwe mu bahanzikazi bafite impano ihambaye bari kuzamuka
Humura mu ndirimbo ye nshya avuga ku mukobwa waburaniwe mu rukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .