Makanyaga yakumbuje igisope abakurikiye igitaramo cya Iwacu Muzika Festival(Amafoto)

Yanditswe na Uwiduhaye Theos
Kuya 6 Nzeri 2020 saa 09:56
Yasuwe :
0 0

Buri wa Gatandatatu w’icyumweru bimaze kuba nk’ihame ko abantu bakurikira igitaramo cya Iwacu Muzika Festival, gica ku mbuga nkoranyambaga ndetse no kuri Televiziyo y’u Rwanda.

Buri wese ukunda umuziki aba afite amatsiko yo kwirebera uko umuhanzi watangajwe ko azataramira abantu, agiye kwitwara ndetse no kumushimisha.

Ni ibitaramo binyura benshi ndetse bikabamara irungu muri iri bihe benshi basabwa kuba bageze mu rugo saa moya z’umugoroba, ibintu byatewe n’icyorezo cya Coronavirus; kimaze igihe cyugarije Isi yose.

Ubu hari hatahiwe umuhanzi Makanyaga Abdul wakanyujijeho mu muziki w’u Rwanda, ndetse na n’ubu ugifite igikundiro mu bakiri bato ndetse n’abakuru kubera icyanga cy’ibihangano bye n’amagambo afasha benshi biganjemo abari mu rukundo.

Makanyanga yasusurukije abakurikiye iki gitaramo, mu ndirimbo ze zo hambere ku buryo hari abahise bakumbura igisope, indirimbo zikunze gucurangwa zo hambere zigacurangirwa mu mahoteli cyangwa utubari imbonankubone.

Mbere ya Makanyaga abandi bahanzi banyuze muri iki gitaramo barimo umuraperi Tuyishime Joshua wamamaye nka Jay Polly, Bruce Melodie, Mani Martin, Yvan Buravan, Queen Cha, Riderman, Igor Mabano, Butera Knowless, Social Mula n’abandi.

Makanyaga mbere yo kujya ku rubyiniro kuri uyu wa Gatandatu, yabanjirijwe ku rubyiniro n’umuririmbyi Yves Bertin ndetse na Louise Kanyange ushushanya; aba bose ni abanyempano banyuze muri ArtRwanda – Ubuhanzi.

Makanyaga yaririmbye ibihangano bitandukanye byakanyujijeho nka ‘Gakundwe’, ‘Burya bagenzi urukundo n’indwara’, ‘Mukamurenzi’, ‘Nkwemereye urukundo’, ‘Urukundo’, ‘Nshatse Inshuti’ n’izindi nyinshi zanyuze abari bakurikiye iki gitaramo.

Yagezemo hagati aganiriza abantu ku ndangagaciro yo kwihangana, ati “Bavandimwe nshuti babyeyi mudukurikiye ndagira ngo tuganire ku ndangagaciro yo kwihangana. Ni ukutarambirwa, kudacika intege, kudatezuka ku mugambi wihaye no kutadohoka ngo wiyibagirwe nawe ubwawe.”

Muri iki gitaramo yanikije cyane ku ndangagaciro y’ubumanzi abwira abantu ko, kurangwa nabwo ari ukuba umuntu ari umunyakuri, ku gihugu cyawe ndetse ukaba waharanira ishema ryacyo ukoresheje ukuri.

Yanaririmbye indirimbo ivuga kuri Coronavirus, abwira abantu ko bakwiriye kwigengesera bakirinda iki cyorezo cyugarije isi yose muri iki gihe. Bitandukanye n’abandi bahanzi batambutse bagiye bafashwa na Symphony Band, Makanyaga we yafashijwe n’itsinda rye.

Iki gitaramo kirangiye, byatangajwe ko ku wa gatandatu tariki 12 Nzeri 2020; Charly na Nina aribo bazasururutsa abakunzi b’umuziki.

Louise Kanyange ushushanya nawe ari mu banyempano bigaragaje muri iki gitaramo
Makanyaga we yafashijwe kuririmba n'itsinda risanzwe rimufasha ku rubyiniro
Makanyaga yaririmbye ibihangano bye byakunzwe cyane
Makanyaga yanyuze benshi mu ndirimbo ze zakunzwe
Umunyamakuru Luckman Nzeyimana ni we wayoboye iki gitaramo
Umunyampano Yves Bertin yigaragaje mbere y'uko Makanyaga ajya ku rubyiniro
Umunyampano Yves Bertin yigaragaje mbere y'uko Makanyaga ajya ku rubyiniro
Makanyaga Abdul ni umwe mu bahanzi nyarwanda bafite ibigwi mu muziki
Louise Kanyange ni umunyempano washushanyije abantu babyirebera imbonankubone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .