Lucky Fire, Umupfumu n’umunyadushya waririmbye izitwa Chris Brown na Diamond Platnumz

Yanditswe na Uwiduhaye Theos
Kuya 22 Ukwakira 2018 saa 01:26
Yasuwe :
0 0

Abakoresha imbuga nkoranyambaga bakunda gutembagazwa n’indirimbo za Dusabimana Emmanuel, witaziriye Lucky Fire.

Ntiwajya kuri Facebook, WhatsApp, Instagram n’izindi mbuga zikoreshwa cyane mu Rwanda, ngo ubure kubona abantu benshi bashyize ibihangano bye ku nkuta zabo, ubona batangaye!

Iyo muganira ntahisha kuvuga ko ari Umwami wa Pop’, ndetse ko ubu nta ntego asigaranye kuko izo yihaye mu buzima bwe yazigezeho.

Yabwiye IGIHE ati “Nifuzaga kuba umwami wa Pop none byarabaye nabigezeho, ubu ngera ahantu bagashaka kunyifotorezaho.”

Uyu mugabo w’imyaka 32 atuye mu karere ka Gasabo mu murenge wa Jabana. Afite umugore bamaranye imyaka itanu, bamaze kubyarana abana batatu.

Avuga ko izina Lucky Fire yarikomoye ku muhanuzi w’umuriro wo muri Bibiliya, Eliya.

Abakunda kureba ibihangano bya Dusabimana, bamwe babifata nk’urwenya! Aririmba yitakuma bigasetsa benshi kubera ukuntu abijyanisha no kwikanira ijwi.

Imyambarire ye nayo ni urwandiko ndetse usanga amashusho y’ibihangano bye adafite umucyo nk’uw’iby’abandi bahanzi.

Benshi bamufata nk’umuntu ukora umuziki w’urwenya ariko ahamya ko indirimbo ze zirimo ibice bibiri.

Ati “Ni ukuvuga ngo nk’iyo nkoze indirimbo, hari iziba zisekeje hari n’izindi zidasekeje nziza zisanzwe. Nk’indirimbo naririmbiye amakipe n’izindi zo hanze ubona ko ziba zimeze neza. N’izo nahuriyemo n’abaraperi nka Bulldogg ubona ko ari indirimbo z’ikosora.”

Indirimbo abantu bafata nk’iz’urwenya, ngo ni uko aba yongereyemo ibirungo byo kuziryoshya.

Ati “Urabona uburyo Michael Jackson yaririmbagamo, wumvaga aririmbye utuntu dutandukanye n’utwabandi. Ukumva aravuze ngo’awuu’, akongera ati ‘dangerous’, ‘Just beat it’…”

“Urumva ko hari utuntu yashyiragamo twatumaga bakunda indirimbo ze. Nanjye utuntu nk’utwo nkunda kudushyira mu ndirimbo za pop, uzumvishe akumva arasetse.”

Afite indirimbo zirenga magana atanu zirimo 5 love, Bill Jean, First Miss, Amavubi, Real Madrid, APR FC , Super Star yahuriyemo na Bulldog n’izindi. Azikorerwa n’umwe mu bakinnyi bo mu ikipe ayobora ya AS Kabuye, y’abagabo.

AS Kabuye ni ikipe yashinzwe n’abaturage bo mu Murenge wa Jabana, ikagira amakipe y’abahungu n’abakobwa, ariko iy’abakobwa yo irakomeye cyane.

Ni yo yegukanye igikombe cya shampiyona y’icyiciro cya kabiri mu bagore mu 2017/18, isoza umwaka w’imikino idatsinzwe na rimwe kuko yatsinze imikino icumi inganya imikino itatu, izamuka mu cyiciro cya mbere n’amanota 33.

Dusabimana kandi ni umuvuzi gakondo wabihuguriwe, ukoresha ibimera. Nta bundi bumenyi buhambaye yigeze ashishikarira kuvoma mu ishuri keretse ubwa bibiliya, kuko se yari yaramusabye kuba umuvuzi.

Avuga ko akiri umwana yakuze akunda Michael Jackson bikamuviramo kwisanga akora injyana ya Pop. N’iyo agerageje kurimba, ashaka kumwigana.

Ati “Nkiri umwana nifuzaga kuba nka Michael Jackson ariko Imana ishimwe kuba narabigezeho. Impamvu ndi umwami wa pop hari indirimbo nyinshi cyane nakoze muri iyi njyana zagiye zikundwa cyane. Urumva Jackson niwe wari umwami, ninjye wamusimbuye.”

Avuga ko abahanzi bagiye bakorana nawe bakomeye mu Rwanda barimo Bulldogg, Jay Polly, Fireman, P-Fla n’abandi, abanza akabiyegereza bakamwiyumvamo ubundi akabona kubasaba ko bakorana indirimbo, batamuciye ibya mirenge.

Ngo The Ben na Meddy ni abafana be, ndetse anafite gahunda yo gukorana nabo indirimbo.

Ati “Meddy we yigeze gushyira kuri Instagram ye indirimbo yanjye, mba mbona umunsi umwe nzamwegera kandi nizeye ko atazangora.”

Afite indirimbo ziri mu mazina y’abandi bantu batandukanye nk’iyo yahimbiye Sheebah Karungi, Chris Brown, Cardi B, Diamond Platnumz n’abandi.

Ngo iyo yiyumvishemo umuntu yaba umuhanzi, umunyamakuru cyangwa undi, ahita amukorera indirimbo.

Zimwe mu ndirimbo za Dusabimana Emmanuel

Dusabimana Emmanuel avuga ko intego ze mu buhanzi yazigezeho
Mu myambarire ya Lucky Fire, hari aho ashaka kwigana Michael Jackson
Dusabimana Emmanuel Lucky Fire avuga ko ubu ari umwami wa Pop ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza