Uyu muhanzi agiye kumara imyaka 21 kuva yatangira gutaramira mu Rwanda, ndetse ni nabyo byatumye arwiyumvamo nka kimwe mu bihugu afitemo abakunzi benshi ndetse amaze gukoramo ibitaramo bitabarika. Igitaramo yakoze cyiswe “Soirée Dansante”.

Uyu muhanzi yabanjirijwe ku rubyiniro na Shauku Band, itsinda ry’abasore biganjemo abize umuziki mu Ishuri ry’Umuziki ry’u Rwanda.

Iri tsinda ryinjiye ku rubyiniro rirangajwe imbere na Uwikunda Sammy Yvon, rifite abacuranzi ndetse n’abandi baririmbyi bagiye bamufasha ku rubyiniro.

Binjiye ku rubyiniro Saa Mbili zirengaho iminota z’umugoroba, aho baririmbye indirimbo zitandukanye zirimo “Storm is over” ya R. Kelly, “Kuliko Jana” ya Sauti Sol, “Wanyeretse Urukundo” ya Makanyaga, “Nyirabisabo” n’izindi zamamaye mu myaka yashize.

Kidum yinjiye ku rubyiniro ahagana Saa yine z’ijoro. Uyu muhanzi yinjiriye mu ndirimbo yiswe “Vimba Vimba” yakoranye na 3 Hills, “Hakizimana”, “Ubushikiranganji”, “Telenovela” , “Haturudi Nyuma” yahuriyemo na Juliana Kanyomozi, “Intimba y’urukundo” na “Amosozi y’urukundo”.

Uyu mugabo w’imyaka 49 mu miririmbire ye yavangagamo no kubyina, ku buryo usanzwe utamuzi wagira ngo ni umusore ukibyiruka kubera imbaraga nyinshi yagaragaje.

Kidum yaririmbye yitsa ku mahoro n’ubumwe

Yageze hagati aririmba indirimbo yise “Yaramenje”. Igaragaza ko abantu bakwiriye kubana mu mahoro kandi badakwiriye kubaho bashondana cyangwa se bafitanye amashyari.

Ni indirimbo yaririmbye yambaye ibendera ry’igihugu akomokamo cy’u Burundi n’ubwo amaze igihe kinini aba muri Kenya ariko yerekana ko iki gihugu cye akizirikana umunsi ku wundi.

Irangiye yagize ati “Ndabizi ko Abanyarwanda n’Abarundi turi bamwe.”

Kidum mu miririmbire ye yagaruka cyane ku mahoro. Hari aho yaririmbye indirimbo ze zirimo iyo yise “Shamba” nayo iri muri uyu mujyo.

Jules Sentore yatunguranye!

Umuririmbyi Jules Sentore uzwi mu njyana gakondo ni umwe mu bahanzi baririmbye mu gitaramo cya Kidum mu buryo butunguranye.

Uyu muhanzi yahamagawe na Kidum ubwo yari ari kuririmba, amusanga ku rubyiniro bararirimbana.

Ubwo basozaga, Jules Sentore yahise avuga ko ariwe yigiyeho kuririmba. Ati “Nakuze ntazi ko nzaba umuhanzi, bwa mbere numva radiyo numvise Kidum. Ni we wanyigishije kuririmba. Ndamwemera cyane.”

Sentore yahise aririmba indirimbo y’uyu muhanzi yitwa “Kumushaha”, ava ku rubyiniro.

Kidum yaririmbye isaha irenga indirimbo zitandukanye zakunzwe mu myaka yo ha mbere. Umurishyo wa nyuma muri iki gitaramo wakomwe Saa Tanu na 35. Igitaramo kirangiye byatangajwe ko agiye kujya ataramira abakunzi be mu Rwanda buri kwezi.

Ibyishimo byari byinshi ku maso

Abakozi b'uruganda rwa Skol batangaga Skol Lager ku bwinshi n'ibindi binyobwa

Abantu bo mu ngeri zose bari bitabiriye iki gitaramo

Umuyobozi Mukuru ushinzwe Iterambere ry’Umuco muri Minisiteri y’Urubyiruko n’Umuco, Aimable Twahirwa (wa kabiri uturutse iburyo) ni umwe mu bari bitabiriye

Akanyamuneza kari kose ku bitabiriye iki gitaramo

Bamwe bafashe Selfie baririmbana na Kidum

DJ Pius na Ange wo mu itsinda rya Ange na Pamela bari bizihiwe muri iki gitaramo

Wari umwanya wo gusabana ku nshuti n'abavandimwe

Iki gitaramo cyari cyitabiriwe ku bwinshi

Nubwo kitamamajwe cyane, ntibyakibujije kwitabirwa

Iki gitaramo yakoze cyiswe 'Soirée Dansante'

Indirimbo za Kidum zikora ku mutima benshi

Kate Gustave ni we wari MC muri iki gitaramo

Kidum agiye kujya ataramira mu Rwanda buri kwezi

Kidum ni umwe mu bahanzi bamaze kwigwizaho igikundiro mu bavuga Ikinyarwanda n'Ikirundi

Kidum akundwa n'abantu b'ingeri zitandukanye

Kidum yaririmbye akoresha imbaraga nyinshi

Kidum yaririmbye yitsa ku bumwe ubwo yari afashe ibendera ry'u Burundi

Kidum yari akumbuye urubyiniro rwo mu Rwanda

Amafoto: Rusa Willy Prince