Iyo ntaba umuhanzi nta kindi nari gukora: Ubuzima bwa Ish Kevin ugezweho muri Trap Music

Yanditswe na Uwiduhaye Theos
Kuya 18 Ukuboza 2020 saa 03:26
Yasuwe :
0 0

Muri iki gihe mu rubyiruko Trap Music na Drill Music ni zimwe mu njyana zigezweho ndetse abahanzi benshi bari kuzikora bagahirwa, kubera ko arizo zigezweho cyane ku Isi yose.

Mu Rwanda umwe mu bahanzi bakora izi njyana ugezweho ni Ishimwe Semana Kevin uzwi nka Ish Kevin. Uretse Trap na Drill Music, avuga ko n’izindi njyana azikora.

Ish Kevin yahaye imiririmbire ye inyito ya ‘Trappish Music’. Akundwa na benshi kubera uko ahuza kuririmba kwe n’amagambo aryoheye amatwi kandi arimo kuzimiza by’ubu benshi bita ‘slang’.

Ubusanzwe ni umusore w’imyaka 23, wavukiye i Nyamirambo Kuryanyuma. Yize amateka, Ubumenyi bw’isi ndetse n’ubukungu mu mashuri yisumbuye.

Yabwiye IGIHE ko yatangiye gutekereza gukora Trap Music kuko ariyo iri ku isoko.

Ati “Gukora Trap Music, icya mbere niyo njyana yari iri ku isoko mu gihe nari ntangiye gukora. Nza gukora umuziki nasanze hari ibigezweho bitari za Hip Hop za Old school bituma n’amagambo dukoresha ahinduka. Nshaka ya magambo agezweho, kwa kuzimiza kugezweho mu rubyiruko, ya magambo avugwa n’abato.”

Yavuze ko umuziki yakuze awumva ndetse awukunda byimazeyo , yumva indirimbo z’abahanzi batandukanye bakoraga Hip Hop mu Rwanda no hanze. Mu 2017 yafashe icyemezo cyo kujya muri studio, akora indirimbo yitwa ‘Rob the bank’ yahuriyemo na White Monkey, iba ari nayo imucira inzira mu muziki.

Iyi ndirimbo avuga ko bayihimbye bari mu bihe bikomeye cyane, ati “Twari mu bihe bikomeye cyane ha handi umuntu avuga ati dukore cyane dushaka amafaranga, ni biba ngombwa tunatobore banki.”

Yavuze ko gukora Hip Hop hari aho bihuriye n’ubuzima bwe bwite, akavuga ko nko mu ndirimbo yitwa ‘Macuri’ avugamo ubuzima bwe ariko akazimiza.

Ati “Hari abantu babasha kuyumva bitewe no kuzimiza kurimo, ko muri icyi cyiciro cy’ubuzima. Hari abantu benshi bagiye babimbaza biganjemo abapolisi n’abasirikare. Icyo nashatse kuvuga ni ukuzimiza ko ku ikosi ya gisikare. ”

Yisobanura nk’uwavukiye umuziki, ati “Mbona naravukiye umuziki. Iyo ntaba umuhanzi nta kindi nari gukora. Ikindi cyari guturuka ku bwo kuba ntari umuhanzi.”

Uyu muhanzi ari gutegura album ye ya mbere ishobora kujya hanze mu mwaka utaha wa 2021. Ish Kevin ubu afashwa mu muziki we na Kemilson Entertainment.

Uyu muhanzi ari mu bahatanira igihembo cya miliyoni 50 Frw muri The Next Popular Star, kizatangwa mu mpera z’uyu mwaka. Ubu yageze muri batandatu bari mu cyiciro cya nyuma.

Kumuha amahirwe ni ukwandika ubutumwa bugufi (SMS) nyuma yo kwandika ijambo TNP ugasiga akanya ugakurikizaho nimero ye (19) ukohereza kuri 1510, cyangwa ukamutora kuri IGIHE unyuze hano.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .