Imvura igwa ni isubira! Agashami Dudu yasohoye indirimbo nshya yise “Rutaneshwa wanjye”

Yanditswe na IGIHE
Kuya 1 Nzeri 2020 saa 09:33
Yasuwe :
0 0

Baca umugani mu Kinyarwanda bati “Imvura igwa idasubira ikitwa cyumya!” Umuhanzikazi mushya mu njyana gakondo Agashami Dudu yanze kuba ak’iyo mvura yiyemeza kugeza ku bakunzi be ibihangano binogeye amatwi kandi bibanyura.

Nyuma y’indirimbo “Ni njye nawe Mama” isingiza umubyeyi w’umugore n’agaciro afite mu muryango, Agashami Dudu yasohoye inshya yise “Rutaneshwa wanjye.”

Umuhanzikazi Agashami Dudu ukoresha izina ry’Inyange idaharanira kwera nk’igisingizo yahawe n’umugabo we ubwo yamubengukaga bagashingana urugo, yasohoye indirimbo ye y’ubuheta yise “Rutaneshwa wanjye’’.

Ni indirimbo yahangiye umugabo we mu rwego rwo kumushimira ko yamubengutse akamugira umugore babyaranye impanga kabiri.

Mu butumwa buyirimo agusha ku gushimira umugabo we uburyo bakundanye mu rukundo ruzira kwingingwa kugeza ubwo bashakanye bakanabyarana.

Agashami Dudu yabwiye IGIHE ko inkomoko y’iyo ndirimbo iva ku yo yahanze mbere yise “Ni njye nawe mama” akaza kuyiririmbira umubyeyi we mu rwego rwo kuyimutura nk’uwamwibarutse akamukuza akaba amukesha kubaho no kwibaruka akamubyarira abuzukuru.

Yaje kumubwiriza guhanga indirimbo isingiza umugabo mu rwego rwo kugaragaza ko yashimye urushako.

Yagize ati “Mama akunda umukwe we cyane, byatumye indirimbo namuhangiye yifuza kuyimutura ariko asanga nayihangiye gusingiza umubyeyi w’umugore by’umwihariko we wanyibarutse. Niko kunsaba ko noneho nahanga ishimagiza Umusizi Nsanzabera wambengutse akangira umugore ukundwa, niko kuyiterura nyiha igisingizo cy’ibigwi bye, aho navuze ko ari Rutaneshwa wanjye.”

Yavuze ko Ukurusha umugabo, aba akurusha n’igihugu ndetse ko abagabo bakwiye gushimwa.

Ati “Umugabo wese aho ava akagera yagakwiye gushimirwa ibitekerezo yagize byo gushaka umugore nk’umutima w’urugo uzabyarira u Rwanda akagura imiryango.’’

Agashami yifuriza abagore kugira abagabo nk’inkingi ya mwamba, kizigenza mu kubaka u Rwanda, rudahunga urugamba ruhinanye, bakaba n’ingenzi mu buzima bw’imiryango n’igihugu.

Ati “Nahisemo kuririmba ku bigwi n’ibyiza by’umugabo wanjye mu rwego rwo gukabura ibitekerezo bya benshi kugira ngo bajye bashimira abagabo babo. Uzi kubana n’umugabo imyaka 10, 15, 20… ariko ukaba utarashaka ijambo ry’intoranywa ryo kumubwira!!!’’

Indirimbo ‘‘Rutaneshwa wanjye” yayihanze ku buryo buri mugore yayiririmbira umugabo we amushimira ibyiza byose bagezeho mu myaka babanye.

Agashami Dudu ni umubyeyi w’abana bane barimo abakobwa babiri n’abahungu babiri, dore ko uko abyara agenda abyara impanga umukobwa n’umuhungu.

Yatangiye kuririmba akiri umwana muto bikorera ku ishuri bisanzwe ku bigo bitandukanye yizeho. Ni umwe mu basanzwe bafasha umutware we Nsanzabera Jean de Dieu gukosora no gutunganya ibitabo yandika, dore ko amaze kwandika ibitabo 99.

Uyu mubyeyi avuga ko yakuze akunda ubusizi n’ubuhanzi ari na cyo cyatumye yifuza kuzashakwa n’umusizi, anabigeraho ubwo yarongorwaga na Nsanzabera Jean de Dieu (Intiti itekerereza ingoma), Inzobere mu Busizi, Umuco , Amateka n’Ubuvanganzo.

Avuga ko yiteguye imbaraga zizava mu byo azakora n’uburyo Abanyarwanda bazamushyigikira kuko ariho hari igishoro gikomeye.

Agashami Dudu afite intego yo gukora umuziki igihe cyose kandi ko azabigeraho akora indirimbo zizumvikana muri Afurika no ku Isi yose.

Agashami Dudu yasohoye indirimbo nshya yise “Rutaneshwa wanjye”

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .