Impano zitangaje mu muziki: Ku ndirimbo ya mbere, Vestine & Dorcas bakoze ku mitima ya benshi

Yanditswe na Uwiduhaye Theos
Kuya 28 Ukwakira 2020 saa 12:21
Yasuwe :
0 0

Ni abana mu myaka, ariko mu mirimbire barakuze! Bafite amajwi atangaje yanyuze benshi babakundiraga gusubiramo indirimbo z’abandi, bihumira ku mirari ubwo bashyiraga hanze indirimbo yabo ya mbere.

Ishimwe Vestine na Kamikazi Dorcas ni abavandimwe babiri bavuka mu Karere ka Musanze, biyemeje kuririmbira Imana mu myaka y’ubuto bwabo kugeza imvi zibaye uruyenzi.

Bafite ubuhanga buhambaye ku buryo babasha guhuza ibyo baririmba n’amarangamutima, bakagera n’aho basuka amarira, maze ab’imitima yoroshye kwiyumanganya bikanga.

Aba bana bashyize hanze indirimbo yabo ya mbere bise ‘Nahawe Ijambo’, irimo ubutumwa buvuga ku muntu wahuye n’ibigeragezo ariko akaza gutabarwa n’Imana, akaba ayishima mu buryo bukomeye.

Mu gitero cyayo cya mbere hari aho baririmba bati “Urugamba rugeze mu mahina, warurwanye uruhereye mu mizi, iminwa y’abadukwenaga warayicecekesheje uravuga. Nanjye nahawe ijambo kuko byemewe na Nyir’ijambo. Umutima wanjye wawujuje amashimwe, akanwa kanjye nako ukuzuza indirimbo, aho byari bigoye waratabaye, warakoze Mwami.”

Hari n’ahandi baririmba bagaragaza ko “amenyo yari ay’abasetsi warayankijije uransetsa, imbaraga zawe zangose no mu ishyamba ry’inzitane.”

Mu mashusho yayo hagaragaramo umwana wigunze kubera gutereranwa n’umugore umurera, umukoresha imirimo isa nk’uburetwa.

Mu bitekerezo byari bimaze gutangwa kuri iyi ndirimbo kuri YouTube bisaga 400, benshi bakozwe ku mitima.

Mukundwa Rosine yagize ati “Iyi ndirimbo iraruhura ikanafasha. Aba bana bafite impano ni ukuri. Imana ikomeze ibaremere ubuhamya bushya.”

Akaliza Murungi Sabrina we yavuze ko iyi ndirimbo yamurijije, ati “Uzi kuryoherwa n’indirimbo utarayisubiramo, utaranayirangiza, mbega byiza we! Mwa bana mwe muhirwe kandi inganzo yanyu ntizazime. Narize pe! Ariko sinzi ikiri kundiza.”

Ishimwe Vestine Taricy yavutse tariki 2 Gashyantare 2004, ubu yiga mu mwaka wa Gatatu w’amashuri yisumbuye. Kamikazi Dorcas we yavutse ku wa 28 Kamena 2006. Yiga mu mwaka wa kabiri w’amashuri yisumbuye, bombi bavuka kuri Uzamukunda Elizabeth na Nizeyimana Mazimpaka.

Bavuka ari batandatu mu rugo iwabo, harimo abakobwa bane n’abahungu babiri. Baririmba muri Goshen Choir yi Musanze.

Batangiye kuririmba ku giti cyabo mu 2018, ariko ubu nibwo babashije gushyira hanze indirimbo yabo ya mbere.

Ubu bari gufashwa mu muziki na Murindahabi Irénée. Bahuriye na Niyo Bosco mu mu nzu ifasha abahanzi ye yitwa M. Irene Entertainment. Iyi ndirimbo yabo ya mbere bise ‘Nahawe Ijambo’ yanditswe na Niyo Bosco uzwiho ubuhanga buhambaye mu kuririmba, kwandika no gucuranga.

Dorcas (ubanza ibumoso) na Vestine (iburyo) ni abavandimwe b'inkurikirane, umwe yavutse mu 2004 undi avuka mu 2006

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .