Icyusa cy’Ingenzi yasohoye indirimbo amaze imyaka 13 yanditse

Yanditswe na Uwiduhaye Theos
Kuya 11 Nzeri 2020 saa 07:37
Yasuwe :
0 0

Umuhanzi Icyusa cy’Ingenzi Tchatching wihebeye umuziki gakondo yashyize hanze indirimbo nshya yise ‘Mutako Utanaze’ yanditse mu 2007, ivuga ku rukundo.

Iyi ndirimbo ye nshya nk’ibisanzwe yuje uburyohe uhereye ku mudiho wayo byagera ku ijwi ry’uyu mugabo byo bikaba ibindi, ku buryo umuntu wayumvise adashobora kuyihaga na gato.

‘Mutako Utanaze’ irimo ubutumwa bwo gutaka umukobwa, hari nk’aho uyu muhanzi aririmba ati “Akira imbumbya muhorana mpuhwe, bihogo byiza impundu z’urwunge; Mutesi, Mutoni w’ababyeyi shenge. Mutako utanaze hahirwa njye ugukunda, hahirwa njye ugukunda kuko urabikwiye.”

Tchatching yabwiye IGIHE ko iyi ndirimbo yari ayimaranye igihe kinini kuko yayanditse kera.

Ati “Umutako Utanaze nayihimbye mu 2007 muri Canada ahitwa Toronto. Icyatumye nyihimba ni uko nashatse gushyigikira abakunzi biyemeje kurushinga no kubaka urugo. Ni indirimbo y’urukundo.”

Iyi ndirimbo mu buryo bw’amajwi yakozwe na Aaron Niyitunga naho amashusho y’amagambo ayigize (Lyrics video) yakozwe na Fayzo Pro.

Icyusa yavukiye mu Burundi, aza gutaha mu Rwanda nyuma ya Jenoside yakorewe Abatutsi mu 1994. Yarisobanukiwe, amenya uwo ariwe, umuco we no gukangurira abandi guha agaciro umuco Nyarwanda.

Yatangiye urugendo rwo kwimariramo umuco gakondo kuva kera kuko akigera mu Rwanda yabarizwaga mu itorero ryari mu akomeye muri icyo gihe. Yanditse indirimbo kuva mu myaka yo hambere aranazisohora, zirimo iyo yise ‘Rwanda Nziza’, ‘Ejo heza’, ‘Ndeka ndorera’ n’izindi zitandukanye.

Icyusa cy’Ingenzi kuri ubu inzozi zo gukorera indirimbo mu Rwanda ku butaka afata nka gakondo ye zabaye impamo.

Impamvu yahisemo gukora umuziki wa gakondo ni uko uri mu njyana imutandukanya n’abandi cyane ko ari injyana isobanura neza umuziki wo mu gihugu cye n’umuco wacyo kandi niwo ndangamuntu agendana hose.

Icyusa cy’Ingenzi afite album ebyiri yamaze gukoraho ndetse ari gutunganya iya gatatu, ndetse ari gutegura indirimbo yahuriyemo na Tom Close washimye ubuhanga bwe akifuza ko bakorana.

Icyusa cy'Ingenzi ni umwe mu bahanzi bafite impano ikomeye muri gakondo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .