Diamond na Rayvanny baciwe akayabo kubera indirimbo yogeza irari ry’ubusambanyi

Yanditswe na Uwiduhaye Theos
Kuya 13 Ugushyingo 2018 saa 08:14
Yasuwe :
0 0

Nyuma yo gushyira hanze indirimbo yitwa ‘Mwanza’ ikamaganirwa kure muri Tanzania kubera amagambo ahabanye n’umuco w’iki gihugu ayirimo, Diamond na Rayvanny baciwe amashilingi ya Tanzania agera kuri miliyoni icyenda.

Iyi ndirimbo ivuga ku gace ko mu Ntara ya Mwanza kitwa Nyegezi, ariko uburyo iririmbwamo byateje urujijo. Yashyizwe hanze ku Cyumweru gishize.

Muri iyi ndirimbo bavugamo aka gace aho kukaririmba bakivugira ibindi bijyanye n’ubushake bwo gutera akabariro.

Iri jambo ry’agace baba baririmba baricamo kabiri, bakavuga bati “Nyege, NYEGE-zi” bikaba ari nabyo byazamuye uburakari bw’Urwego rw’Igihugu rushinzwe Abahanzi muri Tanzania [BASATA].

Nyege ubusanzwe ni ijambo rivuga ‘ubushake bwo gutera akabariro ku mugabo.’

BASATA ku wa 12 Ugushyingo 2018 yasohoye itangazo ryamagana iki gihangano ndetse isaba ba nyiracyo kwihutira kugikura ku mbuga zitandukanye no kutagicuranga mu bitangazamakuru.

BASATA yaciye ihazabu Diamond na Rayvanny

Mu kiganiro n’itangazamakuru cyabaye kuri uyu wa Kabiri, tariki ya 13 Ugushyingo 2018, Umunyamabanga Mukuru w’Urwego rw’Igihugu rushinzwe Abahanzi muri Tanzania [BASATA], Godfrey Mngereza, yavuze ko bihanangirije kenshi aba bahanzi ariko ntibumve.

Yakomeje avuga ko nyuma yo guhagarika indirimbo bahisemo guca aba bahanzi buri wese miliyoni eshatu z’amashilingi na Wasafi babarizwamo ikayishyura [byose hamwe bikaba amashilingi miliyoni icyenda zingana na 3 494 429 Rwf].

Yagize ati “Iriya ndirimbo twabasabye kuyikura ku mbuga nkoranyambaga cyane kuri Youtube. Ntabwo dukina, twabivuze dukomeje, bayikureho. Ababigizemo uruhare barimo Rayvanny, Diamond bakorana na Wasafi, twabaciye miliyoni eshatu buri umwe nk’uko biteganywa n’itegeko. Turababwira ko iyi ndirimbo twarayifunze burundu, dukomeje gusaba buri wese, igitangazamakuru cyose, ahantu hose, nta wemerewe kuyicuranga.”

Diamond yabanje kwijujutira ihagarikwa ry’iyi ndirimbo

Mu butumwa burimo ibice bibiri Diamond Platnumz yashyize ku rukuta rwe rwa Instagram yatangaje ko yababajwe n’umwanzuro BASATA yafashe n’ubwo ishinzwe kureberera ubuhanzi muri Tanzania no gukurikirana ababukora.

Yakomeje avuga ko ‘Mwanza’ itari ikwiye guhagarikwa kuko ibiganiro bitambuka mu masaha akuze abana basinziriye, birebwa n’abafite imyaka y’ubukure.

Yavuze ko yishyura amafaranga y’umusoro wo hejuru [ungana na Tsh.48.1 million] iyo akoreye igitaramo hanze ya Tanzania bityo akaba agomba kubahwa nk’umwe mu binjiriza Guverinoma.

Indirimbo ‘Mwanza’ yakumiriwe ahantu hose no mu bitangazamakuru

Indirimbo ya Diamond na Rayvanny yatumye bacibwa akayabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza