Ashaje neza ataraka: Ibidasanzwe ku ndirimbo Clarisse Karasira yakoreye Rutaremara

Yanditswe na Uwiduhaye Theos
Kuya 30 Ugushyingo 2020 saa 01:47
Yasuwe :
0 0

Mu minsi ishize Clarisse Karasira yashyize hanze indirimbo yatuye Umuyobozi w’Urwego rw’Igihugu Ngishwanama rw’Inararibonye, Tito Rutaremara, yanahaye inyito y’izina rye.

Ni indirimbo irimo amagambo azimije, yuje ubuvanganzo ndetse aryoheye amatwi. Yanyuze benshi ku buryo mu minsi mike imaze igiye kugira abayirebye kuri YouTube barenga ibihumbi 150, ibintu biba inshuro nke cyane ku bahanzi b’inaha iwacu.

Iraryoshye! Ku isegonda rya mbere kugeza ku rya nyuma, umuntu aba yifuza kuyireba kuko uretse gutaraka bya Kinyarwanda birimo, injyana yayo ntawayiveba.

Kuva yajya hanze benshi bagaragaje amarangamutima adasanzwe, bavuga ko badatunguwe n’uburyohe bwayo kuko bazi ko uyu muhanzikazi asanzwe afite ubuhanga bwatumye yigarurira ab’ibisekuru byose.

Ijya hanze, Clarisse Karasira yatangarije IGIHE ko yakoze iyi ndirimbo nk’ishimwe rigenewe Rutaremara wamuteye ingabo mu bitugu mu rugendo rwe.

Ati “Iyi ndirimbo nayituye abakunze inganzo yanjye, by’umwihariko Tito Rutaremara wankunze akankomereza ishyaka mu rugendo rwanjye rw’inganzo y’umutima.”

Yakomeje agira ati “Uyu mubyeyi namwigiyeho byinshi birimo urukundo ruhambaye ruca bugufi, rukanitanga. Muri iyi ndirimbo hari andi mazina y’abantu bamwe na bamwe bambaye hafi cyane, bose sinabarondora ariko irashimira ab’i Rwanda n’imahanga banyuzwe n’indirimbo maze imyaka ibiri nkora zigize album yanjye ya mbere.”

Muri iyi ndirimbo uyu mukobwa ashimiramo abahanzi nka Cécile Kayirebwa, Mariya Uwera, Niyomugabo Philemon, Rugamba Sipiriyani n’abandi.

Ntabwo ari ibintu bisanzwe ku banyapolitiki…

Rutaremara w’imyaka 75 ni umwe mu mpuguke n’inararibonye muri politiki kuko yinjiye mu Muryango FPR Inkotanyi ahagana mu 1987, kuva ubwo yagiye ahabwa inshingano zo kuyobora mu myanya itandukanye y’ubuyobozi yaba muri FPR ndetse no muri Leta kugera magingo aya.

Yabaye Umunyamabanga Mukuru wa FPR – Inkotanyi (1987-1989); Komiseri ushinzwe ubukangurambaga (1989-1991) n’umuhuzabikorwa wa Politike n’igisirikare (1991-1993). Yanabaye umudepite (1995-2000); ayobora Komisiyo yo gushyiraho Itegeko Nshinga (2000-2003); aba Umuvunyi Mukuru (2003-2012), umwanya yavuyeho ajya kuba umusenateri. Ubu ni Umuyobozi w’Urwego rw’Igihugu Ngishwanama rw’Inararibonye.

Kenshi ntabwo ari ibintu bisanzwe mu Rwanda ko umuhanzi yaririmba umuntu w’umunyapolitiki ukiriho, amutaka, byongeye akerura akamuvuga mu izina, mu gihe atari mu bikorwa byo kwiyamamaza mu buryo bumwe cyangwa ubundi nk’uko byakunze kumera ku banyapolitiki.

Ntibinasanzwe kandi ko uwaririmbwe agaragara mu mashusho nyir’izina y’iyo ndirimbo nk’uko byagenze mu ndirimbo Clarisse Karasira yahimbiye Tito Rutaremara.

Ibi kandi ntabwo bimenyerewe ku banyapolitiki bo mu muryango FPR Inkotanyi, kuko ubusanzwe kwicisha bugufi no kwiyoroshya biri mu mahame remezo y’uyu muryango. Hanze aha hari bamwe babifashe nk’aho Rutaremara yaba yararenze uwo murongo, nubwo hari ababibona ukundi.

Ubusanzwe indirimbo zisingiza abantu batari abanyepolitiki zimenyerewe cyane muri Congo Kinshasa ndetse no mu bihugu byo mu burengerazuba bwa Afurika, aho usanga abacuruzi n’abanyapolitiki bakungahaye baha agatubutse abahanzi ngo bavuge amazina yabo mu ndirimbo cyangwa se babavuge imyato. Gusa ni gacye usanga abo baririmbwe bagaragara mu mashusho ya bene izo ndirimbo.

Ashaje neza ataraka!

Iyi ndirimbo Clarisse Karasira agaragara yahuje urugwiro na Tito Rutaremara usanzwe akunda ibihangano bye. Uyu musaza agaragaramo igihe kinini muri iyi ndirimbo, akizihirwa ndetse agataraka bya Kinyarwanda.

Ubusanzwe Karasira Clarisse afite imyaka 23, mu gihe Rutaremara afite 75, bivuze ko nibura wagereranya uyu mukobwa n’umwuzukuru we.

Mu mashusho y’iyi ndirimbo hari aho bagera Rutaremara agasoma Karasira ku itama ku buryo asagwa n’ibyishimo, ibi bigaragarira amaso.

Gusa ibi bintu ntabwo byavuzweho rumwe, ariko urebye neza ntacyo bitwaye kuko wabigereranya n’uko umusaza yasoma umwuzukuru we. Ibintu bisanzwe bikorwa mu gihe cy’ubu.

Hanze aha benshi bakomeje kujujura ko kujya muri iyi ndirimbo kwa Rutaremara bitari bikwiye cyane ko ari umwe mu banyacyubahiro mu gihugu, bityo bakaba bari kwifashisha andi mashusho ye atandukanye atari ayafashwe y’umwihariko w’iyi ndirimbo.

Karasira aheruka kubwira itangazamakuru ko na we yatunguwe n’uburyo Rutaremara yitwaye bafata amashusho.

Ati “Numvaga aziyicarira gusa ariko yari yizihiwe, aranezerewe. Ntabwo yangoye mu kuyifatira amashusho. Muri uyu mwaka mu bintu bike byanejeje ni ukuntu twakoranye indirimbo. Imana imuhe umugisha. Kariya kabizu (bisou) ko byari ukwizihirwa.”

Uko byagenda kose, indirimbo ya Clarisse Karasira ni nziza, kimwe na nyinshi amaze gushyira hanze kugera magingo aya ndetse ku wa 26 Ukuboza azashyira hanze album ye ya mbere yitwa ‘Inganzo Y’umutima’ izaba igizwe n’indirimbo 18 zose zo mu njyana ya gakondo. Ni mu gitaramo kizabera muri Serena Hotel aho kwinjira bizaba ari ibihumbi 100 Frw.

Karasira avuga ko Rutaremara ari umwe mu bantu bicisha bugufi cyane
Karasira na Rutaremara basanzwe ari inshuti magara

Reba indirimbo Rutaremara


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .