Ahazaza h’u Rwanda muri muzika: Igor Mabano, umusore w’impano itangaje

Yanditswe na Uwiduhaye Theos
Kuya 31 Ukwakira 2018 saa 09:27
Yasuwe :
0 0

Nta kabuza ahazaza h’u Rwanda muri muzika ni heza! Magingo aya, mu Rwanda hari buri kimwe cy’ingenzi cyatuma umuhanzi atera imbere akaba igihangange ku ruhando mpuzamahanga.

Uhereye ku ishuri rya muzika ryigisha intyoza zifite impano, kugera ku bikoresho bikomeje kwiyongera ubutitsa bifasha abanyempano; icyizere ni cyose ku bakiri bato.

Igor Mabano ni umwe muri bo! Uramutse ukoze urutonde rw’abahanzi bakizamuka, b’impano zitangaje mu Rwanda, nta kabuza Mabano yaza mu icumi ba mbere.

Mu by’ibanze bisabwa kugira ngo umuhanzi atere imbere, harimo ko nibura inyuma y’impano yahawe n’Imana, aba yarabihuguriwe, azi gucuranga nibura kimwe mu bicurangisho bya muzika, afite abajyanama bazobereye; ibi byose Igor abifite mu biganza.

Ari mu barebererwa umunsi ku wundi na Ishimwe Clement, umwe mu bakomeye mu ruhando rwa muzika mu Rwanda washinze inzu itunganya indirimbo izwi nka Kina Music.

Ni we wazamuye impano zikomeye mu gihugu nka Christopher, anafasha abandi kuba ibihangange nka Knowless, King James n’abandi.

Igor Mabano ubarizwa muri iyi studio nk’umu-Producer yaganiriye na IGIHE avuga ku buzima bwe busanzwe n’ubujyanye na muzika ye dore ko abangikanya kuririmba no gucuranga.

Muzika ni amaraso y’umuryango

Igor Mabano w’imyaka 23 yavukiye mu Burundi iwabo baza kwimukira mu Rwanda akiri muto, akurira mu Mujyi wa Kigali. Ni umwe mu bana bane bavukana, ubu afite umubyeyi umwe [nyina] kuko se yitabye Imana.

Ni umusore muremure w’imibiri yombi, uvuga make cyane. Araganira ariko amaso ye aba ayahanze imbere cyane! Ikiganiro cye cyose kiba kiganisha ku iterambere gusa. Afite imisatsi miremire benshi bita Dreadlocks.

Uyu musore ucecetse, ijwi rye ryo ntiricecetse kuko mu gihe gito amaze kuba ikimenyabose. Afite ubuhanga mu gukirigita ibicurangisho bitandukanye birimo Ingoma za kizungu, Guitar ndetse na Piano. Byose yabihuguriwe mu ishuri rya muzika ku Nyundo.

Ni imfura mu bize muri iri shuri ndetse ari mu bayoboye mu itsinda ry’umuziki ryahavukiye ryitwa ‘Sebeya band’. Ubu yigisha ibijyanye no kuvuza ingoma za kizungu nyuma yo gusoza mu 2016.

Yabyirukanye amashagaga yo gukina ibicurangisho bitandukanye ndetse kuba avuka mu muryango w’abaririmbyi n’abacuranzi biza kugenda bimukururira mu muziki kugeza aho ari mu mashuri yisumbuye yabaga muri korali.

Ati “Mu rugo mama yararirimbaga, mukuru wanjye nawe aririmba muri korali. Papa yakundaga kumvaga imiziki cyane, yari anafite ibikoresho bya kera by’aba DJ.”

Igor Mabano afite impano ihambaye, ni umwe mu bafite urufunguzo rw'ahazaza ha muzika nyarwanda

Yagiye gukora ikizamini cyo kujya kwiga ku Nyundo ashidikanya

Uyu musore avuga ko yagiye gukora ikizamini cyo kujya mu ishuri ameze nk’uri gupima amahirwe avuga ko bibaye amahire yaba umwe mu batsinze agakomerezaho.

Ati “Kubera ko nakundaga umuziki nari ndi kumva radiyo, bavuga ko ku Nyundo bagiye gufata abanyeshuri bazajya kwiga umuziki ari ishuri rishya, ari ugukora amarushanwa uzatsinda bakamwishyurira. Iryo tangazo nkiryumva naravuze nti reka nitegure wenda ningira amahirwe nanjye ndatsinda nkomerezeho.”

Avuga ko bitari ibintu byoroshye kuko bagombaga gutoranya abanyeshuri 30 muri 70 bari bari guhatana ariko aza kwisanga mu bagomba gukomeza kuko yari afite umwihariko wo gucuranga ibikoresho bitatu bya muzika.

Amasomo yari ashyize imbere kurusha andi yiga mu ishuri ryo ku Nyundo ni Ukuvuza ingoma, gutunganya ibihangano ndetse no kunoza uburyo bw’imiririmbire.

Irya mugoye cyane ni Solfège [kwandika uko indirimbo ikurikiranye mu manota y’umuziki].

Indirimbo yise ’Back’ ni imwe mu zakunzwe mu gihe gito imaze hanze

Uburyo yatekerezaga azabaho nyuma yo kwiga umuziki

Uyu musore yavuze ko akiri ku ntebe y’ishuri yumvaga nagera hanze ibintu bizoroha kuko yari avuye kwiga umuziki.

Ati “Tukirangiza kwiga twumvaga ko tuzaza hanze ibintu bikoroha kuko tuvuye kwiga umuziki, ariko ntabwo byabaga ariko bimeze. Hari intambara ikomeye yo gushaka inzira ngo bya bintu wize abantu babibone.”

Hari byinshi bitera amatsiko Igor Mabano kuri Perezida Kagame

Uyu musore yirahira Perezida Paul Kagame akavuga ko ari mu bantu b’ikirenga afata nk’icyitegererezo mu buzima bwe.

Ati “Mba mfite abantu benshi nigiraho ibintu byinshi mu buzima ariko uburyo Perezida Kagame akora gahunda ze, ubuzima bwe ukuntu buba bumeze mba numva ari ibintu biteye amatsiko. Mwigiraho n’uburyo ayobora mba numva ari ibintu bishimishije. Ni umuyobozi mwiza mfata nk’icyitegererezo.”

Yari aziko abakobwa batazakunda indirimbo ze

Aherutse gushyira hanze amashusho y’indirimbo ye yise iyo utegereza, imwe muri eshatu zimuranga nk’umuhanzi. Iyo yayise ‘iyo utegereza’.

Iyi ndirimbo ye yiganjemo ubutumwa buvuga ku mukobwa usiga umusore bakundanye kuva mu buto akamusimbuza umunyamafaranga, nyuma akaza kwicuza abonye wa musore bakundanye amaze kwamamara.

Mu kiganiro na IGIHE, Igor yavuze ko iyi ndirimbo yamutunguye cyane ndetse igakundwa n’abantu barimo nabo atakekaga.

Ati “Impamvu ‘Iyo utegereza’ yaba yarakunzwe cyane ni uko naririmbye ibintu bigezweho muri iki gihe ko umukobwa ashobora kwanga umuhungu kubera ubukene.”

“Numvaga ko nta bakobwa bazayikunda kuko no mu rugo bajyaga bambwira ngo ‘Ese ko uba ucyurira abakobwa? Nanjye nkavuga ko mba ndi kuvuga ibintu bibaho mu muryango nyarwanda.”

Uretse iyi ndirimbo Igor afite izindi zirimo iyitwa ‘Ndagutekereza’ yakoze bwa mbere ndetse na ‘Back’ aheruka gushyira hanze.

Uyu musore igihe cye kinini akimara muri Kina Music atunganya indirimbo. Yavuze ko yamenyanye na Ishimwe Clement ubwo yari akiri ku ntebe y’ishuri, ubwo byabaga ngombwa ko ajya gushaka aho yimenyereza umwuga.

Iyo utegereza, imwe mu ndirimbo zikunzwe za Igor Mabano

Ikiganiro Igor Mabano yagiranye na IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza