Agashami, umuhanzikazi urajwe ishinga no kuririmba udusozi tubumbatiye amateka

Yanditswe na Uwiduhaye Theos
Kuya 26 Ugushyingo 2020 saa 08:02
Yasuwe :
0 0

Agashami Dudu, umuhanzikazi uri kuzamuka yatangiye gukora indirimbo zigaragaza amateka y’udusozi tw’u Rwanda twihariye dufite byinshi abantu batwigiraho.

Ku ikubitiro yashyize hanze indirimbo ‘Cyumba’ avuga ako gace kari mu Karere ka Gicumbi, kazwiho kuba ariko ka mbere kavumburiwemo ‘runonko’.

Yabwiye IGIHE ko iyi ndirimbo yayishyize hanze mu rukurikirane rw’izindi nyinshi ashaka gukora zigenda zumvikanisha amateka y’ahantu hatandukanye mu Rwanda.

Ati “Guhimba iyi ndirimbo ni kimwe mu bitekerezo byaje bidatunguranye. Ni umushinga umuntu yari asanganywe. Cyumba ni ahantu hafite amateka adaciriritse. Kiliziya iriyo iri mu zageze mu Rwanda bwa mbere mu 1954. Ikindi imisozi miremire yo muri Cyumba nayo iri mu byatumye mpahimbira indirimbo.”

Arongera ati “Cyumba nabonye ibyiza byayo nkimara kuhakorera urugendo bituma nifuza kuhahimbira indirimbo. Muri iriya ndirimbo hari ahantu ndirimba ‘runonko’. Mu 1600 hari umwami wari uhatwaye. Yabuze icyo agaburira ingabo ze yiga gahunda yo kubaka runonko. Undi mwihariko wa hariya, abaturage baho bakunda gukora cyane.”

Yakomeje avuga ko buri gasozi gafite amateka nibimukundira azagenda akaririmba.

Ati “Nditeguye kuvuga u Rwanda. Ubwiza bw’u Rwanda ubuvuze bwakwira bugacya. Uburyo ruteye ubiririmbiyemo rimwe ntabwo byakumvikana. Urumva ndirimba Cyumba narayimanutse kugeza no ku mazi abayo.”

“Icyo numva niyemeje nimbona ubushobozi, ni ugufata agasozi ku kandi mu tubumbatiye amateka y’u Rwanda. Ndamutse mbonye ubushobozi ababishoboye bakanshyigikira, nabikora kandi byaba ari byiza.”

Yaherukaga gushyira hanze indirimbo yise ‘‘Rutaneshwa wanjye”. Iyi yayihanze ku buryo buri mugore yayiririmbira umugabo we, amushimira ibyiza byose bagezeho mu myaka babanye.

Agashami Dudu ni umubyeyi w’abana bane barimo abakobwa babiri n’abahungu babiri, dore ko uko abyara agenda abyara impanga y’umukobwa n’umuhungu.

Yatangiye kuririmba akiri umwana muto bikorera ku ishuri bisanzwe ku bigo bitandukanye yizeho. Ni umwe mu basanzwe bafasha umutware we Nsanzabera Jean de Dieu gukosora no gutunganya ibitabo yandika, dore ko amaze kwandika ibitabo 99.

Uyu mubyeyi avuga ko yakuze akunda ubusizi n’ubuhanzi ari na cyo cyatumye yifuza kuzashakwa n’umusizi, anabigeraho ubwo yarongorwaga na Nsanzabera Jean de Dieu (Intiti itekerereza ingoma), Inzobere mu Busizi, Umuco , Amateka n’Ubuvanganzo.

Avuga ko yiteguye imbaraga zizava mu byo azakora n’uburyo Abanyarwanda bazamushyigikira kuko ariho hari igishoro gikomeye.

Agashami Dudu afite intego yo gukora umuziki igihe cyose kandi ko azabigeraho akora indirimbo zizumvikana muri Afurika no ku Isi yose.

Agashami afite gahunda yo kuririmba udusozi twose two mu Rwanda dufite amateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .