Agashami Dudu, umuhanzi mushya waserukanye indirimbo isingiza umubyeyi w’umugore

Yanditswe na IGIHE
Kuya 12 Kanama 2020 saa 08:00
Yasuwe :
0 0

Umunyarwanda yaciye umugani ngo “Akabura ntikaboneke ni nyina w’umuntu”. Ni umugani wabaye kimomo ndetse ibiwukubiyemo biba isoko ivomwaho impanuro zihabwa abakiri bato, zibatoza guha agaciro ababyeyi no kububaha.

Imyumvire ihamya uwo mugani gacamigani yakubiyemo ibyiza, ni wo umuhanzikazi Agashami Dudu yashimangiye ubwo yahangaga indirimbo ishima umubyeyi w’umugore n’agaciro afite mu muryango.

Izo ntekerezo nizo yahisemo guhangamo indirimbo ibimburira izindi azahanga ubwo yatangiraga umwuga w’ubuhanzi.

Umuhanzikazi Agashami Dudu, ‘Inyange idaharanira kwera’ nk’igisingizo yahawe n’umugabo we ubwo yamubengukaga bagashingana urugo, yinjiye mu muziki asohora indirimbo ya mbere yise “Ni njye nawe Mama” yaririmbiye ababyeyi b’abagore by’umwihariko na mama we muri rusange.

Indirimbo “Ni njye nawe Mama” yubakiye ku gushimira abagore abashimira uburyo bitanga bakabana n’umwana kuva akiba urusoro kugeza avutse.

Agashami Dudu yabwiye IGIHE ko mama we afite agaciro mu buzima ari yo mpamvu akwiye kumushimira ndetse akanamutura byinshi byiza bikubiye mu ndirimbo.

Mu ndirimbo ye hari aho yagize ati “Reka nguture uru Rwanda” kuko ari Umunyarwanda kandi akunda igihugu cye ari yo mpamvu akwiye kukibatura nk’umurage, ubwiza bwacyo nta wundi bukwiye guturwa, wa mbere usibye umubyeyi wamwibarutse.’’

Dudu wiswe Inyange idaharanira kwera, akora umuziki mu njyana gakondo, yashimangiyeko “Uburere bw’umwana butangirira ku kiriri bukarangirira ku kiriyo”.

Yagize ati ‘Umubyeyi wese aho ava akagera yagakwiye kwita ku mwana we akamuzirikana, akamuba hafi kuva avutse kugeza atakiriho kuko ari amaraso ye kandi aba yaramunyuranye ahakomeye, ntakwiye kumva ko umwana yakuze ngo amushyingire narangiza aterere iyo.’’

Akomeza avuga ko umubyeyi aba akwiye gukomeza kumuba hafi akamuha inama z’abakuru.

Iyo ndirimbo ikomeza ikangurira abakiri bato n’abakuru guha agaciro k’ikirenga ababyeyi babo ku bw’imirimo y’ikirenga baba barakoze yabakuye mu rusoro ikabageza ku buhangange butuma bavuga rikijyana.

Yavuze ko yahisemo kuririmba ku rukundo rw’ababyeyi mu rwego rwo kugaragaza agaciro kabo ahora azirikana.

Agashami yavuze ko adateze gusubira inyuma mu rugendo rushya yatangiye rwa muzika.

Yakomeje ati “Ikibuga nagezemo ndakizi, binsaba gukora cyane no kwitanga kuko buri gihe bisaba kuba hafi y’abakunzi no kubahozaho ibyiza.’’

Yavuze ko afite intego yo gukora umuziki igihe cyose kandi ko azabigeraho akora indirimbo zizumvikana muri Afurika no ku Isi yose.

Ati “Ndumva nshaka kugera aho najya njya hose muri Afurika bumva indirimbo zanjye. Nkumva bacuranga indirimbo zanjye kandi zaragize icyo zihindura mu buzima bw’abantu.”

Akomeza agira ati “Gahunda mfite mu muziki ni uko ugomba kungaburira ndetse ukanteza imbere mu mibereho yanjye. Ntabwo ngiye kuwukora nk’uje kwishimisha ahubwo nawujemo ku bw’urukundo n’akazi kandi ngiye gushyiramo imbaraga zanjye, ibitekerezo n’umutima abakunzi banjye banyegere mbagenere ibibakwiriye.’’

Yasoje avuga ko yiteguye imbaraga zizava mu byo azakora n’uburyo Abanyarwanda bazamushyigikira ariho hari igishoro gikomeye.

Agashami Dudu avuga ko indirimbo izakurikiraho izaba ishimira ababyeyi b’abagabo by’umwihariko umutware we Nsanzabera Jean de Dieu. Wamukunze by’akaburarugero akamugira umugore ukundwa.

Uyu muhanzikazi ni umubyeyi w’abana bane barimo abakobwa babiri n’abahungu babiri, bose b’impanga.

Yatangiye kuririmba akiri umwana muto abikorera ku ishuri bisanzwe ku bigo bitandukanye yizeho. Dudu ni umwe mu basanzwe bafasha umutware we Nsanzabera Jean de Dieu gukosora no gutunganya ibitabo yandika, dore ko amaze kwandika ibitabo 99.

Agashami Dudu ni umubyeyi bigaragara ko akiri muto uyingayinga ubukwererere. Mu mikurire ye yakundaga ubusizi n’ubuhanzi ari na cyo cyatumye ashakwa n’umusizi.

Agashami Dudu wiswe Inyange idaharanira kwera n'umugabo we, yinjiye mu muziki atangirana indirimbo isingiza umubyeyi w'umugore

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .