Abahanzi Rugamba Sipiriyani na Kamaliza bagiye gushimirwa mu buryo bwihariye

Yanditswe na Uwiduhaye Theos
Kuya 17 Ukuboza 2020 saa 01:37
Yasuwe :
0 0

Guhera umwaka ushize binyuze mu kiganiro ‘Versus’ gikorwa na Luckyman Nzeyimana[Lucky], Televiziyo y’u Rwanda yatangiye gutanga ibihembo kuri bamwe mu bahanzi b’ibihe byose kandi bakanyujijeho mu muziki w’u Rwanda kuva mu myaka yo hambere mu cyiswe “Legends Awards”.

Kuri ubu ibi bihembo bigiye kongera gutangwa ndetse bihabwe Rugamba Sipiriyani na Mutamuriza Annonciata wamamaye nka Kamaliza . Bizatangwa ku wa 26 Ukuboza. Ubu bwo kubera amasaha yo gutaha, bizatangwa guhera saa kumi z’umugoroba kugeza saa kumi n’imwe n’igice.

Lucky yabwiye IGIHE ko ibi bihembo bigiye gutangwa mu rwego rwo guha agaciro ibyo abahanzi bakoze, ndetse n’imiryango yabo ikomeze kubona ko ibyo bakoze bizirikanwa.

Ati “Ni ugushimira aba bahanzi kuko hari benshi bagiye babareberaho ku bintu bagiye bakora. Bagiye bakora indirimbo zakunzwe cyane ndetse hari abagenda bazisubiramo. Rugamba ni umuhanzi w’umuhanga cyane mu myandikire ye na Kamaliza ni uko, we byagera no ku ijwi rye benshi bakamwirahira.”

“Ni ukugira ngo mbashimire tubahe ako gaciro n’imiryango tubereke ko hari icyo bakoze mu muziki nyarwanda, kandi bitwaye neza ku buryo ubu hari benshi babareberaho mu muziki.”

Rugamba yavukiye mu yahoze ari Komine Karama, ubu ni mu Karere ka Nyamagabe, avuka mu mwaka w’1935. Rugamba yize amashuri ye mu Rwanda, mu Burundi ndetse no mu Bubiligi, aho yakuye impamyabumenyi y’ikirenga mu by’amateka.

Rugamba yaje gukunda umukobwa witwa Mukangiro Saverina, akaba yaramuhimbiye imitoma myinshi amurata imico n’uburanga. Uretse ko uyu mukobwa yaje kwicwa aroshywe mu mazi mu mwaka w’1963, ibi bikaba byaramubabaje cyane, ariko yaje kwishumbusha undi witwaga Mukansanga Daforoza wari ubereye nyina wabo wa wundi wa mbere.

Ni kuri izo nshuti ze ebyiri rugamba yatangiriyeho guhimba ibisigo, twavugamo amibukiro, cyuzuzo n’ ibindi byinshi. Nyuma Rugamba yashakanye na Mukansanga Daphrose (wavutse mu 1944), bashakana mu mwaka w’ 1965.

Uyu muhanzi kandi yanashinze itorero Amasimbi n’Amakombe riririmba indirimbo zisingiza Nyagasani ndetse zinigisha ku buzima busanzwe, kugeza n’ubu rikaba rigihimba indirimbo zisingiza Nyagasani.

Yakoze imirimo itandukanye muri Leta, ariko mu myaka ye ya nyuma yaje gukurwa mu kazi igihe kitageze, kubera ko atihanganiraga akarengane ako ariko kose, akabyamagana abicishije mu nganzo ye.

Yahimbye indirimbo zirenga 400 zirimo “Ntumpeho”, “Inda nini”, “Jya umenya gusaza utanduranyije cyane”, “Agaca” n’izindi nyinshi.

Rugamba n’umuryango we bishwe muri Jenoside yakorewe Abatutsi muri Mata 1994. We na Mukansanga, umugore we, bari barabyaranye abana 10, muri jenoside bacanywe n’abana babo batandatu.

Mutamuliza Annonciata na we wagenewe igihembo cy’umuhanzi w’umunyabigwi na Televiziyo y’u Rwanda, yavutse ku itariki ya 25 Werurwe 1954 avukira i Rukara muri Runyinya, ubu ni mu Karere ka Nyaruguru.

Mu 1959 we n’umuryango we bahungiye mu Ngagara i Burundi ari naho yize amashuri abanza. Mu 1968, nyina yitabye Imana bituma se amwohereza kwa mukuru we wari warashakiye muri RDC.

Yahise akomerezayo amashuri yisumbuye mu ishuri ry’i Lubumbashi ari nabwo yatangiye kuririmba mu makorali ya Kiliziya Gatolika. Ibikorwa by’umuziki wa Kamaliza ntibyashimishaga nyina wabo Anna Mariya babanaga.

Mu gushaka uburyo yava mu by’umuziki, yashatse kumushyingira atabishaka undi na we ahita asaba uruhushya rwo kujya i Bujumbura, guhera ubwo ntiyasubira i Lubumbashi.

Yaje no guhita abona akazi muri Minisiteri y’Imari i Bujumbura. Mu gihe cy’ikiruhuko kigufi ndetse na nyuma y’akazi yiyibutsa iby’umuziki no kwifata amajwi kuri cassettes yifashishije radio yari yarahawe n’umwe mu nshuti ze witwa Tereza.

Mu 1990 yanogeje umugambi wo kujya ku rugamba rwo kubohora u Rwanda. Yagiye yitwaje gitari ndetse yaririmbiraga abasirikare bagenzi be mu kubatera akanyabugabo no mu bitaramo by’Itorero Indahemuka yabaga ari mu bahanzi bakunzwe.

Nyuma yo kugera mu gihugu yakomeje umuziki ndetse atangira ibikorwa byo gufasha imfubyi anashinga umuryango yise ‘Girubuntu Kamaliza’ abigiriwemo inama na Nzambazamariya Veneranda wari inshuti ye magara.

Ku itariki ya 5 Ugushyingo 1996, yakoze impanuka ikomeye ubwo yavaga i Burundi aje gusura umuryango we mu Rwanda. Yapfuye afite ipeti rya Sergent.

Ubwo umwaka ushize ibi bihembo byatangwaga ku nshuro ya mbere, byahawe Makanyaga Abdul na Mariya Yohana.

Rugamba ni umwe mu bahanzi b'abahanga babayeho mu muziki w'u Rwanda
Kamaliza ni umwe mu bahanzikazi b 'banyabigwi ufatwa nk'ikitegererezo kuri benshi
Umwaka ushize ubwo Mariya Yohana, Makanyaga n'umunyamakuru Lucky baganiraga mbere yo kubashimira
Makanyaga Abdul na Mariya Yohana nibo bashimiwe umwaka ushize
Umwaka ushize ubwo ibi bihembo byatangwaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .