Abahanzi barimo King James na Knowless basendereje ibyishimo abanya-Kigali muri Tour du Rwanda (Amafoto)

Yanditswe na Uwiduhaye Theos
Kuya 1 Werurwe 2020 saa 01:04
Yasuwe :
0 0

Abahanzi bakomeye mu Rwanda barimo Butera Knowless, King James, Bruce Melodie, Bulldog n’abandi bashimishije abanya-Kigali mu gitaramo cya Tour du Rwanda.

Iki gitaramo cyabaye kuri uyu wa 29 Gashyantare 2020, gihuriramo abahanzi batandukanye bakomeye mu Rwanda barimo ababarizwa muri Kina Music nka Butera Knowless, Igor Mabano, Nel Ngabo, P, Bulldogg, Bruce Melodie, Davis D na King James.

Ni nyuma y’agace ka karindwi kasorejwe i Nyamirambo aho Umunya-Colombia Restrepo Jhonatan wa Androni Giocattoli - Sidermec yegukanye aka gace, yandika amateka mashya yo kuba umukinnyi wa kabiri wegukanye uduce tune twikurikiranya mu irushanwa rimwe.

Mu gitaramo cyakurikiyeho, ku rubyiniro habanjeho Rob Drabkin washimishije benshi mu ndirimbo ze zitandukanye biba akarusho ubwo yaririmbaga indirimbo izwi cyane mu Rwanda y’abana yitwa ‘Mbe Kanyamanza keza’.

Yakurikiwe n’umuraperi S-Wrap nawe washimishije benshi mu muziki wiganjemo uwo mu njyana ya Trap.

Nel Ngabo ubarizwa muri Kina Music niwe wakurikiye uyu muhanzi ashimisha benshi mu ndirimbo zirimo ‘Byakoroha’ asoreza kuri ‘Ya Motema’ yahuriyemo na P wahoze muri Dream Boyz.

Davis D ugezweho mu ndirimbo ‘Dede’ niwe wakurikiyeho yishimirwa mu ndirimbo zitandukanye. Uyu muhanzi yahereye ku yitwa ‘Biryogo’, ‘Soso’, ‘Sexy’, ‘Like you’ yahuriyemo na Seyn na Kevin Kade asoreza kuri ‘Dede’.

Nyuma, Igor Mabano yahise ajya ku rubyiniro yishimirwa mu bihangano bye bitandukanye birimo indirimbo yise ‘Ni ukuri’, ‘Go Back’, ‘Dear Mashuka’ yafashijwe ku rubyiniro na Rob Drabkin, ‘Gake’ asoreza kuri ‘Iyo Utegereza’.

Yahise aha umwanya Platini wahoze muri Dream Boyz usigaye yitwa P, uyu muhanzi aririmba indirimbo ze zirimo ‘Fata amano’ yakoranye na Safi Madiba ndetse na ‘Romeo & Juliet’ ya Dream Boyz yahozemo.

Bruce Melodie niwe wari utahiwe! Uyu muhanzi yishimiwe mu ndirimbo yinjiriyeho yitwa ‘Ndumiwe’, ‘Katerina’, ‘Kalibu nyumbani’ asoreza kuri ‘Kungola’ yahuriyemo na Sunnny yahagurukije n’iyonka muri iki gitaramo.

Aba bahanzi bakurikiwe na Bulldogg wahise yanzika n’indirimbo ze zirimo ‘Nk’umusaza’, ‘Cinema’ na ‘Zana’ na ‘Mpe Enkoni’. Uyu muhanzi ari mu bishimiwe bikomeye muri iki gitaramo.

Butera Knowless yaje akorera mu ngata uyu muhanzi mu ndirimbo yise ‘Yuda’, ‘Nkoraho’, ‘Sweet Mutima’, ‘Blessed’, ‘Day to day’.

Uyu muhanzikazi yishimiwe kuva atangiye kugeza asoje kuririmba. Abakunzi be bari bahimbawe ku buryo baririmbanaga nawe kuri buri ndirimbo yose yaririmbaga.

King James niwe washyize akadomo kuri iki gitaramo ahereye ku ndirimbo yise ‘Icyangombwa’ akajya anyuzamo akaganiriza abafana ababwira ati ‘muriteguye kubyina?’ bose bakiriza icyarimwe bamwereka ko banyotewe no gutaramana nawe.

Yakomereje kuri ‘Ayo arya ni ayanjye’, ‘Ibare’, ‘Buhoro buhoro’, ‘Umuriro watse’, ‘Ganyobwe’ asoreza kuri ‘Ndagutegereje’.

Uyu muhanzi ari muri bake babashije guhagurutsa buri wese wari uri muri iki gitaramo ndetse yeretswe urukundo mu buryo bukomeye.

Muri iki gitaramo habayemo n’umwanya wo gupima ku buntu virusi itera sida n’izindi ndwara, hakanatangwa inyigisho zitandukanye zifasha abaturage kubungabunga ubuzima bwabo.

King James yashyuhije abafana karahava
Abantu bari bitabiriye ku bwinshi
Bruce Melodie yaserutse gutya
Bulldogg yanyuze benshi muri iki gitaramo
Bulldogg yaserukanye n'abasore barya umuriro ku rubyiniro
Bulldogg yashimangiye ko ari umuraperi umaze guhamya ibigwi mu muziki
Butera Knowless ari mu bahanzikazi bamaze igihe kinini bafite igikundiro mu muziki
Butera Knowless yaserutse yambaye muri ubu buryo
Butera Knwoless ku rubyiniro
Davis D yishimiwe mu ndirimbo igezeho yise Dede
Igor Mabano ni uku yaserutse yambaye yishimirwa cyane mu ndirimbo yise Iyo utegereza
King James niwe wasoje iki gitaramo
King James yahagurukije buri wese muri iki gitaramo
King James yashimishije benshi mu ndirimbo ze zabiciye bigacika
Mc Kate Gustave ari mu bayoboye iki gitaramo
Mc Phil Peter yafatanyije na Kate Gustave muri iki gitaramo
Nel Ngabo ku rubyiniro yishimiwe nubwo ari mu bahanzi bakizamuka
P kuva Dream Boyz yatandukana amaze gukora indirimbo ebyiri
P yaririmbaga akanafatanya n'ababyinnyi be gucinya akadiho
Rob yafashije Igor Mabano ku rubyiniro mu ndirimbo yise Dear Mashuka
S Wrap ari mu bahanzi bashimishije benshi kubera uburyo atondekanya amagambo muri Rap
Bruce Melodi yishimiwe cyane mu ndirimbo yise Kungola yakoranye na Sunny

Amafoto: Umurerwa Delphin

Video: Uwacu Lizerie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .