Abahanzi babiri biyongereye ku bazataramira abazitabira gitaramo Awilo Longomba ategerejwemo mu Rwanda

Yanditswe na Uwiduhaye Theos
Kuya 8 Ukwakira 2019 saa 12:25
Yasuwe :
0 0

Abakunda gucinya akadiho mu bitaramo bitegurwa na RG Consult bagiye kongera kuryoherwa n’umuziki w’uruvangitirane wa Awilo Longomba wo muri Congo Brazaville, Mani Martin na Ange Rita Kagaju.

Aba bahanzi bazahurira mu gitaramo gikomeye mu gitaramo cya Kigali Jazz Junction kizaba ku wa 25 Ukwakira 2019, aho yatowe n’abakurikira abategura iki gitaramo ku rubuga rwa Twitter bamuhisemo bakarenza ingohe abandi bari bavuzwe barimo Suzanna Owíyo wo muri Kenya na Mýa wo muri Leta Zunze Ubumwe za Amerika.

Uyu muhanzi wakunzwe cyane mu ndirimbo nyinshi “Cache Cache”, “Karolina”, “Rosarina”, “Banana”, “Bibala bala”, “Trop parler c’est maladie” cyangwa se “Fifi”, “Esopi Yo” yahuriyemo na Tiwa Savage, “Enemy Solo” yakoranye na P Square n’izindi nyinshi; azaririmba mu gitaramo kimwe n’abahanzi bo mu Rwanda nka Mani Martin ufite ubuhanga buhambaye mu kugorora ijwi ndetse na Rita Kagaju ufite ubuhanga buhanitse mu kuririmba.

Mani Martin[Maniraruta Martin], ni umwanditsi w’indirimbo, umuhimbyi w’injyana (melodies), umuririmbyi (Pop/RnB ivanzemo Gakondo) n’umukinnyi wa filime. Yavukiye mu Karere ka Rusizi mu Ntara y’i Burengerazuba ku wa 24 Ukuboza 1988.

Amashuri abanza yayize kuri Ecole Primaire de Ntura (Catholique), ayisumbuye ayiga kuri Ecole Secondaire Gahunga Ruhengeri mu Majyaruguru, ayarangiriza muri Centre Islamique de Kigali mu ishami ry’indimi n’ubuvanganzo.

Bwa mbere yinjira muri studio yari mfite imyaka 11, akora indirimbo 12 zose azishyira kuri Cassette yise ’Agapfa kaburiwe ni Impongo’. Icyo gihe hari mu 2000. Mu 2001 yasohoye indi cassette yise “Umuntu ni iki?”, yari iriho indirimbo 14.

Yamenyekanye mu yitwa ’Urukumbuzi’ yasohoye mu 2005, inamuhesha igihembo cy’umuhanzi w’umwaka, igihembo cyitwaga Rwandan Artist Promotion cyatanzwe na Radio 10 ku bufatanye na Bralirwa (Mutzing).

Mu 2007 yasohoye Album ye ya mbere yise Isaha ya 9. Yari iriho indirimbo nka Isaha ya 9, urukumbuzi, Kumbu Kumbu (Urukumbuzi version ya 2), Urabeho, Genzura, Tube Umwe (itari iy’abahanzi bose), Gitare Cyanje, Narabohowe, Wa si we uri Nta munoza n’izindi. Iyo Album yakozwe n’aba producer nka Aaron Nitunga na Patrick Buddha bita kiruru Nine ndetse na Mastora.

Nyuma asohora Album ya kabiri yise ‘Icyo dupfana kiruta icyo dupfa’. Iyi Album yari yiganjeho indirimbo ziganisha ku butumwa bw’Ubumwe n’Amahoro.

Nyuma y’iyi Album nibwo yatangiye gukora umuziki udashingiye ku iyobokamana gusa, aririmba ku buzima busanzwe burimo urukundo. Nibwo yaje gusohora indirimbo yitwa yari Wowe, Mazi Magari, Nyibwirira, Ni Amateka, Intero y’Amahoro, Ideni na Ivuzivuzi zose zikazagaragara kuri Album ye ya gatatu yitwa ’Intero y’Amahoro’.

Mu 2012 yakoze indi yise ‘My Destiny’ , aheruka gushyira hanze album mu 2017 yise ‘AFRO’ igizwe n’indirimbo 15 yahanze agendeye ku bitekerezo yasomye mu ibaruwa Patrice Lumumba yandikiye umugore we amubwira ko Afurika izagera igihe ikiyandikira amateka yayo uko ari.

Uyu muhanzi mu maza ye yaririmbaga indirimbo ziganisha ku butumwa bwo kuramya Imana ariko nyuma aza kujya no mu ndirimbo zivuga ku buzima bwa buri munsi bwa muntu.

Rita Kagaju bazahurira mu gitaramo ni umukobwa w’imyaka 18, uvuka mu karere ka Rwamagana mu Ntara y’Iburasirazuba.

Ange Ritha Kagaju yakoze indirimbo zirimo ‘A song to him’, ‘If f You Only Knew’, ‘Jamaa’, ‘No Offense’ aherutse gushyira hanze n’izindi. Abarizwa mu nzu ifasha abahanzi ya Ida Records.

Yatangiye kuririmba mu 2015 yiga mu mwaka wa Gatatu w’amashuri yisumbuye yasoje mu 2018 mu ishami ry’Imibare, Ubugenge n’Ubumenyi bw’Isi mu ishuri rya Rwamagana Lutheran School.

Ni umwe mu bakiri bato batanga icyizere cyo kuzagera kure bitewe n’ijwi rye n’uko abijyanisha no gucuranga gitari.

Kwinjira muri iki gitaramo aba bahanzi bazahuriramo bizaba ari 10 000 Frw mu myanya isanzwe, 20 000 Frw muri VIP , 25 000 frw muri VVIP ndetse na 200 000 ku meza y’abantu umunani.

Mani Martin ni umwe mu bahanzi baririmba umuziki uryoheye amatwi
Rita Kagaju afite ubuhanga buhambaye mu gucuranga gitari n'ijwi rinogeye amatwi
Awilo Longomba ategerejwe mu gitaramo mu Rwanda muri uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza