00:00:00 IGIHE NETWORK KN KINYARWANDA EN ENGLISH FR FRANCAIS

Abagore bagezweho mu kuvanga umuziki uryohera benshi ku Isi(Amafoto)

Yanditswe na Uwase Kevine
Kuya 31 Ukuboza 2022 saa 02:40
Yasuwe :

Mu ruganda rw’imyidagaduro, ni kenshi uhura n’ibitaramo byateguwe bigaha umwanya abahanga mu kuvanga imiziki ‘DJs’, cyangwa ugasanga ni igitaramo cyabo gusa bagacuranga imiziki itandukanye yaba iyabo cyangwa iy’abandi.

Uyu ni umwuga umaze gukura cyane kandi ukundwa na benshi ku Isi, dore ko abawukora neza basigaye binjiza agatubutse ku buryo ababimenye mbere bafunguye n’amashuri yigisha ibijyanye n’uyu mwuga.

Muri iyi nkuru IGIHE yagarutse ku bakobwa n’abagore b’ibyamamare mu kuvanga umuziki bafatwa nk’icyitegererezo kuri bamwe bashaka kwinjira muri uyu mwuga, ndetse bakaba bifashishwa n’abanyamuziki bakomeye ngo babakorere indirimbo.

DJ Nervo

Itsinda ry’abakobwa bavukana b’impanga Olivia Nervo na Miriam Nervo, ku myaka 18 nibwo basinye amasezerano y’imikoranire na ‘Sony Music Publishing’ .

Aba bakobwa bavutse ku wa 18 Gashyantare 1982, bazwi mu ndirimbo ‘ When Love Takes Over’ mu 2009 yegukanye igihembo cya ‘Grammy’. Bakoreye indirimbo kandi abahanzi batandukanye barimo Miley Cyrus, David Guetta, Kelly Rowland n’abandi.

Aba bakobwa baturuka muri Australie bacuranze mu bitaramo bikomeye nka Tomorrowland ibera mu Bubiligi, Lollapalooza yo muri Leta zunze Ubumwe Amerika , n’ahandi.

Dj Soda

Hwang So-hee w’imyaka 36 ukomoka muri Koreya y’Amajyepfo, ukoresha izina rya Dj Soda yatangiye kuvanga umuziki mu 2013.

Mu 2015 nibwo yatangiye gukora ibitaramo bikomeye muri Koreya nka ‘Korean Dj Fetsival’ byageze no mu bindi bihugu bitandukanye hirya no hino ku Isi.

Dj Soda yamenyekanye cyane mu bitaramo byo "S20 Songkran Musical Festival" byabereye mu mijyi itandukanye yo muri Asia nka Seoul, Bangkok, Hong Kong n’iyindi.

Usibye kwikorera umuziki we, yakoreye n’abandi bahanzi batandukanye barimo Walshy Fire wo muri Jamaica, Sistar itsinda ryo muri Koreya y’Epfo, Psycho Boys Club bo muri Amerika n’abandi.

Mattn

Umubiligikazi Anouk Matton uzwi ku izina rya DJ Mattn ubarizwa mu nzu ikora imiziki ‘Smash the house record’, mbere y’uko yinjira mubyo kuvanga umuziki yari umunyamideli.

Dj Mattn watangiye urugendo rwe rwo kuvanga umuziki muri 2015, yavutse tariki 18 Ukuboza 1992. Ni umugore wa Dj Dimitri Vegas na we uzwi cyane mu kuvanga umuziki.

DJ Mattn yacuranze mu bitaramo bitandukanye nka ‘EDM festivals’ ibera ku mugabane w’u Burayi, Tomorrowland n’ibindi.

Charlotte De Witte

Charlotte De Witte uturuka mu mujyi wa Ghent mu gihugu cy’u Bubiligi, yavutse tariki 21 Nyakanga 1992 atangira umwuga wo kuvanga umuziki mu 2010.

Charlotte yakoze EPs (extended players) nyinshi harimo indirimbo yise ‘You’re mine’ yakoranye na ‘Oscar and Wolf’ itwara igihembo cy’indirimbo yakozwe neza kurusha izindi mu 2020.

Charlotte yashinze sosiyete ifasha abahanzi ya KNTXT, ibarizwamo abahanzi batandukanye nka Chris Leibing, Monoloc na Alignment.

Alison Wonderland

Alexandra Margo Sholler uzwi ku izina rya Alison Wonderland uturuka mu mujyi wa New South Wales muri Australie, yavutse tariki 27 Nzeri 1986. Ni umwe mu batunganya umuziki wa EDM, akazi afatanya no kuvanga umuziki.

Mu 2017 Alison Wonderland yahawe igihembo cy’Umunyamuziki mwiza mu bihembo bya ‘Electonical Music’. Yacuranze mu bitaramo bikomeye nka Park life Music Festival yo mu Bwongereza na EMI Music yo muri Australie.

Alison Wonderland umaze imyaka irenga 13 akora umuziki, yakoranye n’abahanzi bakomeye nka The Weeknd, Lorde, Mad Decent n’abandi.

Amelie Lens

Amelie Lens w’imyaka 31 ukomoka mu Bufaransa ariko ufite n’ubwenegihugu bw’u Bubiligi, avanga umuziki ndetse akanawutunganya binyuze muri sosiyete ye ifasha abahanzi yitwa ‘Lenske’.

Amelie yinjiye mubyo kuvanga umuziki kuva mu 2014. Indirimbo ‘Exhale’ yakoze yamuhesheje kumenyekana bimuha gukora mu bitaramo bikomeye nka Extrema, OFF Sonar n’ibindi bikorwa mu bihugu nka Brésil, u Bubiligi, Espagne n’ahandi.

Mariano Bo

Mariano Bo ukomoka muri Mexique, akiri muto yize ibijyanye no gucuranga ‘Violin’, nyuma aza kwinjira mu kuvanga umuziki no kuwutunganya.

Mariano w’imyaka 30 yagaragaye mu bitaramo by’umuziki bikomeye ku Isi nka Daydream Festival yo mu Bubiligi, Mayan Madness na Electric Planet muri Mexique n’ahandi.

Rezz

Isabelle Rezazadeh uzwi ku izina rya Rezz yavukiye muri Ukraine ku wa 28 Werurwe 1995. Afite ubwenegihugu bwa Canada, akaba avanga umuziki ndetse akanawutunganya.

Ku myaka 16 nibwo yatangiye urugendo rwo kuvanga umuziki. Yanakoze EP yise ‘Something Wrong Here’ yagiye ku mwanya wa 19 mu ndirimbo 100 zikunzwe kuri Billboard.

Uyu mukobwa yakoranye n’abahanzi bakomeye nka Dove Cameron, Deadmau5, Underneath n’abandi.

Miss K8

Kateryna Kremko uzwi ku izina rya Miss K8, yavukiye mu mujyi wa Kyviv muri Ukraine. Yamenyekanye cyane mu 2012 ubwo yashyiraga hanze indirimbo yise ‘Unforgettable’.

Miss K8 yatsindiye igihembo cya ‘Juno Award’ kuri Album y’umwaka inshuro ebyiri, yacuranze mu bitaramo bikomeye nka Masters Hard-core, Dominator n’ibindi.

Nina Kraviz

Nina Kraviz wavukiye mu mujyi wa Siberia mu Burusiya, yatangiye yiga ibijyanye no kuvura amenyo, gukunda umuziki biza kumuganza aba DJ mu 2005.

Nina yize umuziki mu ishuri ry’umuzika rya Red Bull Music Academy riri mu mujyi wa Seattle muri Leta zunze ubumwe Amerika.

Uyu mukobwa wavutse taliki 11 Ukwakira 1981, yatwaye igihembo cy’umuhanzi mwiza wahize abandi mu 2018, anakora imiziki ikoreshwa mu mikino yo kuri mudasobwa harimo Cyberpunk 2077, PXO99 n’iyindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .