8D audio: Ikoranabuhanga rishya ryahinduye uburyo abantu baryoherwa n’umuziki

Yanditswe na Iradukunda Serge
Kuya 4 Mata 2020 saa 04:46
Yasuwe :
0 0

Abahanga basobanura umuziki nk’urunyurane rw’amajwi atandukanye kandi ashorerana mu mujyo runaka, bikabyara inyuramatwi maze umuntu akaryoherwa, kuko iyo ayo majwi asohotse insigane bibyara urusaku.

Uko imyaka yagiye ishira, umuziki na wo wagiye uhinduka mu njyana zinyuranye, abo hambere bakunda Soul, Jazz n’izindi, bigeze mu myaka ya vuba haza izindi njyana zirimo Rap ivuguruye, ubu bageze kuri Trap.

Mu buryo bushya bwo kuryoherwa n’umuziki, kimwe mu bikomeje gufasha abakunzi bawo si injyana gusa, ahubwo ni ikoranabuhanga rya ‘8D audio’. Ni uburyo butuma umuntu yumva umuziki usa n’umuzenguruka, akiyumva nk’uri ahantu kure akikijwe n’umuziki kandi uvuga mu buryo bunogeye amatwi, ntihazemo ibintu bihonda cyane.

Ni uburyo ariko kugira ngo wumve imigendekere yabwo, bisaba ko uba wambaye utwumvisho (écouteurs, earphones) mu matwi yombi, iburyo n’ibumoso. Nuba wambaye kamwe cyangwa urimo kumvira mu ndangururamajwi yo hanze haba kuri mudasobwa cyangwa telefoni, uzumva ntaho bitandukaniye n’amajwi umenyereye.

Iyo wumva indirimbo ikozwe mu buryo bwa ‘8D audio’, wumva amajwi akuzenguruka muri dogere 360, ugasa n’aho uyumvira kure ubundi ukumva arakwegereye.

Abantu bamenye cyane ibijyanye n’iri koranabuhanga binyuze mu butumwa bukomeje gucicikana kuri WhatsApp bubasaba kumva indirimbo y’itsinda Pentatonix bakoresheje ‘écouteurs’.

Niba wumvise iyo ndirimbo cyangwa ubu buryo ku nshuro ya mbere, utunguwe n’itandukaniro riri mu buryo uyumva n’uko usanzwe wumva izindi ndirimbo.

Iyo wumva indirimbo ikozwe muri ubu buryo bwa ‘8D audio, ibicurangisho biyirimo n’ijwi rya nyirayo bivuga mu buryo ubyumvira mu bwonko kuruta uko ubyumvira mu matwi nyir’izina.

Aya majwi kandi avuga mu buryo busa nk’ubukuzenguruka mu bwonko, buva mu gice cy’iburyo bujya ibumoso ndetse akanyuzamo akajya mu gice cy’inyuma, ari nako agaruka imbere. Igihe wumva umuziki ukoze muri ubu buryo, nta rusaku rukubabaza amatwi wumva nk’uko bigenda ku bambaye ‘écouteurs.’

Muri ubu buryo bwa 8D audio, umuziki wumva umeze nk’ukugeraho uturutse kure, bisa nk’aho uri mu gitaramo uzengurutswe n’imizindaro ariko iri mu ntera ndende.

Iri koranabuhanga rya ‘8D audio’ rikorwa hifashishijwe uguhuriza hamwe uburyo bwo kuringaniza amajwi yumvikana mu ndirimbo buzwi nka ‘equalization’ n’uburyo bwo gutembereza amajwi akava mu gice cy’iburyo cya écouteurs ajya mu cy’ibumoso, bizwi nka ‘panning’, hagamijwe gukora umuziki uyunguruye kandi utumvikanira mu gutwi cyane.

Indirimbo zikoze muri ubu uburyo ushobora kuzisanga ku mbuga zisanzwe zisakarizwaho indirimbo za Youtube na Soundcloud, deezer n’izindi, aho wandikamo izina ry’indirimbo, ukongeraho 8D.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .