00:00:00 IGIHE NETWORK KN KINYARWANDA EN ENGLISH FR FRANCAIS

PGGSS: Igihunga n’ubwoba bishobora gutuma Knowless asezera irushanwa

Yanditswe na

Kalinda Brendah

Kuya 30 Werurwe 2015 saa 11:46
Yasuwe :

Ingabire Jean d’Arc wiyise Knowless nk’izina ry’ubuhanzi ntahuza indimi n’akanama nkemurampaka k’irushanwa arimo rya PGGSS, arashinjwa kuba yarakoze amanyanga akaririmbira kuri CD mu gitaramo giherutse kubera i Nyamagabe ariko we agahakana agaramye ko arengana.

Mu gitaramo cyabereye i Nyamagabe tariki 28 Werurwe, Knowless yagize ku rubyiniro yagize ikibazo cyo gusarara. Agitangira kuririmba benshi batangiye kongorerana bavuga ko uyu mukobwa ashobora kuba yaririmbiye kuri CD mu gihe abandi bahanzi bakoze Semi-live.

Akimara kuririmba, Knowless yabwiye itangazamakuru ko yaririmbye arwaye mu muhogo ariko ngo nta kibazo byamuteye haba mu miririmbire n’uburyo yiyeretse abafana.

Ngo ntabwo yaririmbishaga ijwi rye ahubwo ngo yitabaje CD

Knowless yahamirije IGIHE ko yaririmbye semi-live nk’abandi ndetse avanaho icyuka kibi cyari cyaje mu bafana bamwe bamushinja kuba yaribye umugono akanama nkemurampaka akaririmbira kuri CD.

Yibye umugono akanama nkemurampaka karamutahura

Knowless amaze kuvuga mu itangazamakuru ko yaririmbye semi-live kimwe n’abandi bahanzi akanama nkemurampaka kayobowe na Aimable Twahirwa akagaragirwa na MC Lion Imanzi na Tonzi kahise kamunyomoza byihuse ndetse gashimangira ko koko yakoze amanyanga aririmbira kuri CD.

Twahirwa Aimable , yemeje ko Knowless yashatse guca mu rihumye akanama nkemurampaka agakoresha CD kandi bitemewe mu irushanwa gusa ngo yasanze baryamiye amajanja bamutahura rugikubita ndetse bamuvanaho amanota.

Ni urwango bose bafitiye Knowless?

Tonzi na Lion Imanzi bafatanya na Aimable Twahirwa mu gutanga amanota ku bahanzi na bo bemeza ko uyu mukobwa yaririmbiye kuri CD koko ndetse bituma bamuvanaho amanota nubwo akomeje kubyitarutsa.

Ngo ntacyo barenze ku byo Aimable Twahirwa yatangaje ngo kuko icyo yavuze ari umwanzuro bahuriyeho bose.

Akanama nkemurampaka kamutahuye rugikubita

Lion Imanzi yagize ati, “Aimable Twahirwa ni we uduhagarariye, yatangaje ibyo twemeje ndumva nta kirenze ibyo navuga. Gusa ubuyobozi bw’irushanwa buracyabikurikirana ubundi hatangazwe imyanzuro”.

Yanyagiranywe n’abandi atoha wenyine

Umunyarwanda yaravuze ngo [umugabo anyagiranwa n’abandi agakeka ko yatose kubarusha]. Ni byo byabaye kuri Ingabire Jeanne d’Arc kuri Stade ya Nyagisenyi i Nyamagabe.

Nubwo avuga ko yaririmbye arwaye umuhogo ndetse ko byabanje kubera inzitizi itaratumye yitwara neza uko yifuzaga, hari abandi bahanzi bagenzi be baririmbye barwaye ndetse barahanyanyaza bitwararika ku byo basabwa n’akanama nkemurampaka kugira ngo babone amanota.

IGIHE yavuganye n’abandi bahanzi bagize ikibazo cy’uburwayi nk’ubwa Knowless bemeza ko akanama nkemurampaka kadashobora kukugirira ikigongwe ku bw’ibibazo by’ijwi uba wahuye na byo ngo kuko bose bangana imbere y’Imana, imbere y’amategeko ya Bralirwa n’imbere y’akanama nkemurampaka.

Bull Dogg na we yaririmbiye i Nyamagabe afite ikibazo cy’umuhogo ariko ngo nta rwitwazo yari kubona abwira akanama nkemurampaka ko ijwi rye ritari kumwemerera kuririmbira kuri CD.

Yagize ati, “Nakoze iyi performance ntameze neza kuko nari nasaraye ariko nagerageje gukora ibyo nsabwa kandi ndahamya ko nitwaye neza”.
TNP yaririmbye i Rusizi umwe muri bo arwaye, yari imbogamizi ikomeye ku itsinda ryabo ariko ngo nta yandi mahitamo bari bafite uretse kwiyerekana uko akanama kabisaba buri muhanzi kugira ngo ahabwe amanota.

Uwitwa Passy yaririmbye arwaye ibicurane ariko ngo nta kibazo na gito bagiranye n’akanama nkemurampaka.

Tracy yagize ati, “Twaririmbye mugenzi wanjye arwaye bisa nk’aho ari njye wakoze gusa ariko twagerageje gukoresha imbaraga zose zishoboka dore ko n’aba judges bari bazi ikibazo cyacu”.

Nubwo aba bahanzi bari barwaye ndetse babimenyesheje akanama nkemurampaka nta n’umwe wakoresheje CD cyangwa ngo agirane amakimbirane na Bralirwa itegura irushanwa.

Ese Knowless ni we muhanzi wanzwe mu Rwanda?

Mu myaka itanu irushanwa rya Primus Guma Guma Super Star rimaze ni ubwa mbere umuhanzi avuguruje akanama nkemurampaka ndetse akagasaba kumusaba imbabazi ngo kuko kamurenganyije kamugerekaho amakosa atakoze.

Aka kanama kagizwe na Lion Imanzi, Tonzi na Aimable Twahirwa nta na rimwe karafata umwanzuro ku muhanzi ngo hagire uzamura umwuka mubi avuga ko yarenganyijwe cyangwa yanzwe nk’uko byagenze kuri Knowless.

Mu mahame agenga aka kanama nkemurampaka harimo kwirinda amarangamutima ayo ariyo yose ku muhanzi, kwirinda gutonesha bamwe mu gutanga amanota. Mu byo gasabwa kwitwararikaho harimo kwirinda ubusambune mu bahanzi ari nabyo byabaye kuri Knowless ubwo kanzuraga ko kasanze yakibye umugono akaririmbira kuri CD nubwo we abitera utwatsi.

Imbere y'abafana Knowless ashobora kuba adahagaze neza

Abandi bahanzi uko ari icyenda, bemeza ko akanama nkemurampaka gafata abahanzi kimwe ndetse ngo ibyo gatangaza ni umwanzuro w’abakagize bose bityo bikaba bigoranye kuba umwe yarenganya umuhanzi ngo abandi barebera.

Haba ubuyobozi bwa Bralirwa na East African Promoters bafatanya gutegura PGGSS nta na rimwe byigeze bigaragara ko hari umuhanzi bafitiye ‘urwango’ mu Rwanda ku buryo bamubangamira hagamijwe kumupyinagaza no kumwambura amanota hadashingiwe ku kuri kw’ibyo yakoze.

Hagendewe ku bumenyi bw’abagize akanama nkemurampaka, biragoye kuba wahagarara ku maguru yombi ukanyomoza Aimable Twahirwa inararibonye mu muziki ngo umwemeze ko nta CD waririmbiyeho. Aramutse acitswe akibeshya ku muhanzi amugerekaho kuririmbira kuri CD kandi atari byo, bagenzi be Tonzi[umuhanga mu muziki] na Lion Imanzi bamwunganira uwarenganye akarenganurwa hakiri kare.

Icyoba n’igihunga, intandaro yo gusezera kwa Knowless

Nyuma y’uko akanama kanzuye ko Knowless yaririmbiye kuri CD ndetse agakurwaho amanota, uyu muhanzi yasabye ko yasubizwa amanota yakuweho, Aimable Twahirwa akamusaba imbabazi byarangira akanavanwa mu batanga amanota kugira ngo uyu mukobwa akomeze mu irushanwa nta cyo yikanga mu byamubangamira mu irushanwa.

Irushanwa rya PGGSS ku nshuro ya 5 ririmo Knowless, Bull Dogg, TNP, Active, Rafiki, Senderi Tuff Hit, Bruce Melody, Jules Sentore na Oda Paccy.

Knowless akinjira mu bahanzi 10 bahatanira iri rushanwa benshi bahise bemeza ko ari ku isonga mu bahabwa amahirwe yo kuzegukana miliyoni 24 za Bralirwa. Mu buryo butunguranye, igitaramo cya Rusizi nticyamuhiriye ahubwo abahanzi barimo Bruce Melody , Dream Boyz na Bull Dogg ni bo bagaragaje ko bayoboye abandi mu bafite abafana, igikundiro n’imbaraga zo kuba bakwegukana irushanwa.

Knowless asa nk’uwatangiye kugira igihunga ku bw’aba bahanzi bakeba be bamwerekeye i Rusizi ko agifite byinshi byo gukora. Bageze i Nyamagabe yarahanyanyaje ariko na bwo izina rye ntiriza mu bahanzi ba mbere bafite umurindi wo kwegukana irushanwa.

I Nyamagabe Bruce Melody, Senderi, Dream Boyz na Bull Dogg baje mu ba mbere bari bahagaze neza urebeye ku buryo abafana babakiriye. Ibi byose, hamwe n’ubwo burwayi bw’umuhogo, byaba byarahungabanyije Knowless agatangira kubona ko inzira ikiri ndende ngo azaze mu bakora ibinyura abafana ari nacyo kizagenderwaho mu kugena ukwiye igikombe.

Arashaka kugera ikirenge mu cya Urban Boyz

Safi, Nizzo na Humble Jizzo bagize Urban Boyz, bahawe amahirwe yo kwinjira muri 15 bagombaga kuririmba Live hagatoranywamo 10 barusha abandi. Habura iminsi mike ngo igitaramo cya Live kigere, aba basore batangaje ko bivanye mu irushanwa ngo kuko bashishoje neza basanga amafaranga Bralirwa itanga ari make. Biragoye kwemeza ko banze ubuke bw’amafaranga koko!

Nyuma byatangiye kuvugwa ko aba bahanzi bavuyemo batinya kuririmba Live ngo kuko barebaga abahanzi bari bahanganye na bo bagasanga bigoye kuba bazaririmba neza mu buryo bwa Live ku buryo akanama nkemurampaka kabinjiza mu icumi bahatanira PGGSS.

Bamaze gushya ubwoba bahise bavanamo akarenge baharira abiyizeye mu miririmbire. Nubwo nta gipimo kigaragaza ubuhanga mu miririmbire ya Live ya buri muhanzi mu Rwanda, niba koko Knowless yizeye ubuhanga bwe mu muziki, akaba afite igikundiro mu bafana, ntiyagakwiye kumanika amaboko ngo ave mu irushanwa.

Yari yakoze iyo bwabaga ariko ngo yabeshye akanama nkemurampaka
Izi ni Intwarane za Knowless ziba zaturutse i Kigali
Abo bose bari baturutse i Kigali baje kumushyigikira
Benshi mu baba bashyigikiye Knowless baba baturutse i Kigali

Twitter: KalindaBrendah


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .