Knowless na Fally Ipupa batumiwe mu gitaramo gikomeye i Kampala

Yanditswe na

Munyengabe Murungi Sabin

Kuya 24 Werurwe 2016 saa 09:47
Yasuwe :
0 0

Knowless yatoranyijwe mu bahanzi bakomeye bazitabira igitaramo cyigisha ubumwe no gusakaza amahoro ku Isi , kizabera mu Mujyi wa Kampala.

Iki gitaramo kidasanzwe cyateguwe n’umuryango udaharanira inyungu witwa ‘Peace One Day’ washinzwe mu 1999 na Jeremy Gilley uzwiho ubuhanga mu kuyobora no gutunganya film .

Jeremy Gilley yavuze ko iki gitaramo kidasanzwe kizabera i Kampala kuri Lugogo Cricked ku itariki ya 21 Nzeri 2016 kizahuriramo abahanzi b’ibihangange mu bihugu bitandukanye bya Afurika.

Mu bahanzi bategerejwe i Kampala harimo Knowless uhagarariye u Rwanda, Fally Ipupa uzaturuka muri Repubulika Iharanira Demokarasi ya Congo, Kidum ( Burundi), African Children’s Choir (Kenya), Cindy Sanyu na Maurice Kirya bo muri Uganda.

Jeremy Gilley yavuze ko batumiye abahanzi bakomeye mu Karere kugira ngo ijwi ryabo rizafashe uyu muryango kurusha gutanga ubutumwa ku mubare munini w’abantu.

Knowless yavuze ko ari ishema rikomeye kuba yaratoranyijwe mu bahanzi bagomba kuririmba hizihizwa Umunsi w’Amahoro ku Isi. Ngo bimuha ishusho y’uko umuziki we wakirwa hanze y’u Rwanda.

Knowless yatumiwe mu gitaramo cyo kwizihiza Umunsi w'Amahoro i Kampala

Ati “Navuganye n’ababiteguye, twaraganiriye ubu nditeguye neza nanjye ndi gushyiramo ingufu kugira ngo nzaserukire u Rwanda neza.”

Ateganya kuzagirana ibiganiro na Fally Ipupa bazaririmbana, ndetse ngo bishobotse yazagirana na we ubufatanye mu muziki.

Ati “Bizaba ari amahirwe kuko tuzaririmbana, nyuma nibigenda neza nshobora kuzashaka uburyo ngirana na we umubano tukareba ko hari ikintu twakorana […] Byose ndi kubitekerezaho.”

Mu muziki, Knowless ari gutegura amashusho y’indirimbo ye nshya ‘Ko Nashize’ cyo kimwe n’umushinga wa Album nshya ashaka kuzashyira hanze mu minsi iri imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .