Uwamahoro yashyize hanze imyambaro yihariye yo kurimba ku bari n’abategarugori mu birori n’ahandi (Amafoto)

Yanditswe na Uwiduhaye Theos
Kuya 29 Ukwakira 2020 saa 09:14
Yasuwe :
0 0

Inzu ihanga imideli ya Uwamahoro Joyce izwi nka Joyce Fashion Design , yashyize hanze imyambaro y’ab’igitsinagore igezweho ibafasha kuberwa muri iki gihe ndetse by’umwihariko umuntu akaba yayijyana mu biro, ibirori n’ahandi hiyubashye.

Iyi myambaro ya Uwamahoro yayise ‘Irebe Classy Collection’. Igizwe n’amakanzu, amasarubeti, amajipo ndetse n’amakoti; umuntu yarimbana.

Uwamahoro yabwiye IGIHE ko iyi myambaro mishya yashyize hanze yatekereje kuyikora kuko yashakaga gufasha abantu gukomeza kurimba n’ibikorerwa mu Rwanda, ikindi kintu avuga ni uko yashakaga gufasha abagore kuberwa cyane bagiye mu biro no mu zindi nama zikomeye zisaba kujyamo umuntu ukeye.

Ati “Ni imyambaro myiza natekereje gukora kugira ngo nibuke na ba bantu bahora mu biro, baba bakeneye gusa neza cyane. Nari maze igihe ntekereza imyambaro myiza nakora ku buryo buri wese yayisangamo yaba ugiye mu nama, mu birori bitandukanye n’ahandi hantu bisaba kujya umuntu by’umwihariko umugore, yarimbye.”

Mu gushyira hanze iyi myambaro ye, Uwamahoro yifashishije abakobwa batandukanye bitabiriye Miss Rwanda 2020, barimo Umutesi Denise wabaye Igisonga cya kabiri cya Miss Rwanda muri uyu mwaka.

Yifashishije kandi Irasubiza Alliance wabaye Nyampinga wakunzwe na benshi muri iri rushanwa, Umuratwa Anitha nawe wageze mu cyiciro cya nyuma cya Miss Rwanda 2020 ariko ntabashe kwegukana ikamba ndetse n’abandi.

Uwamahoro Joyce ni umwe mu bahanga imideli bahagaze neza muri iki gihe. Avuga ko n’ubwo atari yagera ku nzozi yari afite atangira gukora uyu mwuga, ubu ashima Imana mu buryo bukomeye.

Uyu mukobwa ubusanzwe ufite inzu ihanga imyambaro ya ‘Joyce Fashion Design’ avuga ko kugira ngo amenye kudoda byaturutse ku kuba yarakuze abona iwabo hari imashini zibikora, akagenda abyiga akiri muto kugeza ubwo yabaye mukuru akabikomeza.

Ati “Namenye ubwenge mbona mu rugo haba imashini idoda imyenda, igihe umwenda wacitse Mama wanjye yarawidoderaga ariko ntabwo yabikoraga nk’umwuga.”

“Kubera ko nakundaga kubona imashini iri aho nta kintu bari kuyikoresha, natangiye kujya nyifata nkiga kudoda gusa ntabwo nabikundaga cyane. Mu 2015 natangiye kwiga imashini neza ariko numvaga ntazabikora nk’umwuga, nkirangiza kwiga imashini nahise njya kwiga kaminuza.”

Mu 2017 nibwo yaje kubitangira kinyamwuga ariko biza kugenda biguru ntege kuko atari afite ubushobozi buhagije kandi anabifatanya n’amasomo ya Kaminuza. Nyuma yaje gushinga inzu ihanga imyambaro yise ‘Joyce Fashion Design’.

Afite intego yo gukomeza ‘ gukora neza no guhaza isoko ry’imyambaro mu Rwanda akagera no ku isoko mpuzamahanga’.

Uwamahoro afite amakanzu akoze mu buryo bwihariye
Irasubiza Alliance wabaye Miss Populality muri Miss Rwanda 2020 mu myambaro mishya ya Uwamahoro
Isarubeti umuntu ashobora kwambara mu gihe hari ubushyuhe haba hakonje akongeraho ikote
Iyi myambaro ikozwe mu buryo bunogeye ijisho
Iyi myambaro irimo amakanzu atandukanye
Iyi myambaro irimo amapantalo n'amakoti nayo meza cyane
Iyi myambaro ya Uwamahoro yayikoze muri gahunda yo gukomeza kongera ibikorerwa mu Rwanda ku isoko
Iyi myambaro yiswe Irebe Classy Collection
Iyi ni imwe mu makanzu ya Uwamahoro umuntu ashobora kwambara agiye mu birori nk'ubukwe n'ahandi
Iyi umuntu ashobora kuyambara akajya mu nama cyangwa ahandi hantu nko mu biro
Kety ukora ikiganiro Chapa Chapa gica ku Isibo Tv mu myambaro mishya yahanzwe na Joyce Fashion Design
Ni imyambaro umuntu ashobora kujyana ahantu hatandukanye ariko hiyubashye
Umuratwa Anitha mu ikanzu nshya iri mu myambaro yahanzwe na Uwamahoro
Umutesi Denise wabaye Igisonga cya kabiri cya Nyampinga w'u Rwanda 2020 mu mwambaro mushya wa Joyce Fashion Design
Umutesi Denise wabaye igisonga cya kabiri cya Miss Rwanda 2020 mu myambaro mishya ya Uwamahoro
Uwamahoro Joyce washinze Joyce Fashion House iri mu nzu zihanga imideli ziri kwitwara neza muri iki gihe
Uwamahoro avuga ko kuba yarakuze iwabo hari imashini idoda byatumye akunda imideli

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .