00:00:00 IGIHE NETWORK KN KINYARWANDA EN ENGLISH FR FRANCAIS

Inzu nshya z’imideli zitanga icyizere zashinzwe n’abagore mu Rwanda

Yanditswe na Nsengiyumva Emmy
Kuya 26 March 2022 saa 12:26
Yasuwe :

Kugeza ubu sindiyumvisha impamvu yatumaga abagore basigazwaga inyuma mu myaka ya kera, kuko urebye umurava n’ubuhanga bagaragaza, usanga Isi itari kuzatera imbere nk’uko biri iyo badatekerezwaho.

U Rwanda ni kimwe mu bihugu byashyize imbere guteza imbere umugore kuko rwabonye ko umusanzu wabo mu iterambere ukenewe kandi ufite agaciro.

Mu mpande zose abagore batanga umusaruro duhereye ku miyoborere y’igihugu. Mu Nteko Ishinga Amategeko harimo abagera kuri 61%, Sena ikagira 38%, Guverinoma ikabamo 50% mu gihe inzego z’ibanze zigomba kuba zigizwe na 30% by’abagore, nk’uko amategeko abivuga.

Si mu miyoborere gusa ahubwo mu nzego zose abagore bahawe umwanya nabo bagaragaza ibyo bashoboye. Uyu munsi turavuga ku ruhare rw’abagore mu iteranbere ry’imideli.

Abagore bagize uruhare runini haba mu kudoda, kumurika ndetse no gushinga inzu zigurushirizwamo ibyadozwe, aha niho dusangamo Sonia Mugabo umaze kwamamara ku ruhando mpuzamahanga, Haute Baso, Inzuki Designs, Seraphina, Sandy N.A, Uzi Collections, Uzuri K&Y, Ki-pepeo Kids clothing, Rwanda Clothing n’izindi zigenda zivuka umunsi ku wundi.

Aba ni abagore baguye uru ruganda bafungurira abandi amarembo, abakiri bato ntabwo babatengushye ahubwo barakoze ku buryo batanga icyizere cyo gutumbagiza uru ruganda rw’imideli.

Si ku bagore gusa ahubwo uruganda rw’imideli ruri kwaguka ku buryo bushimishije, IGIHE yabateguriye abagore bafite inzu z’imideli zitanga icyizere mu gukomeza gahunda ya Made in Rwanda.

Joyce Fashion

Abitabira ibirori by’imyidagaduro mu Rwanda bakunze kumva ibyamamare byabyitabiriye bivuga ko byambitswe na Joyce Fashion, cyane cyane abakobwa b’uburanga baciye muri Miss Rwanda.

Iyi nzu y’imideli yashinzwe na Uwamahoro Joyce, umwe mu bagore bahanga imideli batanga icyizere cyo kuzamura uru ruganda bitewe n’imyambaro ikundwa na benshi akora.

Uwamahoro mu kiganiro yigeze kugirana na IGIHE yavuze ko yisanze muri ibi nyuma y’uko yakuze iwabo ahabona imashini idoda agatangira kuyitoza akiri muto.

Uyu mukobwa akora imyambaro y’abagabo n’abagore yabitangiye bya kinyamwuga mu 2017 ariko biza kugenda biguruntege kuko atari afite ubushobozi buhagije kandi anabifatanya n’amasomo ya Kaminuza. Nyuma yaje gushinga iyi nzu ihanga imyambaro.

Imwe mu myambaro yakozwe na Joyce Fashion
Uwamahoro Joyce washinze Joyce Fashion amaze kubaka izina mu Rwanda

Berabose Designs

Hari ubwo duca mu bihe bigoye tugatangira kwinuba twibaza amaherezo yabyo gusa hari ubwo ingorane z’ubuzima zikugeza ku byiza, niko byagenze kuri Berabose Elisabeth wakorewe ivangura rikamuha imbaraga zo gushinga inzu y’imideli.

Berabose Elisabeth ni Umunyarwandakazi wakuriye mu bihugu bitandukanye byo mu Burengerazuba bw’Isi. Aho yakuriye yahuye n’ivangura ritandukanye bituma ashinga inzu y’imideli yise Berabose mu kugaragaza ko ashoboye.

Uyu mukobwa yavukiye mu Rwanda akurira mu Bubiligi, ariko yabaye mu bihugu birimo Espagne, Leta Zunze Ubumwe z’Amerika na Ghana. Ibi bihugu byose yabayemo yahuye n’ivangura rishingiye ku ruhu no ku gitsina, aho wasangaga bamubona nk’umuntu udafite icyo ashoboye.

Mu kiganiro IGIHE yagiranye na Berabose, yavuze ko ivangura yakorewe ryamuhaye imbaraga zo kugira icyo yakora cyerekana imbaraga ze.

Yagize ati "Nakuriye mu bihugu by’Uburengerazuba bw’Isi, nahuye n’ivangura rihagije rishingiye ku ruhu no ku gitsina. Sosiyete nari ndimo ntabwo yigeze impa imbaraga, ibi byatumye nshaka uburyo nakwigaragaza nkiha n’imbaraga. Nabigezeho rero binyuze mu mideli".

"Nashatse uko najya nambara bituma numva meze neza kandi nifitiye icyizere muri sosiyete. Maze kubibona nashatse kubyagura kugira ngo bigere no ku bandi bumve bashyigikiwe."

Muri Berabose Designs bakora imyambaro itandukanye haba iy’abagabo n’abagore bakaba bafite umwihariko w’uko umuntu ushaka kwambikwa na bo ajya aho bakorera, agahura n’abadozi ndetse n’ushinzwe ibihangano, bakaganira ubundi bakamukorera umwambaro umukwiriye yumva anyuzwe na wo.

Berabose akora iyi myambaro mu kugaragaza ko ashoboye
Imwe mu myambaro ikorwa na Berabose Designs

Kanyana World

Niba uri umukobwa w’i Kigali wibara mu basilimu ariko ukaba udafite kimono yo kwa Kanyana warasigaye ushatse urwo rutonde warwikuraho.

Izi kimono zikorerwa mu nzu y’imideli ya Kanyana World yashinzwe n’umukobwa waminuje mu ikoranabuhanga, Kanyana Nadine akaza kwigarurirwa n’imideli.

Kanyana ni umwe mu bahanzi b’imideli batanga icyizere binyuze mu myambaro akora. Ni urugero rwiza rwerekana ko Art-Rwanda, ari igikorwa kizateza imbere impano z’abana b’Abanyarwanda kuko yabashije gutsinda abona uko azamura ibikorwa bye.

Kanyana World ikorerwamo imyambaro itandukanye ikaba imaze kwamamara mu kwambika abanyacyubahiro barimo Minisitiri w’urubyiruko n’umuco, Mbabazi Rose Mary, Depite Nyirahirwa Veneranda, Maniriho Clarisse n’abandi barimo abanyamakuru n’abahanzi bakomeye.

Imyenda ikorwa na Kanyana ikunzwe n'abasilimu
Kimono zikorwa na Kanyana zikunzwe n'abanyakigali

Odileira Designs

Abafite ubukwe cyangwa ibirori bubashye bashaka kwitabira bambaye Made in Rwanda, biragoye ko bari bugire andi mahitamo bamaze kumenya Odileira designs.

Iyi ni imwe mu nzu z’imideli zikora imyambaro y’abantu batandukanye barimo abagore, abagabo n’abana mu buryo bugezweho kandi ubona bufite umwihariko.

Ni nzu yashinzwe na Iradukunda Odile wakuze abona nyina ari umudozi bigatuma akunda uyu mwuga cyane kugeza ashinze inzu y’imideli.

Uyu mukobwa waminuje mu Ibarurishamibare, yamamaye cyane mu gukora amakanzu y’abageni, iyo kujyana mu birori, kwambara bisanzwe n’indi.

Iradukunda usobanukiwe imyambaririre niwe watwaye igihembo cya Bianca Fashion Hub, ibirori byari byateguriwe abausha abandi kurimba.

Imwe mu myenda y'abaherekeza abageni yakozwe na Odile
Iradukunda Odile, umwe mu banyamideli u Rwanda ruhanze amaso
Odileira Designs niyo yambitse umunyamakuru Gasaro Tracy yasabwe

Zöi

Abakoresha imbuga nkoranyambaga cyane Instagram muzi itsinda rya Mackenzies ribarizwamo Miss Rwanda 2020 Nishimwe Naomie, ryamenyekanye mu gukora amashusho asubiramo indirimbo zitandukanye.

Ibi byatumye iri tsinda rimenyekana ritangira gukora ibikorwa bitandukanye byo kwamamaza cyane mu bijyanye n’imideli, nyuma yo kubona ko bamamaza imyambaro y’abandi ikagurwa nabo bahisemo gutangira gukora iyabo.

Muri ZöI hakorerwa imyenda itandukanye iy’abagabo, abagore n’abana usibye imyenda kandi bakora n’inkweto. Ibihakorerwa bitanga icyizere ku ruganda rw’imideli mu Rwanda.

Brenda wo muri Mackenzie mu mwambaro bakoze
Itsinda rya Mackenzies mu myambaro bakoze
Zoi itanga icyizere ko uruganda rw'imideli ruzakomeza kuzamuka mu Rwanda

RIN Collection

RIN Collection ni nzu y’imideli yashinzwe na Rutayisire Isabelle Noella, wamenyekanye ku mbuga nkoranyambaga nka Noella wa Rutayisire. Uyu mu kobwa wakoraga mu Murenge wa Remera mu Mujyi wa Kigali, mu 2019 ni bwo yafashe icyemezo cyo gusezera ku kazi, umwanya we munini awuharira ubucuruzi bw’imyenda.

Nyuma yo gushinga iduka ricuruza imyenda itandukanye agahirwa nabyo mu 2021 yagize igitekerezo cyo gutangira gukora imyenda ye ya Made in Rwanda kugira ngo agire uruhare mu bikorerwa mu gihugu.

RIN Collection ikora imyambaro y’abagore itandukanye wajyana mu birori, mu kazi n’ahandi hose ugiye ubonamo umwambaro ukubereye.

Rin Collection ikora imyambaro ikunzwe n'abanyamujyi
Rutayisire mu myambaro yakoze

Koni Clothing

Uruganda rw’imideli rwiganjemo abantu bafite imitekerereze itandukanye barangwa no guhanga udushya.

Inzu y’imideli ya Koni Clothing nayo ifite itandukaniro kuko ikora imyambaro itandukanye n’abandi.

Iyi nzu yashinzwe na Gikundiro Joyeuse, ahanga imyambaro itandukanye igezweho yifashishwa mu banyabirori no mu bindi bikorwa bitandukanye.

Uyu mukobwa wize ibijyanye no guhanga imideli i Accra muri Ghana afite umushinga wo gukora imyambaro mishya yifashishije ishaje, yise ‘sustainable fashion’.

Gikundiro afata imyenda ishaje akayihindura mu bundi buryo buryo ikambarwa
Imyambaro yakorewe muri Koni Clothings
Muri koni bakora imyambaro mu buryo butangaje iyari ishaje igahinduka mishya

Twinkle by Asty

Si ubwa mbere wumvise Twinkle by Asty mu matwi yawe kuko iyi nzu y’imideli yatangiye mu 2018 itangira yibanda ku myenda y’abageni.

Iyi nzu yashinzwe na Hitimana Astérie, uyu mukobwa aratanga icyizere cyo gukora imyambaro myiza y’abagore n’abagabo.

Nyuma y’igihe akora iy’abageni aheruka gukora imishya yise ‘unlimited Collection’ ikozwe mu bitambaro bigezweho.

Imyambaro ikorwa na Twinkle by Asty ikunzwe n'abatari bake kandi ikozwe mu buhanga buhambaye
Twinkle by Asty ikora imyambaro iri ku rwego mpuzamahanga
Twinkle by Asty yashinzwe na Hitimana Astérie (uhagaze)

Isha Collection

Isha Collection yashinzwe na Gatarayiha Angelique, iyi nzu si umwana mu ruganda rw’imideli ariko ibikorerwamo bitanga icyizere cy’uko mu minsi iri imbere nta muntu uzaba agitumiza mu mahanga imyenda yo gukora ubukwe.

Iyi nzu ikora imyenda y’abagore n’abagabo cyane cyane iyo kujya mu birori ndetse n’iy’abageni, imaze kumenyerwa mu gukora imyambaro gakondo y’Abanyarwanda imikenyero.

Isha Collection niyo yakoze imyambaro umugore wa Meddy yari yambaye mu gusabwa
Ish yambika ibyamamare bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .