00:00:00 IGIHE NETWORK KN KINYARWANDA EN ENGLISH FR FRANCAIS

Imyambaro ya Shema Charlotte yamuritswe mu birori by’imideli mu Budage (Amafoto

Yanditswe na Uwiduhaye Theos
Kuya 17 June 2022 saa 11:15
Yasuwe :

Imyambaro ya Shema Charlotte watangije inzu ihanga imideli ya ‘Touch of Rwanda Fashion Designs’ iri mu zihanga imideli z’abagore, yerekanwe mu birori by’imideli biri kubera mu Budage.

Ni mu birori yatumiwemo byo kumurika imideli byiswe “Bremen Fashion Days” bibera mu Mujyi wa Bremen mu Budage, bigiye kumara iminsi ine. Byatangiye guhera ku wa 14 kugeza ku wa 18 Kamena uyu mwaka.

Ibi birori bihuriza hamwe abamurika imideli batandukanye ndetse n’abayihanga barenga 60 biganjemo abo mu Budage.

Shema yerekanye imyambaro ya Made in Rwanda yakubiye muri ‘Collection’ yise Tururate Collection. Iyi myambaro irimo iy’abagore n’abagabo. Yabwiye IGIHE ko kuba imyambaro ye yerekanwe muri ibi birori ari ishema kuri we, kandi abantu benshi bayishimiye cyane.

Ati “Ni ishema kuri njye abantu bishimye. Nungutse nahuye n’abantu benshi kandi nziko hari ikintu gikomeye bigiye kongera mu iterambere ryanjye nk’umuhanzi w’imideli.”

Mu bo yabashije kuganira na bo harimo abahanga imideli batandukanye bagenzi be, abamurika imideli, abashoramari batandukanye by’umwihariko yabashije no kuganira na Minisitiri w’Ubukungu, Kristina Vogt uhagarariye Bremen muri Guverinoma y’u Budage n’abandi.

Shema mu minsi ishize yabwiye IGIHE ko yatumiwe muri ibi birori nyuma y’aho ababitegura bashimye imyambaro akora cyane ko ifite umwihariko wa ‘Made in Rwanda’. Niwe muhanzi w’imideli wo mu Rwanda watumiwemo.

Icyo gihe yagize ati “Babonye ibikorwa byanjye barabikunda, cyane ko badakunze gukorana n’abahanga imideli bo muri Afurika.”

Touch Of Rwanda Fashion Designs yatangijwe na Shema Charlotte ni imwe mu nzu zihanga imideli zatangijwe n’abagore mu Rwanda. Yatangijwe mu 2018, ikaba ikora imyambaro itandukanye irimo iy’abagore, abagabo ndetse n’abana.

Abantu bari bitabiriye ku bwinshi kureba imyambaro itandukanye yerekanwe muri ibi birori irimo n'iya Shema ukomoka mu Rwanda
Abanyamideli batandukanye batambutse bambaye imyambaro yahanzwe na Shema
Ibi biri byo kumurika imideli Shema yari yajyanye imyambaro yakoze byiswe “Bremen Fashion Days” bibera mu Mujyi wa Bremen mu Budage
Iki gikorwa kizarangira kuri uyu wa Gatandatu
Imyenda yahanzwe na Shema yerekanwe yari yiganjemo ikozwe mu bitenge
Ni ubwa mbere imyambaro ya Shema yerekanwe ku ruhando mpuzamahanga
Shema aganira na Minisitiri w'Ubukungu, Kristina Vogt uhagarariye Bremen muri Guverinoma y'u Budage
Shema ari kwambika abamurika imideli bambaye imyambaro yahanze
Shema asobanurira abantu izina ry'iyi myambaro ye
Shema ubanza iburyo ari kumwe na bagenzi be bahanga imideli nabo yerekanwe muri ibi birori
Shema yavuze ko kujya muri ibi birori yungukiyemo byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .