Ibyo wamenya ku myambaro Tanga-Ikamba Collection yaserukanywe n’abitabiriye Miss Rwanda 2021

Yanditswe na Mukahirwa Diane
Kuya 6 Mata 2021 saa 05:29
Yasuwe :
0 0

Tanga-Ikamba Collection ni imyambaro yagaragaye bwa mbere mu birori byo gutoranya nyampinga w’ u Rwanda 2021, iyi myambaro yuje ubwiza ikaba yarakozwe na Niyitanga Olivier washinze inzu ihanga imideli ya Tanga Designs.

Aya makanzu yasohokanywe bwa mbere na banyampinga b’u Rwanda adoze mu buryo butandukanye ariko ahuriye ku kuba yose atatswe n’amasaro akaba ari maremare ndetse afite pasura yo ku ruhande, amwe ariho amababa ku maboko .

Tanga-Ikamba Collection ni bumwe mu bwoko bw’imyambaro bwakozwe na Tanga Designs, akaba yarakozwe mu rwego rwo kwerekana ko buri wese aba akwiye intsinzi mu buzima.

Mu kiganiro yagiranye na IGIHE, Olivier Niyitanga, ukora iyi myambaro yavuze ko yahisemo kuyita Tanga-Ikamba Collection mu rwego rwo kwerekana ko buri wese ashobora kugera ku ntsinzi ayiharaniye.

Ati “Ikamba ni intsinzi ya buri wese, buri muntu wese yambaye ikamba ni uko igihe cye kitaragera.”

Aya makanzu agaragara bwa mbere mu birori byo gutoranya nyampinga w’u Rwanda 2021 yari yambawe na Miss Nishimwe Naomie wabaye Miss Rwanda 2020, Iradukunda Liliane wabaye Miss Rwanda 2018 na Iradukunda Elsa wabaye Nyampinga w’u Rwanda 2017.

Ndetse ni nayo yambawe na Miss Rwanda 2021 Ingabire Grace, Akaliza Amanda wabaye Igisonga cya Mbere ndetse na Umutoni Witness wabaye Igisonga cya Kabiri. Ni nayo Martina Abera ukorera KC2 wari mu bashyushyarugamba mu gutanga ikamba rya Miss Rwanda 2021 yari yambaye.

Iyi myambaro yaje ikurikira iyo yise ‘Ikamba Collection’. Avuga ko yagize igitekerezo cyayo mu bihe bya Miss Rwanda 2020. Ngo yayise gutyo kuko buri wese wahatanaga yari afite amahirwe yo gutsinda akegukana ikamba.

Niyitanga Olivier watangije iyi nzu, afite imyaka 25. Yavukiye mu Rwanda aba ari naho akurira. Yatangiye ibyo guhanga imideli nyuma yo gusoza amashuri yisumbuye.

Uyu musore yabitangije ari nko kwishimisha akajya afata umwanya munini ahanga imideli ndetse atangira no kujya yambika abantu.

Nyuma yaje kugenda yihugura kugeza ubwo yabonye ko byavamo umwuga wamutunga abitangira atyo, niko gushinga Tanga Designs.

Niyitanga amaze kwambika ibyamamare bitandukanye mu Rwanda no hanze yarwo ndetse ubwo Mr Eazi yakoreraga igitaramo mu Rwanda mu 2017 yari yambaye imyambaro ye.

Iyi myambaro yakozwe mu kugaragaza ko buri wese ashobora kugera ku ntsinzi ari igihe kiba kitaragera
Izi kanzu za Tanga Ikamba hari izikozwe ku buryo zifite amababa ku maboko
Nyampinga w'u Rwanda wa 2020, Nishimwe Naomie yaje gutanga ikamba yambaye ikanzu ya Tanga Ikamba Collection
Nyampinga wa 2019 Nimwiza Meghan akaba n'umuvugizi wa Miss Rwanda yaserutse yambaye Tanga Ikamba Collection
Nyampinga wa 2020 Nishimwe Naomie yambika ikamba uwa 2021 bose barinambaye Tanga Ikamba Collection
Nyampinga n'ibisonga bye baserutse mu makanzu yakozwe na Tanga design
Tanga Ikamba Collection irimbishijwe n amasaro ayitatse Amafoto Niyonzima Moses
Amakanzu ya Tanga Ikamba Collection yari yiganje mu birori byo gutoranya nyampinga w'u Rwanda 2021
Amwe mu makanzu ya Ikamba Collection yaherukaga gushyirwa hanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .