Abanyamideli bo mu Rwanda bazifashishwa mu kumenyekanisha imideli ya Afurika mu Buyapani

Yanditswe na Uwiduhaye Theos
Kuya 10 Mutarama 2019 saa 08:58
Yasuwe :
0 0

Imyiteguro y’ibirori ngarukamwaka byo kumurika imideli bizwi nka Kigali Fashion Week, igeze kure, aho bizabera mu Rwanda ndetse no mu Buyapani mu kiswe Tokyo Africa Collections.

Ku ikubitiro ibi birori by’imideli binyura benshi bizatangirira mu Rwanda muri Kamena 2019. Muri Kanama bizabera i Tokyo mu Buyapani bifite umwihariko wo kwitwa Tokyo Africa Collections, kubera ubufatanye bwavutse hagati y’abategura Kigali Fashion Week n’ikigo kimaze kwamamara mu Buyapani mu guteza imbere imideli cyitwa Tokyo Africa Collections.

Leo Sugo uyobora Tokyo Africa Collections, yitiriwe ibi birori aherutse gutangaza ko ari iby’agaciro kuba bagiye gufatanya na John Bunyeshuri utegura Kigali Fashion Week.

Ati “Kuva muri Gashyantare 2018 naza mu Rwanda, natangiye kugirana ibiganiro na John Bunyeshuri dushaka uburyo twamenyekanisha imideli yo muri Afurika mu Buyapani.”

Muri Nzeri no mu Ukwakira ibirori byo kumurika imideli bibera mu mahanga bizwi nka Kigali International Fashion Week, bizakomereza i New York muri Amerika n’i Montreal muri Canada.

Mu Ukuboza bikomereze muri Afurika y’Iburasirazuba muri Uganda na Kenya.

Abahanga imideli bo mu Rwanda bazitabira Tokyo Africa Collections barimo; Sandrine Murorunkwere ufite inzu ihanga imideli ya Sahorn Fashion House, Umurerwa Josette ufite iyitwa Yosette Fashion house, Karen Uwera ufite inzu y’imideli ya KARSSH collection, Degracious Adroni ufite Radious Clothing Co na Doreen Umwali uzaba ahagarariye D’zoyah creations.

Aba bahanzi b’imideli batanu bo mu Rwanda baziyongeraho abandi b’abanyamahanga 15 bazaba baturutse mu bihugu bitandukanye.

Mu berekana imideli bazitabira Tokyo Africa Collections na Kigali International Fashion Week, ni Sisi Uwera Laetitia Ngamije wo mu Rwanda, Bella Christa Kanyange na Kaneza Lynka Amanda bo mu Burundi.

Mukeshimana Divine ushinzwe itangazamakuru mu Kigali Fashion Week, yabwiye IGIHE ko bishimira intambwe iki gikorwa kimaze gutera ndetse by’umwihariko uyu mwaka bakaba bishimira uko Tokyo Africa yabiyunzeho bakaba bazafatanya.

Yakomeje avuga ko ari ubwa mbere muri ibi birori bagiye gukoresha abanyamideli babigize umwuga gusa nta bandi bivanzemo.

Ati “Impamvu twahisemo gukorana n’aba babigigize umwuga ni uko baba barakoze cyane ku buryo izina ryabo riba ryaragutse ndetse n’amafoto yabo azwi cyane hanze kubera imikorere yabo.”

Kuva mu 2017, ibirori ngarukamwaka bya Kigali Fashion Week byagejejwe ku yindi ntera n’ababitegura bitangira kubera i Burayi nyuma y’imyaka irindwi bibera mu Rwanda gusa.

Icyo gihe ku ikubitiro byatangiriye i Berlin mu Budage, bikomereza i Amsterdam mu Buholandi,hanyuma bisorezwa i Bruxelles mu Bubiligi.

Sisi Ngamije yagiye yitabira ibitaramo bitandukanye byo kumurika imideli mu Rwanda no hanze yarwo
Sisi Uwera Laetitia Ngamije amaze igihe kinini akora ibijyanye no kwerekana imideli
Sisi Ngamije nawe ari mu banyamideli bazifashishwa mu Kigali International Fashion Week 2019
Aha ni umwaka ushize ubwo Kaneza Lynka yari ari mu itangwa ry'ibihembo bya Abryanz Style and Fashion Awards
Christa Bella Kanyange yihebeye ibyo kumurika imideli
Christa Bella Kanyange ari mu banyamideli babigize umwuga bamaze gukomera mu karere ka Afurika y'Iburasirazuba
Ingengabihe ya Kigali Fashion Week mu 2019
John Bunyeshuri watangije Kigali Fashion Week
Kaneza afite izina rikomeye mu ruhando rw'abamurika imideli
Kaneza amaze igihe kinini mu byo kumurika imideli ndetse yigeze kwambikwa ikamba rya Rwanda Super Model
Kaneza Lynka Amanda nawe azifashishwa muri Kigali International Fashion Week 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza