00:00:00 IGIHE NETWORK KN KINYARWANDA EN ENGLISH FR FRANCAIS

Rubavu yongeye gushimangira ko ari umujyi w’ibirori (Amafoto)

Yanditswe na Akayezu Jean de Dieu
Kuya 1 Mutarama 2023 saa 04:10
Yasuwe :

Abanya-Rubavu n’abaturutse hirya no hino mu gihugu basoreje umwaka wa 2022 muri uyu mujyi uzwiho kwizihira abanyabirori, basenderejwe ibyishimo n’abahanzi barimo Kenny Sol, Bull Dog na Ariel Wayz.

Ni mu gitaramo cyiswe ’Erica’s Gisenyi Festival’ cyabereye muri Stade Umuganda, cyinjiza abacyitabiriye mu mwaka mushya wa 2023.

Ni ku nshuro ya mbere igitaramo gikomeye nk’iki kibereye i Rubavu giteguwe n’umuntu waho, Eric Hagenimana, ufite ibikorwa by’ubucuruzi by’utubari, amahoteli n’ibindi.

Iki gitaramo cyayobowe n’umunyamakuru Nzeyimana Luckman kandi cyaririmbyemo Orchestre Impala, Senderi Hit, The Same, Calvin Mbanda, Pacifica na Young Grace.

Imvura ntiyabakanze

Iki gitaramo cyagiye gikomwa mu nkokora n’ikirere kitari kimeze neza, kuko kuva ku manywa yagiye ishaka kugwa.

Ni ibintu byakomeje kugenda gutyo kugeza mu ma saa mbili z’ijoro igitaramo cyamaze gutangira, imvura iragwa, yahita abantu bagakomeza kubyina.

Ubwo umuhanzi Eric Senderi ari na we wabimburiye abandi ku rubyiniro yari amaze kuririmba indirimbo ze zigera mu munani, imvura yaje kwiyongera cyane.

Abitabiriye iki kigaramo bagiye kugama aho abafana bicara iyo barimo kureba umupira, ndetse nyuma y’iminota nka 40 imvura iza guhita, basubira mu kibuga barabyina karahava.

Nyuma y’iyo mvura, Orchestre Impala de Kigali zahise zijya kurubyiniro zisusurutsa abantu mu ndirimbo zirimo ’Bonane’ (Bonne Annee) n’izindi.

Iki gitaramo cyarangiye saa munani z’urukerera gishyizweho akadomo n’umuhanzi Rusanganwa Norbert wamamaye mu muziki nka Kenny Sol. Kugeza icyo gihe wabonaga abantu bakinyotewe kubyina ndetse ibyishimo byabasendereye.

Kuva kuri Senderi Hit wabimburiye abandi ku rubyiniro, abafana bari bafite imbaraga bamufasha kuririmba no kubyina, birekuye nk’abantu bagiye gusoza umwaka.

Yaririmbye indirimbo zirimo Nzabivuga, Abasore bariho, Iyo twicaranye, Nta mpamvu, Convention yahuriyemo na Bruce Melodie n’izindi.

The Same nk’abahanzi bari iwabo mu rugo, bafatanyije n’abafana bari benshi mu ndirimbo zirimo Yumvirize, Paka, Dede n’izindi.

Aba basore babiri Imanizabayo Jean Marie Vianney uzwi nka J.Fary na Munyagisenyi Serge na we uzwi nka Jay Luv, bombi bakaba bakomoka mu karere ka Rubavu ari naho bakorera ibikorwa byabo bya muzika.

Beretswe urukundo nk’abana bari bari iwabo ndetse kuva bagera ku rubyiniro bahise babwira abafana bati "tubikore?", mu rwego rwo kubabwira bati "mureke twereke abahanzi bavuye ahandi ko dufitiye urukundo ibyacu".

Ni ibintu abafana bubahirije koko bafatanyaga nabo kubyina indirimbo zabo.

Undi muhanzi werekanye ko akunzwe cyane i Rubavu ni Kenny Sol wari watumiwe nk’umuhanzi mukuru muri iki gitaramo cya ’Erica’s Gisenyi Festival’.Yerekanye ko ari umuhanzi umaze guhamya igikundiro afitiwe n’Abanyarwanda b’ingeri zose.

Urubyiruko rwagaragaje ko rukunda indirimbo ze, abakuze nabo nticikanwe kuko nabo bawucinye akabeho kari kari muri Stade Umuganda barakirukana.

Kenny Sol uherutse guhabwa igihembo cy’umuhanzi w’umwaka mu bitangwa muri Kiss Summer Awards, yaririmbye indirimbo ze zikunzwe zose abafana bafatanya na we kuziririmba ari nako bakoma akaruru ko kumwereka ko bamwishimiye.

Ni umuhanzi wongeye gushimangira ko umwaka wa 2023 ari umwe mu bo kwitega ndetse mu bashobora kuzaba bayoboye ikibuga cya muzika y’i Kigali.

Iki gitaramo byatangajwe ko kibaye ku nshuro ya mbere ariko hari gahunda ihamye y’uko kizajya kiba buri mwaka, kugira ngo abatuye i Rubavu n’abakunda kujya kuhidagadurira bajye babasha kubona ibitaramo binini bibafasha kwishima.

Ni igitaramo kandi kizajya gitumirwamo abahanzi bakomeye ndetse bakunzwe muri uwo mwaka mu Rwanda, ariko ab’i Rubavu n’abahakomoka bagahabwa umwihariko.

Iki gitaramo cyitabiriwe n'abantu b'ingeri zitandukanye
Abadaherukana babonye n'umwanya wo kuganira
Senderi Hit yabimburiye abandi bahanzi ku rubyiniro
Urubyiruko rwizihiwe biratinda
Ibyishimo byari hejuru cyane mu bafana
Orchestre Impala de Kigali yakumbuje benshi umuziki wo hambere
Bamwe bageze aho baganzwa na manyinya
Phil Peter yaririmbye indirimbo ze zikunzwe na benshi
Bull Dogg yashimishije abakunzi b'injyana ya Rap
Ariel Wayz yishimiwe cyane n'abafana bari bakoraniye muri Stade Umuganda

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .