Griezmann yibasiwe azira kwisiga irangi ry’umukara ngo agaragare nk’umwirabura

Yanditswe na Dusabimana Aimable
Kuya 18 Ukuboza 2017 saa 06:57
Yasuwe :
0 1

Rutahizamu wa Atlético Madrid yo muri Espagne n’Ikipe y’Igihugu y’u Bufaransa, Antoine Griezmann, yibasiwe bikomeye nyuma yo gusohora ifoto n’amashusho amugaragaza yisize irangi ry’umukara umubiri wose mu kugerageza kwigira nk’umwirabura wakinaga muri NBA mu myaka ya za 80.

Uyu rutahizamu asanzwe azwi nk’umwe mu bakomeye bakomoka mu Bufaransa ndetse yabufashije bikomeye mu guhatanira igikombe cya Euro 2016 bwakiriye bugatsindwa mu buryo bwatunguranye na Portugal ku mukino wa nyuma. Yahembwe urukweto rwa zahabu abikesha gusoza iryo rushanwa ahiga abandi mu kwinjiza ibitego byinshi ndetse bituma ashyirwa mu bahataniye Ballon d’Or muri uwo mwaka.

Griezmann yokejwe igitutu n’abakoresha urubuga rwa Twitter bitewe n’ifoto n’amashusho yashyize ahagaragara yisize irangi ry’umukara ku mubiri wose ndetse yambaye umwambaro uranga ikipe ya Harlem Globetrotters.

Iyo foto yari yanditseho ati "Ikirori cyo muri za 80," akayiherekeza akamenyetso k’umupira wa Basketball n’akandi kagaragaza gukwenkwenuka, yamukururiye gutukwa no kwibasirwa bikomeye aho bamwe bamushinje gukora igikorwa cyagaragara nk’irondaruhu, hari n’abamusabiye kwirukanwa mu ikipe akinamo cyangwa agafatirwa ibihano bikarishye.

Uyu mukinnyi uri mu bahenze muri Atlético Madrid yihutiye gusiba ifoto n’amashusho yari yifashe asaba abamuvuze nabi gutuza kuko akunda iyo kipe kandi yabikoze "mu buryo bwo kuyiha icyubahiro."

Mu butumwa bwa gatatu, yandikiye abantu miliyoni 4.79 bamukurikira kuri Twitter, Griezmann yiseguye ku bo yari yasabye gutuza agira ati "Nabonye ko ibi bitari byiza ku bandi ku ruhande rwanjye. Niba hari abantu bamwe nabangamiye ndasaba imbabazi."

Griezmann yabaye umuntu wa kabiri wibasiwe mu cyumweru kimwe azira kwisiga irangi ry’umukara nyuma y’umugabo uzwi cyane mu rusimbi rwo gushetera amakipe wabikoze agerageza kwigaragaza nk’umudepite wo mu Bwongereza witwa David Lammy.

Uyu mudepite na we ari mu banenze Griezmann avuga ko hari uburyo bwinshi bwo kwigaragaza nk’umunyabirori wo mu myaka ya za 80 nk’uko yari yabyanditse ku ifoto yatumye yibasirwa. Lammy yavuze ko atiyumvisha uburyo hari abagiye gusohoka mu mwaka wa 2017 bafite imyumvire yo kwisiga irangi ry’umukara ngo bigane uko abirabura basa.

Griezmann w’imyaka 26 wibasiwe ashinjwa irondaruhu kubera kwisiga irangi ry’umukara ngo agaragare nk’umwirabura, byaherukaga kuvugwa ko ashobora kwerekeza muri FC Barcelona aguzwe miliyoni $150 ndetse ngo mu makipe akomeye yifuza kumugura harimo na Manchester United yo mu Bwongereza.

Ifoto yatumye Griezmann yibasirwa kuri Twitter
Griezmann yashinjwe irondaruhu kubera ibyo yakoze
Uyu rutahizamu wa Athletico Madrid yibasiwe
Griezmann ni umwe mu bakinnyi Athletico Madrid igenderaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza