Awilo Longomba yanyuze abitabiriye igitaramo cya Kigali Jazz Junction (Amafoto)

Yanditswe na Uwiduhaye Theos
Kuya 26 Ukwakira 2019 saa 11:54
Yasuwe :
0 0

Awilo Longomba wubatse amateka mu muziki wo muri Repubulika Iharanira Demokarasi ya Congo, RDC, Mani Martin na Ange Rita Kagaju bashimishije benshi mu gitaramo cya Kigali Jazz Junction.

Ni igitaramo cyabaye kuri uyu wa Gatanu tariki 25 Ukwakira 2019 cyitabiriwe n’ab’ingeri zitandukanye bakunda umuziki w’aba bahanzi bagombaga kukiririmbamo.

Ku rubyiniro habanje itsinda rya Neptunez Band ryabanje gushyushya abitabiriye igitaramo, mu bihangano bitandukanye by’abandi bahanzi ryagiye risubiramo.

Ryakurikiwe na Ange Rita Kagaju waririmbye zimwe mu ndirimbo ze zirimo ‘No Offense’, ‘Jamaa’ n’izindi, yishimirwa na benshi.

Ugereranyije n’uko bwari ubwa mbere uyu muhanzikazi agiye imbere y’imbaga aririmba ibihangano bye, wabonaga ari umwe mu batanga icyizere cyo kuzageza kure umuziki w’ab’igitsina gore bakomoka mu Rwanda.

Yakurikiwe na Mani Martin uri mu bahanzi b’abahanga mu kuririmba umuziki w’umwimerere. Yaserutse aherekejwe n’itsinda ry’abasore n’inkumi bamufashaga kugorora ijwi, ashimisha benshi.

Nyuma haje Awilo Longomba wari utegerejwe na benshi, bakimuhamagara abantu hafi ya bose bahita bahagurukira rimwe. Yazanye n’ababyinnyi bane b’abakobwa, babyinaga bikaryohera abatari bake.

Uyu muhanzi yaririmbye indirimbo zirimo “Cache Cache”, “Karolina”, “Rosarina”, “Banana”, “Bibala bala”, “Trop parler c’est maladie”, “Fifi” n’izindi nyinshi.

Uko yasozaga kuririmba yagarazaga ko yishimiye kuririmbira mu Rwanda, akavuga ko akunda u Rwanda n’abarutuye, agahita akubitamo umuziki akawucinya afatanyije n’ababyinnyi be.

Awilo Longomba yabaye umucuranzi uvuza ingoma mu matsinda atandukanye nka Viva la Musica, Stukas, Nouvelle Generation na Loketo.

Mu 1995 yahise ava mu byo kuvuza ingoma atangira kuririmba ndetse ashyira hanze album ye ya mbere yise ‘Moto Pamba’, ku bufasha bw’abarimo Shimita, Ballou Canta, Dindo Yogo, Dally Kimoko, Sam Mangwana, Syran Mbenza na Rigo Star.

Mu 1998 yahise akora iyo yise ‘Coupé Bibamba’ yatumye amenyekana mu buryo bukomeye mu bihugu bitandukanye muri Afurika, i Burayi na Amerika.

Iyi yakurikiwe n’iyo yise ‘Kafou Kafou’ yagiye hanze mu 2001 ndetse na ‘Mondongo’ yakoze mu 2004.

Mu 2008 Awilo Longomba yashyize hanze album ye nshya yise ‘Super Man’ nayo yakunzwe mu buryo bukomeye. Uyu muhanzi yanakunzwe mu bihugu nka Leta Zunze Ubumwe za Amerika ndetse na Canada ubwo yari mu bitaramo bihazenguruka afatanyije na Nabtry International Cultural Dancers.

Ibi bitaramo byari bigamije kumenyekanisha iyi album ‘Super Man’ byasize yirahirwa mu 2008 na 2009, aza no kwegukana igihembo muri International Reggae and World Music nyuma y’itora ryakozwe mu bihugu 120, ahabwa igihembo cya ‘Best Soukous Entertainer Award 2009’.

Awilo yanakoranye indirimbo n’abahanzi batandukanye barimo itsinda rya P Square , Tiwa Savage, Olamide na Yemi Alade, bituma abo mu gisekuru cy’ubu nabo bamwiyumvamo.

Uyu muhanzi ubu aba mu Mujyi wa Londres mu Bwongereza, aho abana n’umugore we Paradis Kacharelle banafitanye umwana bise Lovy Believe Church Awilo Longomba.

Awilo Longomba avuka mu muryango utari agafu k’imvugwa rimwe mu muziki cyane ko se Victor Longomba ari we washinze itsinda ry’abanyamuziki ryitwa T.P OK Jazz ryamamaye cyane, na mukuru we witwa Lovy Longomba ni umwe mu bari bakomeye mu muziki mu itsinda yabanagamo n’umuvandimwe we Christian Longomba ryitwaga Longombas ryakoreraga umuziki muri Kenya.

Igitaramo yari yatumiwemo mu Rwanda kirangiye abategura igitaramo cya Kigali Jazz Junction batangaje ko Jidenna ariwe muhanzi utegerejwe mu Rwanda ubutaha.

Ababyinnyi ba Awilo Longomba bari babukereye
Ni igitaramo cyitabiriwe ku bwinshi
Ange Rita Kagaju yishimiwe muri iki gitaramo mu ndirimbo ze zitandukanye
Awilo Longomba ni umwe mu bahanzi bafite izina rikomeye muri Afurika
Awilo Longomba yaririmbaga akanyuzamo akavuga ko akunda u Rwanda n'abarutuye
Ababyinnyi bakoze ibishoboka ngo bashimishe abitabiriye iki gitaramo
Bill Ruzima ari mu bafashije Mani Martin ku rubyiniro
Dj Bissoso yaryohewe n'igitaramo
Dj Marnaud ni umwe mu bitabiriye iki gitaramo
Mani Martin yaririmbye indirimbo ze zitandukanye
Mani Martin yageze aho akuramo ikote ry'imbeho yari yambaye
Ni ubwa mbere Awilo Longomba yari ataramiye mu Rwanda
Nirere Shanel uri mu bahanzi bubatse izina mu muziki nyarwanda yari muri iki gitaramo
Patricia Garuka ukora muri BRALIRWA yishimiye iki gitaramo
Peace Hoziana witabiriye East Africa's Got Talent ari mu bafashije Mani Martin ku rubyiniro
Umutoni Uwase Belinda witabiriye Miss Rwanda 2017 yari muri iki gitaramo afite akanyamuneza
Uyu muhanzi yabyinaga umuziki mu buryo bukomeye
Uyu muhanzi yafatanyaga n'ababyinnyi gushimisha abitabiriye iki gitaramo
Kagaju ari mu bahanzi batanga icyizere mu muziki nyarwanda
Uyu mukobwa uri mu bagize Neptunez Band afite ijwi ryanyuze benshi

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza