Amafoto utabonye y’ubukwe bwa Malaika Uwamahoro n’umukunzi we (Amafoto)

Yanditswe na Uwiduhaye Theos
Kuya 9 Nzeri 2020 saa 09:10
Yasuwe :
0 0

Muri Bibiliya Yera mu gitabo cy’Itangiriro 2:24, hagira hati “Ni cyo gituma umugabo azasiga se na nyina akabana n’umugore we akaramata, bakaba umuntu umwe”. Iri niryo sezerano ryahamijwe hagati ya Angel [Malaika] Uwamahoro, wamamaye cyane mu mivugo no gukina ikinamico na filime ndetse n’umukunzi we Christian Kayiteshonga.

Uyu Munyarwandakazi uba muri Leta Zunze Ubumwe za Amerika, yasezeranye kubana akaramata n’umukunzi we usanzwe ari umufotozi ku wa Gatandatu tariki 05 Nzeri 2020.

Ni mu birori byabereye mu Mujyi wa Boston muri Leta Zunze Ubumwe za Amerika, aho aba bombi babarizwa. Byari byabanjirijwe n’umuhango wo gusezerana imbere y’amategeko hagati y’aba bombi, byabaye ku wa 20 Kanama 2020, nawo wari wabereye muri uwo mujyi.

Byitabiriwe na benshi bamamaye cyane mu myidagaduro mu Rwanda ariko baba muri Amerika, nka Muhire William [K 8 Kavuyo], Miss Aurore Kayibanda n’umugabo we, Nsengiyumva Emmanuel wamamaye mu muziki nka Emmy n’abandi.

Ku munsi wakurikiye umunsi w’ubukwe bwabo, uyu mukobwa yerekanye amashusho y’umugabo we aha ikaze nyina witabiriye ubukwe bwabo.

Nyuma yo gusezerana imbere y’amategeko, bombi mu butumwa basakaje bifashishije imbuga nkoranyambaga, bagaragaje akanyamuneza.

Nka Christian Kayiteshonga, yaranditse ati “Byose ni umugisha ndetse dukomeje guhamya, gahunda y’Imana. Mwirebere umugore wanjye w’igikundiro.”

Naho mu butumwa burebure Uwamahoro we yanditse, yabanje kugaragaza ko mu mazina ye yongeyeho iry’umugabo we, Kayiteshonga, arangije ati “Bagore namwe bagabo izina ryanjye rishya ni umuvugo wose.”

Arangije yavuze imyato umugabo we, amugaragaza ko yamwigishije uko bakunda akamwereka urukundo rusendereye. Akirinda kumubabaza ari na kimwe mu byatumye umutima we uhurwa abandi basore bose.

Avuga ko umugabo we ari impano Imana yamuhaye agomba kwishimana nayo kugeza ku ndunduro y’ubuzima bwe. Uwamahoro na Kayiteshonga bari bamaze imyaka myinshi bagaragaza urukundo bafitanye by’umwihariko ku mbuga nkoranyambaga.

Uwamahoro yamenyekanye bitewe n’imivugo irimo ubuhanga bukomeye yagiye atambutsa mu mihango ikomeye, yabaga yitabiriwe n’abanyacyubahiro bakomeye mu Rwanda.

Ni umukinnyi w’ikinamico uri ku rwego rwo hejuru kuko yanabashije kugira uruhare, mu mukino witwa Miracle in Rwanda werekaniwe i New York.

Malaika afite n’impano yo gukina filime aho yakinnye mu yitwa Notre Dame du Nil yaturutse ku gitabo cya Mukasonga Scholastique. Azi no kuririmba cyane ko DJ Marnaud aherutse kumwifashisha mu ndirimbo aherutse gushyira hanze yise ‘Reka Turye Show’.

Kayiteshonga wasezeranye na Uwamahoro nawe ni umusore usanzwe utuye muri Leta Zunze Ubumwe za Amerika, benshi bamuzi nk’umuhanga mu bijyanye no gufata amafoto n’amashusho mu birori n’imihango itandukanye ikomeye.

Benshi bamenyekanye cyane mu myidagaduro mu Rwanda bari batashye ubu bukwe
Ibyishimo byari byose kuri uyu mukobwa wamamaye kubera kuvuga imivugo no gukina filime
Inshuti zari zishimiye ibi birori
K8 Kavuyo n'umugabo wa Aurore Kayibanda, Mbabazi Egide nawe usanzwe ari umufotozi bari batashye ubu bukwe bw'inshuti zabo
Malaika n'umugabo bari baserutse bambaye gutya ku munsi w'ubukwe bwabo
Miss Aurore Kayibanda ari mu bari bitabiriye ubu bukwe
Umufotozi Christian Kayiteshonga warushinze na Malaika, aganira na Emmy wari umwe mu batashye ubukwe bwabo
Umuhanzi Emmy ari mu bari bitabiriye ubukwe bwa Malaika na Christian
Uyu mukobwa mu butumwa yatanze ubwo yasezeranaga n'umugabo we mu mategeko yavuze ko kuva bahura aribwo yatangiye gusogongera ku cyanga cy'urukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .