Umurinzi wa Bobi Wine yafunguwe

Yanditswe na Uwiduhaye Theos
Kuya 17 Ukwakira 2018 saa 11:35
Yasuwe :
0 0

Eddward Ssebuufu, umurinzi wa Bobi Wine wari umaze iminsi 52 muri gereza yafunguwe.

Uyu murinzi ubusanzwe uzwi nka Eddie Mutwe warindaga mu buryo bwihariye Depite Kyagulanyi [Bobi Wine], yaburiwe irengero ku wa 25 Kanama 2018, biza kumenyekana ko yatawe muri yombi.

Kuri uyu wa kabiri urukiko rwisumbuye rwa Gulu rwanzuye kumufungura by’agateganyo we na mugenzi we Musa Ssenyange bahuje icyaha cyo kugambanira ubutegetsi bwa Museveni no guteza imvururu.

Eddie Mutwe yategetswe kuzongera kwitaba urukiko rwa Gulu ku wa 3 Ukuboza.

Urukiko rumaze kwanzura ifungurwa rye ry’agateganyo yahise asubirana i Kampala n’inshuti ze magara zari zaje kumva urubanza zirimo na Bobi Wine.

Daily Monitor yatangaje ko Eddie Mutwe akiva muri gereza yatangaje ko atazigera ahagarara kurwanira ubwisanzure.

Ati ”Ibyabaye byose byari ukugira ngo duhagarikwe ku nzira twatangiye yo gushaka ubwisanzure. Nk’indwanyi y’ubwisanzure nzakomeza guhatana mpereye aho bamfunze ngeze.”

Mutwe yari yatawe muri yombi n’inzego z’ubutasi ariko zikabihakana.

Icyo gihe Polisi n’igisirikare nabyo byahakanye ifatwa rye, izi nzego zikavuga ko nta kanunu k’aho yarengeye zizi.

Byageze aho kubera igitutu cy’ubutabera bwa Uganda igisirikare cyemera ko kimufite ndetse kimushinja ko yafatanyije n’umukoresha we Bobi Wine mu byaha yakoze byo kugambanira ubutegetsi.

Uwamwunganiraga, Anthony Kusingura yamaze iminsi asaba ubutabera ko bwategeka Urwego rw’Ubutasi bwa Gisirikare bwa Uganda [CMI] kurekura umukiliya we kuko ari umwere, biza gushyirwa mu ngiro mu ntangiro z’iki cyumweru.

Eddie Mutwe yavuze ko agiye gukaza umurego mu kurwanira ukwishyira ukizana muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza