Ubutabera bwokeje igitutu igisirikare gishinjwa gushimuta umurinzi wa Bobi Wine

Yanditswe na IGIHE
Kuya 30 Kanama 2018 saa 04:15
Yasuwe :
0 0

Eddy Ssebuufu, umurinzi wa Bobi Wine agiye kumara icyumweru aburiwe irengero, igisirikare n’ Urwego rw’Ubutasi rwa Uganda (CMI) bashinjwa gushimuta uyu mugabo azira akamama.

Umuryango wa Ssebuufu ushimangira ko uyu murinzi wa Bobi Wine yashimuswe ku wa Gatanu tariki ya 24 Kanama 2018. Abamutwaye bivugwa ko ari abasirikare bo mutwe ushinzwe iperereza, yafatiwe ahitwa Red Pocket Pub mu Mujyi wa Kampala.

Inzego zishinzwe umutekano haba igisirikare na Polisi zahakanye ibi birego.

Capital FM yasohoye inkuru ivuga ko Urukiko Rukuru rwa Kampala rwategetse Gen.David Muhoozi, umuhungu wa Museveni akaba n’Umugaba w’Ingabo ndetse na CMI ko “bagomba kurekura nta mananiza umurinzi wa Bobi Wine uzwi nka Eddie Mutwe”.

Umucamanza w’uru rukiko, Musa Sekaana yavuze ko Eddy Ssebuufu akwiye kurekurwa nyuma y’uko bimenyekanye ko yafunzwe mu buryo butemewe n’urwego rw’ubutasi rwa Uganda hakiyongeraho ko ’nta dosiye y’ibyaha ashinjwa yakozwe’.

Umuryango wa Mutwe urahangayitse nyuma y’iminsi itandatu ishize aburiwe irengero mu buryo bwateye urujijo. Bageje ikibazo mu nzego z’umutekano ariko ntibabona ubufasha, kuva ku munsi wa mbere igisirikare cyahakanye ibyo gishinjwa nyamara ababonye Eddie Mutwe atwarwa bagashimangira ko ari CMI yamujyanye.

Uyu mugabo ubusanzwe benshi bazi nka Eddy Mutwe ngo akimara gufatwa yinjijwe mu modoka yari hafi aho itegereje ihita igenda. Kuva icyo gihe kugeza ubu, nta muntu n’umwe uzi akanunu ku irengero rya Mutwe ndetse na telefone ze zigendanwa nta n’imwe iri ku murongo.

Iyi CMI ni nayo yashinjwe inshuro zitabarika ko iri inyuma y’ubushimusi n’iyicarubozo rikorerwa Abanyarwanda muri Uganda, ibi nabyo yagiye ibihakana.

Eddy Mutwe yari yaherekeje Bobi Wine muri Arua ku itariki ya 13 Kanama 2018 ari nabwo habereye imyigaragambyo yasojwe no gufungwa kw’uyu mudepite na bagenzi be biganjemo abatavuga rumwe n’ubutegetsi bwa Perezida Museveni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza