00:00:00 IGIHE NETWORK KN KINYARWANDA EN ENGLISH FR FRANCAIS

Ibitavuzwe ku gitaramo cyatumiwemo Rose Muhando; umwe yatawe muri yombi

Yanditswe na Ntabareshya Jean de Dieu, Nsengiyumva Emmy
Kuya 7 March 2022 saa 03:45
Yasuwe :

Imwe mu nkuru zishyushye mu Mujyi wa Kigali ku bijyanye n’imyidagaduro, ni igitaramo cya ‘Rwanda Gospel Stars Live’ cyari cyatumiwemo Rose Muhando ariko cyasize inkuru mu bakunzi b’umuziki wo kuramya no guhimbaza Imana.

Iki gitaramo byari byitezwe ko gitangira saa kumi n’imwe z’umugoroba cyatangiye hafi saa mbiri n’igice z’ijoro.

Abahanzi bose bari bahuriye mu gikorwa cya Rwanda Gospel Stars Live uvanyemo Tonzi wari wikuyemo hakiri kare ni bo byari byitezwe ko baririmba.

Gusa bose ntabwo babashije kuririmba bitewe n’amasaha ndetse hari n’aho cyageze kirahagarara bitewe n’igisa n’imyigaragambyo yakibayemo abacuranzi bakanga gukomeza akazi.

Gutinda kw’igitaramo kwatewe n’iki?

Nubwo atari igitaramo cyari cyitabiriwe n’abantu benshi, na bake babashije kuhagera bijujutiye imitegurire yacyo.

Kimwe mu bitanyuze abantu harimo gutinda gutangira kuko habaheo ubukererwe bw’amasaha hafi ane.

Umuyobozi wa Rwanda Gospel Stars Live, Aimable Nzizera, yabwiye IGIHE ko uku gukerererwa kwatewe n’uko hari ibyabahindukanye ku munota wa nyuma.

Ati “Twari twateguye umuntu upima abantu kuri Canal Olympia, igihe twiteguraga gutangira kwinjiza abantu, twamusabye guhera ku bakozi bacu ngo abe aribo atangira apima, we aho kubikora atangira kubaha ubutumwa bugufi atabapimye.”

Uwo mukozi wari ushinzwe gupima inzego zishinzwe umutekano zahise zimuta muri yombi ndetse na bamwe mu bo yari amaze guha ubu butumwa barafatwa.

Icyakora mu bushishozi bw’inzego zishinzwe umutekano, Nzizera yahishuye ko abakozi ba Rwanda Gospel Stars Live bo bahise barekurwa, hasigara hakurikiranywe uyu mukozi wari ushinzwe gupima.

Guhera ako kanya abantu bose basabwaga kuza bipimishije, ugize ibyago akaba atabyitayeho kare, yasabwaga kujya aho bapimira kandi hari kure ugereranyije n’ahari Canal Olympia.

Habaye ibisa n’imyigaragambyo

Ubwo iki gitaramo cyari kgeze hagati, Rose Muhando akiva ku rubyiniro abacuranzi bahise bava ku rubyiniro bitangira kuvugwa ko bigaragambije, ko batongera kuvuza ibyuma batishyuwe amafaranga yose bari baremerewe.

Umwe mu bacuranzi bo muri ‘Band’ yafashaga abahanzi twaganiriye nyuma y’igisa n’imyigaragambyo bakoze, yavuze ko abantu babibitiriye nyamara atari bo babiteye.

Ati “Ntabwo ari twe, hari abantu benshi bishyuzaga, harimo abaririmbyi bafasha abahanzi, ab’ibyuma (sound system), n’abandi benshi. Natwe twabibonye gutyo ahubwo mwatubariza tukamenya icyabaye.”

Icyakora uyu mucuranzi ntiyigeze ahakana ko nabo bari bafite ikibazo cy’amafaranga bishyuzaga.

Ikindi yagarutseho ni uko igitaramo cyarangiye bishyuwe amafaranga yose bari basigawemo.

Ku rundi ruhande ariko uyu mucuranzi ntavuga rumwe na Nzizera wateguye iki gitaramo kuko we ahamya ko igitaramo cyahagaritswe n’abacuranzi bari bigaragambije.

Ati “Ubanza hari habayeho akagambane, abantu twari twumvikanye ko mbaha icya kabiri cy’ayo twumvikanye andi nkayabaha nyuma y’igitaramo. Nyuma ya Rose Muhando rero bahise bava ku rubyiniro bavuga ko bashaka amafaranga yabo yose.”

Nzizera yavuze ko ubwo abacuranzi bigaragambyaga n’abaririmbyi bafasha abahanzi ku rubyiniro bahise baboneraho nabo barishyuza.

Ati “Nagombaga guha abacuranzi miliyoni 1,5Frw, guhita nyashaka aho mu minota mike nari mfite ntabwo byari byoroshye ariko ndashima Imana ko byabayeho bose bakishyurwa kandi igikorwa kikarangira amahoro.”

Nzizera yavuze ko ibyo kuvuga ko hari abandi bishyuzaga bigatuma igitaramo gihagarara ari ukubeshya, ko n’abo babikoze ahanini bameze nk’abari batumwe ngo bamwangirize igikorwa.

Abajijwe niba bitamuciye intege yagize ati “Ahubwo ubu nibwo tuje, dufite byinshi byo gukora. Simpakanye ko hari ibitaragenze neza ariko byatubereye isomo ku buryo ubutaha bizagenda neza kuruta ibyahise.”

Iby’akanama nkemurampaka kasezeye ku munota wa nyuma, Nzizera yavuze ko ho nta kibazo babibonyemo kuko ari ibintu baganiriyeho ndetse byagiye kumenyekana barabiganiriyeho.

Ati “Hari ibintu tutumvikanyeho, ntabwo bari basobanukiwe neza n’igikorwa cyacu bituma basezera kandi rwose ni ibintu twumvikanye, bo rero nta kibazo mbafiteho.”

Israel Mbonyi yahize abandi

Rasta Jay yahembwe ibihumbi 500 Frw nk’Umuhanzi uri kuzamuka neza mu muziki, Gisubizo Ministries babaye aba gatatu bahembwa miliyoni 1 Frw, Aline Gahongayire wabaye uwa kabiri yahawe miliyoni 2 Frw mu gihe Israel Mbonyi yegukanye Miliyoni 7 Frw.

Israel Mbonyi yasabye imbabazi mu izina ry’abahanzi bagenzi be ku mbogamizi zagiye ziboneka zanatumye iki gitaramo kitagenda neza.

Ati “Ndasaba imbabazi mu izina ry’abahanzi bose, abantu baguze amatike bari bakeneye kutwumva turi kuririmba ariko abenshi batashye batatwumvise, nubwo ntawantumye ariko mbasabye imbabazi kuko abishyuye amatike yabo ntibatubone batashye batanezerewe.”

Yakomeje agira ati “Ibihembo ndabishimye kandi ndanezerewe, ntabwo ari njye wakoze cyane kurusha abandi ariko kuba ari njyewe batoye ndanezerewe cyane.”

Yatangaje ko mu gihe cya vuba afite igitaramo cyo gutangaza ku mugaragaro Album ebyiri afite ariko zitaratangazwa.

Uko igitaramo cyagenze

Kingdom of God Ministries niyo yabimburiye abandi kugera ku rubyiniro, iririmba indirimbo eshatu harimo Iyerekane Mana, Uri mwiza na Nzamuhimbaza.

Yakurikiwe na Gisubizo Ministries yaserutse mu ndirimbo zirimo Ushimwe Mwami, Ebenezer, Akira Indirimbo ndetse n’indirimbo zakoze ku mutima abitabiriye igiterane bakurikirwa na Rita Josh

Nyuma y’uko umuraperi MD yari amaze kuririmba, mu buryo butunguranye Rose Muhando wagaragarijwe urukundo na bake bari bitabiriye iki gitaramo yageze ku rubyiniro.

Yaririmbye indirimbo ze zakunzwe cyane mu myaka myinshi ishize zirimo Ndivyo Ulivio na Utamu wa Yesu, Pereka kwa Yesu, Jipange sawa sawa na Shikilia

Rose Muhando watangaje ko afite ibyishimo bikomeye byo kuba ari mu Rwanda kuko ariho umwe mu babyeyi be yavukiye, yahise ahishura ko ari kwiyumva nk’uri mu rugo.

Yavuze ko hagiye havugwa byinshi kuri we ariko ko Imana yatangije umurimo kuri we n’ubu igikomeje kumufasha kandi biri kugenda neza

Yaririmbye n’ikorasi iri mu kinyarwanda igira iti “Iyo Mana dusenga irakomeye.”

Rose Muhando yagombaga gukurikirwa na Theo Bosebabireba, ariko ahamagawe abacuranzi banga gumokeza akazi kabo.

Ubwo bake bari basigaye ahabereye iki gitaramo bari bari kwibaza ibigomba gukurikiraho, hagati yo gutaha no gukomeza, Aline Gahongayire ni we wahise aseruka ku rubyiniro, aririmba indirimbo ye ikunzwe muri iyi minsi Ndanyuzwe.

Yakurikiwe na Gaby Kamanzi waririmbye izirimo ‘Day by Day’ n’iyitwa Amahoro, yakurikiwe n’uwitwa Frank.

Theo Bosebabireba yahawe umwanya wo guhimbaza Imana saa 11:44, yaririmbye indirimbo ze za kera zirimo iyitwa Soko Imara inyota, Ikigeragezo, Kubita Utababarira na Bosebabireba yitiriwe.

Hakurikiyeho Serge Iyamuremye waririmbye indirimbo ze zakunzwe akurikirwa na Israel Mbonyi wahawe umwanya saa 12:05.

Yaririmbye Baho, Mbwira, Karame ,Icyambu ndetse na Hari Ubuzima.

Nyuma yo gusoza abaririmbyi bose bose bahise bahurira mu ndirimbo imwe ya Mbonyi yitwa Hari Impamvu barayifatanya ari nayo yasoje igitaramo cy’indirimbo.

Hari bamwe mu bahanzi bari bari muri iki gikorwa ariko batagaragaye ku rubyiniro barimo ‘James na Danilla na Gisele Precious’.

Nibakwe Edith yari umushyushyarugamba muri iki gitaramo
Eddy Kamoso nawe yari Umushyushyarugamba muri iki gitaramo
Ubwo Gisubizo Ministries yari iri kuririmba abitabiriye bagaragaje ibyishimo
Ababaririmbyi ba Kingdom of God Ministries basusurukije abantu bake bitabiriye iki gitaramo
King of God Ministries niyo yabimburiye abandi kwinjira ku rubyiniro
Kingdom Of God Ministries ku rubyiniro bakoze iyo bwabaga
Kuramya byabaye ubuzima bw'abanyarwanda batari bake
Byari ibicika ubwo Gisubizo Ministries yinjiraga ku rubyiniro
Nyuma y'iminota myinshi benshi batekereza ko igitaramo cyasubitswe nibwo Gahongayire Aline yaserutse
Aline Gahongayire yegukanye umwanya wa Kabiri atsindira miliyoni ebyiri
Gaby Kamanzi yinjiye ku rubyiniro nyuma gato ya Aline Gahongayire
Israel Mbonye yatsinze abandi yegukana miliyoni 7Frw
MD yinjiye ku rubyiniro yambaye imyenda icikaguritse
Umuraperi MD ku rubyiniro yatunguye benshi
Serge Iyamuremye yakoze ku mutima bake bari basigaye mu gitaramo
Ababyinnyi ba Rose Muhando bakanyujijeho
Rose Muhando yagaragarijwe ibyishimo byinshi n'abanyarwanda
Rose Muhando yatangaje ko nyina Umubyara avuka mu Rwanda
Rose Muhando yavuze ko yagiye anyura muri byinshi ariko Imana iracyakomje kumurinda
Abakobwa b'uburanga bari mu bitariye iki gitaramo
Abitabiriye igitaramo bagaragaje ko bafitiye ipfa ibitaramo nk'ibi
Nubwo cyabayemo byinshi, iki gitaramo cyaryoheye uwihanganye
Bake bari bitabiriye banyuzwe n'indirimbo z'abaririmbyi
Mbere y'uko Israel Mbonyi ajya ku rubyiniro yafatanyaga n'abandi guhimbaza Imana
Nubwo abari bitabiriye iki gitaramo batagisoje ariko bagaragazaga akanyamuneza
Umunyarwenya Gafaranga yari yitabiriye iki gitaramo
Ibihembo byatanzwe muri iri rushanwa
Israel Mbonyi wabaye uwa mbere yahembwe miliyoni 7 Frw
Ubwo Aline Gahongayire yashyikirizwaga sheke ye nk'uwa kabiri
Rata Jay yavuze ko guhembwa nk'umuhanzi mwiza ukizamuka bimwubatse cyane
Ubwo Rata Jay yashyikirizwaga sheki ye
Abahanzi bose bahatanye muri Rwanda Gospel stars Live baririmbanye indirimbo ya Israel Mbonyi

Amafoto: Yuhi Augustin
Video: Uwacu Lizerie


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .