Ev. Kwizera Emmanuel yateye ivi asaba kurushinga mukuru w’umugore we witabye Imana

Yanditswe na Uwiduhaye Theos
Kuya 4 Ugushyingo 2019 saa 10:15
Yasuwe :
0 0

Umuvugabutumwa Kwizera Emmanuel ukorera ivugabutumwa mu Itorero Evangelical Restoration Church (ERC) yateye ivi asaba Coco Kaligirwa uvukana n’umugore we witabye Imana, ko yamuhoza amarira akamubera umugore.

Ni ibirori byabaye mu mpera z’icyumweru gishize aho Kwizera yambitse impeta y’urukundo uyu mukobwa wamubereye icyuzuzo cy’ubuzima amusaba ko bazasangira akabisi n’agahiye akamubera urubavu n’umunyamabanga kugeza ku ndunduro y’ubuzima bwabo.

Kaligirwa ni mukuru w’umugore wa Kwizera ndetse ni we wasigaye yita ku bana Kunda yabyaranye na Kwizera.

Kunda yitabye Imana tariki ya 6 Kanama 2017, azize indwara ya kanseri y’umwijima yari amaranye amezi atanu. Yaguye mu bitaro byitiriwe Umwami Faisal aho yari amaze icyumweru arwariye.

Abasenganye n’abakoranye na we bamufataga nk’inkoramutima ndetse bamushima ubutwari bwamuranze no kwicisha bugufi yagiraga imbere y’abantu bose.

Ku wa 5 Kanama 2018 mu rusengero rwa Restoration Church ku Kimisagara ubwo hibukwaga umwaka Kunda amaze yitabye Imana, Umuvugabutumwa Kwizera yatangaje ko yatangije umuryango ‘La Kunda Foundation’ ugamije gushyigikira ibikorwa byiza byaranze umugore we.

Uyu muryango wibanda ku gufasha abana bakennye kurusha abandi kwiga, gufasha abashakanye kubaka ingo zabo neza no gukora amasengesho yo gusengera ibihugu bitarageramo ubutumwa bwiza.

Kwizera Emmanuel akorera umurimo w’Imana mu Muryango Nyafurika w’Ivugabutumwa (AEE) muri Kenya. Yamenyekanye cyane mu murimo w’Imana kuva akiri muri Kaminuza y’u Rwanda i Butare, ari naho yakiriye Yesu nk’Umwami n’Umukiza we.

Umugore we wa mbere Kunda yatabarutse afite imyaka 37, yamusigiye abana batatu barimo abakobwa babiri n’umuhungu umwe.

Kunda yari afite inkoni y’ubudiyakoni muri ERC Paruwasi ya Kimisagara aho yibukwa nk’umwe mu bayoboye urubyiruko no mu batangije igiterane cy’umuryango. Yari umujyanama w’abashakanye, abafasha kubakira ingo zabo ku ndangagaciro za gikirisitu.

Umuvugabutumwa Kwizera Emmanuel yateye ivi asaba mukuru w’umugore we witabye Imana ko yamubera umugore
Urukundo rwa Kwizera n'umukunzi we Coco Kaligirwa rwari rwagizwe ibanga kugeza rushyizwe ku karubanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza