Daniella & James na Gisubizo Ministries bongerewe mu gitaramo cya Nice Ndatabaye

Yanditswe na Uwiduhaye Theos
Kuya 12 Ugushyingo 2019 saa 03:16
Yasuwe :
0 0

Daniella & James bamamaye mu ndirimbo zirimo ‘Mpa Amavuta’ ikunzwe n’abatari bake ndetse na Gisubizo Ministries biyongereye ku bahanzi bazaririmba mu gitaramo Nice Ndatabaye agiye gukorera ku nshuro ye ya mbere mu Rwanda, yise “Umbereye Maso Live Concert’’.

Aba bahanzi biyongereye ku bandi barimo umuramyi Prosper Nkomezi na Shekinah Worship Team yo muri Evangelical Restoration Church Masoro nabo baherutse gutangazwa nka bamwe bazataramira abazitabira iki gitaramo giteganyijwe ku wa 8 Ukuboza 2019, kikazabera muri Serena Hotel mu Mujyi wa Kigali.

Byishimo Espoir (Happy) ushinzwe kumenyekanisha ibijyanye n’iki gitaramo yabwiye IGIHE ko bagenda bahitamo abahanzi batandukanye kandi bakunzwe muri iki gihe kuko bifuza ko abazitabira igitaramo bazaheshwa umugisha basabana n’Imana.

Nice Aimable Ndatabaye wateguye iki gitaramo azwi mu muziki nka Nice, yavukiye muri Repubulika Iharanira Demokarasi ya Congo ku wa 15 Nyakanga 1989.

Yaje mu Rwanda nyuma ya Jenoside yakorewe Abatutsi mu 1994 ahamara imyaka mike ubundi ajya muri Kenya gushaka imibereho nyuma aza kujya gutura muri Canada muri Nzeri 2014.

Mu mpano afite harimo kuririmba no kwandika indirimbo ndetse no kubwiriza ubutumwa bwiza. Amaze kwandika indirimbo zirenga 60 ariko amaze gushyira hanze indirimbo umunani z’amajwi n’amashusho.

Yakoranye n’abaramyi bakomeye mu Rwanda anavuga ko afatiraho icyitegererezo ku barimo Uwimana Aimé na Gentil Misigaro na we uba muri Canada akaba ari na we wakoze album ya mbere ya Nice.

Abarizwa mu Itorero ryitwa Freshmanna of Edmonton aho ahagarariye itsinda ry’abaririmbyi bayobora umurimo wo kuramya no guhimbaza Imana, we n’umugore we bakaba banavugamo ubutumwa nyuma yo guhabwa izi nshingano muri Kamena uyu mwaka.

Yakoze album ye ya mbere mu 2015 yise ‘Ndahamya’ iriho indirimbo esheshatu zirimo izakunzwe cyane nka ‘Umbereye Maso ‘ yahuriyemo na Gentil Misigaro, ‘Yesu Niwe’ n’izindi.

Gisubizo Ministries iri mu matsinda akomeye mu kuramya no guhimbaza Imana yatumiwe mu gitaramo cya Nice Ndatabaye
James & Daniella bagezweho cyane mu muziki wo kuramya Imana mu Rwanda nabo batumiwe muri iki gitaramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza