Beza Deborah yakoranye indirimbo n’umuramyi Levixone wahuriye na Don Moen mu gitaramo

Yanditswe na Uwiduhaye Theos
Kuya 3 Nyakanga 2020 saa 10:30
Yasuwe :
0 0

Deborah Beza usanzwe akorera umuziki muri Canada yahuriye mu ndirimbo n’umuhanzi Sam Lucus Lubyogo uzwi nka Levixone mu muziki wo kuramya no guhimbaza Imana mu Karere ka Afurika y’Iburasirazuba ukomoka muri Uganda.

Iyi ndirimbo nshya ya Beza Deborah na Levixone yitwa ‘Celebrate’ mu buryo bw’amajwi n’amashusho yakorewe muri Uganda.

Beza yabwiye IGIHE ko yayikoze ashingiye ku mirimo myinshi Imana igenda imukorera umunsi ku wundi.

Ati “Nayikoze nshingiye ku mirimo myinshi myiza Imana imaze kunkorera ntarondora numva ibyiza ari uko nabishyira mu ndirimbo nk’umuhanzi cyane ko byagira benshi bifasha. Impamvu nakoranye na Levixone ni uko ari umwe mu baririmbyi nkunda baririmba indirimbo zihimbaza Imana ikindi kandi ni umuhanga cyane.”

Iyi ndirimbo ni iya kabiri ya Beza Deborah nyuma y’iyo yakoze yitwa ‘Muhumure’, yubakiye ku butumwa butanga ihumure ku bafite imitima ibabaye ikakibutsa ko Umwami Imana yirahiriye kutabasiga.

-  Yamaze imyaka 20 atarabohokera kuririmbira Imana

Muri Mata 2019 nibwo uyu muhanzikazi yashyize hanze indirimbo ye ya mbere nyuma y’imyaka igera kuri 20 afite inzozi zo gukora umuzingo w’indirimbo ze.

Yamamaye cyane mu bakurikira ibijyanye n’Iyobokamana muri Uganda no mu Rwanda mu biterane byo gufasha abantu bari mu buzima bugoye. Igihe cye cyinshi mu murimo w’Imana ahora yumva yashimishwa no kubona byibuze umutima w’umuntu umwe ubabaye amwenyura.

Ubwo yashyiraga hanze indirimbo ye ya mbere yavuze ko n’ubundi yakoreraga Imana ariko nyuma y’Imyaka 20 akaba aribwo yasohoje ikintu cyari kimaze iminsi ku mutima we.

Ati “Nyuma y’imyaka 20 ni bwo mbonye indirimbo ya mbere ijya hanze atari uko nabuze ubushobozi bwo gusohora indirimbo ahubwo ni cyo gihe Imana ibishimye ko isohoka.”

Kuririmba azabifatanya n’umurimo wo gufasha no kugeza ibyiza ku bantu batishoboye n’ababaye kuko habamo umugisha ukomeye nk’abitangaza muri aya magambo.

Beza Deborah yavutse mu 1975 muri RDC. Avuga ko yahisemo umuziki wo guhimbaza Imana kubera ko ari umukirisitu. Yatangiye kuririmba akiri muto cyane. Intumbero ye ni ukwamamaza ubutumwa bwiza biciye mu ndirimbo.

Levixone bahuriye mu ndirimbo nshya ni umwe mu bahanzi bagezweho ndetse yanatumiwe mu Rwanda mu gitaramo MTN Kigali Praise Fest Edition I cyitabiriwe n’abantu babarirwa mu bihumbi bari bateraniye muri Parking ya Camp Kigali ku wa 10 Gashyantare 2019 cyari cyatumiwemo Umuramyi w’Umunyamerika Don Moen.

Uyu musore azwi mu ndirimbo nka ‘Passport’, ‘Noonya omu’, ‘Jungle’, ‘Hossanah’, ‘Esaala’, ‘Turn the replay’ na ‘Chikibombe’ zatumye izina rye rizamuka n’izindi nyinshi zatumye aba umuhanzi urangamiwe muri Uganda no hanze yayo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .