Zizou Alpacino yahurije Bruce Melodie na Social Mula mu ndirimbo ye nshya ‘Iyo byanze’

Yanditswe na Nsengiyumva Emmy
Kuya 12 Mutarama 2021 saa 08:32
Yasuwe :
0 0

Zizou Alpacino ukomeje urugendo rwo kurangiza album ye ya mbere amaze imyaka itatu akoraho, yasohoye indirimbo nshya ‘Iyo byanze’ yahurijemo Bruce Melodie na Social Mula.

Iyi ndirimbo iri muri gahunda DJ Zizou yatangiye yo gusohora indirimbo yahurijemo abahanzi batandukanye mu gusoza album amaze igihe akoraho.

‘Iyo byanze’ yabaye indirimbo ya mbere Bruce Melodie na Social Mula, abahanzi bameze nk’abatangiriye umuziki mu gihe kimwe bakoranye.

Social Mula mu kiganiro na IGIHE yavuze ko nubwo ariyo ndirimbo ya mbere isohotse ariko atari wo mushinga rukumbi afitanye na Bruce Melodie.

Ati “Hari imishinga myinshi dufitanye nubwo yose itarajya hanze, sinavuga ko iyi ndirimbo ari yo ya mbere ariko ni yo ibanjirije izindi gusohoka.”

Uyu muhanzi ahamya ko gukorana nk’abahanzi by’umwihariko bafite urwego bariho, ari ibintu biba bishimishije binatanga isura nziza mu bakunzi babo.

Mu ndirimbo ‘Iyo byanze’ ya Bruce Melodie na Social Mula baba bagaruka ku musore cyangwa umukobwa uba ataka umukunzi we, amushimira ko amurutira abo bakundanye byagera bikomeye bagakuramo akabo karenge.

Dj Zizou yavuze ko bahisemo gusohora iyi ndirimbo ikoze mu buryo bwa ‘Animation’ kuko amashusho yayo nubwo batangiye kuyafata ariko ataraboneka.

Iyi ndirimbo mu buryo bw’amajwi yakorewe muri Monster Record studio n’ubusanzwe ya Zizou Alpacino.

Zizou Alpacino yavuze ko iyi album ateganya kumurika muri uyu mwaka, yayihurijeho benshi mu bahanzi bafite amazina akomeye mu muziki w’u Rwanda.

Ati “Sinamenya ngo ni abahanzi bangahe nzifashisha kuri iyi album kuko ni benshi, icyo nzi cyo izaba iriho benshi mu bazwi mu muziki w’u Rwanda.”

Album ya Zizou Alpacino yahishuye ko izaba iriho indirimbo 11 n’izindi ebyiri z’inyongezo. Yavuze ko nubwo ari iy’indirimbo amaze imyaka itatu akoraho, ashobora kuzashyiraho na zimwe mu zo yahurijemo abahanzi mu myaka yo hambere ariko yabanje kuzivugurura.

Zizou Alpacino ari gutunganya album ye ya mbere amaze imyaka itatu akoraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .