Zari yahishuye ko adakeneye gushyingirwa

Yanditswe na Uwiduhaye Theos
Kuya 20 Ugushyingo 2020 saa 05:16
Yasuwe :
0 0

Zari Hassan wahoze ari umugore wa Diamond Platnumz bagatandukana, nyuma akaza gukundana n’uwitwa King Bae, yatangaje ko adakeneye gushyingirwa.

Uyu mugore wari umaze iminsi muri Tanzania aho yagiye avuye muri Afurika y’Epfo akajyana abana babiri afitanye na Diamond Platnumz kumusura, yabivugiye mu kiganiro yagiranye na Wasafi TV y’uyu wahoze ari umukunzi we.

Yabanje kubazwa icyamujyanye muri Tanzania avuga ko abana bari bakumbuye se. Ati“Hari igihe kuri twe cyo guhuza abana na se. Bari bamukumbuye kandi byari bikwiye kuko hari hashize imyaka ibiri batamubona.”

Yabajijwe niba hari gahunda yo kongera kubana na Diamond no kugaruka muri Tanzania, avuga ko adateze gusubiza amaso inyuma ahubwo ari kureba ibiri imbere kuko ibye na Diamond byarangiye.

Ati “Ntabwo nigeze mvuga ko nshaka gusubirana nawe cyangwa se we ngo abivuge, ntekereza ko muri iki gihe turi ku rwego rwo gufatanya kurera. Aba ashaka kureba abana. Ntabwo ari ikintu kijya kinza mu mutwe ntabwo njya mbitekerezaho. Mwifuriza ibyiza. Nifuza ko azabona umukunzi w’ukuri.”

Arongera ati “Abagore twibana tuba dukomeye kandi dufite imbaraga ariko na none tuba dukeneye ibiganza by’abagabo mu kurera abana. Byaba mu buryo bw’amarangamutima cyangwa se ubujyanye n’amafaranga. Uba ukeneye umuntu nka se w’abana, kugira ngo abe yagufasha kandi nishimiye ko Diamond ahari.”

Yabajijwe ku bya King Bae bakundanye akimara gutandukana na Diamond, avuga ko yaje kubona iby’urukundo rwabo bidashoboka bahitamo gutandukana, ariko babanye neza bavugana nta kibazo.

Yemeza ko yabonye afite ubwana kandi atajyanye n’ibyo yifuzaga mu rukundo rwabo agahitamo gutandukana nawe.

Abajijwe niba ajya atekereza kurushinga, agasezerana n’umugabo, yatangaje ko nta gahunda afite yabyo ariko akeneye umuntu bajya basangira ubuzima bakaryoshya.

Ati “Ntabwo ntekereza gushaka. Maze kugera ahantu ndi umuntu wigenga. Kuri ubu njye nkeneye umuntu dukundana tukaryoshya ubuzima, ubu binteye ubwoba kuba nasezerana n’umuntu. Umuntu wo kuryoshya mu buzima nta kibazo, uwo gusezerana oya.”

Avuga ko impamvu atekereza gutya ari uko yumva aramutse ashatse undi mugabo, bagasezerana kubana byagira ingaruka ku bana be mu bihe bizaza.

Zari yatangaje ko adakeneye gushakana n'umugabo ahubwo akeneye umukunzi gusa
Zari afite abana batanu barimo babiri bato yabyaranye na Diamond Platnumz ndetse n'abahungu batatu bakuru yabyaranye na Ivan Ssemwanga bakundanye mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .