00:00:00 IGIHE NETWORK KN KINYARWANDA EN ENGLISH FR FRANCAIS

Yesu yahahinduriye amazi divayi: Twageze i Kana y’i Galilaya (Amafoto)

Yanditswe na Nsengiyumva Emmy
Kuya 26 April 2022 saa 04:59
Yasuwe :

I Kana y’i Galilaya ni ko gace Yesu yakoreyemo igitangaza cya mbere. Kuva icyo gihe ni bwo abigishwa be batangiye kurushaho kumwizera ndetse icyubahiro yahabwaga muri rubanda kiriyongera.

Icyo gihe, Yesu yari yatashye ubukwe ari kumwe na nyina, Mariya. Ubwo ibirori byari birimbanyije, divayi yarashize bitabaza nyina wa Yesu.

Inkuru iri muri Bibiliya mu Gitabo cya Yohana 2:1-10 ikomeza ivuga ko Nyina wa Yesu yabwiye abahereza gukora icyo ari bubategeke cyose.

Ni ko byagenze kuko Yesu yababwiye kuzuza amazi mu ntango esheshatu, abategeka kuyadaha bakayashyira “umusangwa mukuru”.

Uwo musangwa mukuru agisogongeraho yumvise divayi iryoshye cyane kurusha iya mbere, abayinyweyeho barayirahira.

Nguko uko Yesu yakoreye igitangaza cya mbere i Kana y’i Galilaya. Icyo gitangaza cyarogeye kiba ikimenyabose cyane ko ari cyo yatangiriyeho. Kugeza magingo aya n’ubu uvuze Kana, abemeramana bahita bumva aho Yesu yahinduriye amazi divayi.

Ubusanzwe iyo unyuze mu muhanda uhuza Nazareti na Tiberia, ugera mu gace ka Kafr Kanna, aho abizera bita Kana y’i Galilaya.

Ukigera muri aka gace, ubona inyubako zitandukanye zubakishije amabuye nka kimwe mu bikoresho byifashishwa cyane mu bwubatsi bwo muri Israel.

Imibare yo mu 2019 yerekana ko Kana ituwe n’abaturage bagera 22.751 basengera mu madini atandukanye arimo Islam n’andi ya Gikirisitu.

Abatuye muri aka gace bakoresha ururimi rw’Igiheburayo, Abazi Icyongereza ni mbarwa naho Igifaransa nakiganiriye n’umusaza umwe wambwiye ko yabaye muri Maroc.

Ubwo nahageraga nabonye ari agace kagendwa cyane n’abakora ubukerarugendo nyobokamana cyane ko hafite amateka ahuye n’avugwa muri Bibiliya by’umwihariko ku buzima Yesu yabayemo mbere yo gusoza ubuzima bwe atarasubira mu ijuru, impande za Se.

Aho Yesu yakoreye igitangaza ubu hubatse urusengero rwagiye ruvugururwa kuva mu myaka yo hambere.

Kana kandi izwi nk’agace kari gatuyemo Natanayeli, uyu ni we wavuze ko i Nazareti nta cyiza cyavayo.

Muri Yohana 1:45-46 ni ho hari iyi nkuru aho uwitwa Filipo yabonye Natanayeli aramubwira ati “Uwo Mose yanditse mu mategeko, n’abahanuzi bakamwandika twamubonye. Ni Yesu mwene Yosefu w’i Nazareti. Natanayeli aramubaza ati “Mbese i Nazareti hari icyiza cyahaturuka?” Filipo aramusubiza ati “Ngwino urebe.”

Yesu agaragazwa nk’Umunya-Galilaya ariko wavaga i Nazareti. Natanayeli umwe wamusuzuguye, Bibiliya yerekana ko nyuma yaje no kuba umwe mu bigishwa be.

Twanasuye Galilaya inyanja Yesu yagenze hejuru, aho yatuburiye imigati…

Inyanja ya Galilaya iri ku buso bwa kilometero kare 166, mu gihe ubugari bwayo ari kilometero 13 mu gihe uburebure bungana na kilometero 21. Ubujyakuzimu ni metero 43.

Ikikijwe n’imisozi ku buryo inkubi y’umuyaga uyivaho ishobora guhuha bigateza umuhengeri mu mazi yayo.

Amazi yayo ava mu migezi itandukanye irimo Hasbani, Dan, Meshushim na Yorodani Yesu yabatirijwemo.

Iyi Nyanja ituranye n’umujyi wa Magdala witiriwe Mariya Magadelina, uyu akaba umubyeyi uzwi cyane muri Bibiliya.

Agace kegeranye n’inyanja ya Galilaya Yesu yagakoreyemo ibitangaza byinshi birimo “Kugenda hejuru y’amazi’’ kiboneka muri Matayo 14:22-33; “Guhagarika umuraba’’ muri Mariko 4:35-41 no guhaza abantu 5000, mu nkuru iri muri Matayo 14:13-21.

Kuri iyi Nyanja kandi ni ho abigishwa yababwiye kujugunya urushundura iburyo bw’ubwato, bakaroba amafi manini 153. Ni na ho Yesu yabarije Petero gatatu ko amukunda, ibyahishuraga ko azamwihakana gatatu.

Ni ho Yesu yahamagariye Simoni ari we Petero, Andereya, Yakobo na Yohani kuba abigishwa be ubwo bari abarobyi.

Benshi mu barobyi babaga mu gace ka Magadara, aho Mariya Magadarena [uvugwa muri Bibiliya nk’umwe mu bagendanye na Yesu ndetse akaba ari no mu bamenye iby’inkuru y’urupfu rwe no kuzuka kwe mu ba mbere] yari atuye.

Kubera ayo mateka, Inyanja ya Galilaya irasurwa cyane kuko ifite umwihariko mu mateka ya Yesu n’abigishwa be ndetse n’ibitangaza yahakoreye mu ivugabutumwa rye ku Isi.

Abayisura bashobora kuhabona ubwato bwakoreshwaga mu gihe cya Yesu, bivugwa ko bwavumbuwe mu 1986.

Uretse ibi bitangaza byakorewe ku nkengero za Galilaya, iyo usuye aka gace bakwereka umudugudu witiriwe Yesu, uyu akaba ariwo yahungiyemo ubwo yari yujuje imyaka 30 mu gihe yahigwaga bikomeye n’Umwami w’Abaroma.

Uri mu Nyanja ya Galilaya, hakurya yawe ureba Umusozi Tabora, na wo ufite amateka yihariye kuko ari ho Yesu yahinduriwe akambikwa ubwiza ari kumwe na Eliya na Mose hanyuma Petero agasaba kuhaca ingando eshatu kugira ngo bahabe. [Matayo 17:1-8].

Winjiye mu Mujyi wa Cana uhita ubona ko haba urujya n'uruza rurimo n'ababa bagiye kwiga amateka
Kana ni umwe mu Mijyi yubatswe mu buryo bugezweho
Cana ni Umujyi utuwe cyane
Ukinjira mu Mujyi w'i Kana uhita ubona ko ari n'umujyi w'ubucuruzi
Mu mujyi hafi y'ahari urusengero rwubatswe ahabereye ubukwe
Kana ituwe n'abaturage b'amadini atandukanye
I Kana hari umujyi ukomeye mu bucuruzi
Urusengero rwubatse aho Yesu yahinduriye amazi divayi i Kana
Ukinjira mu gace ka Tabgha uhasanga ibyapa bikwereka aho ugiye
Ukinjira i Capharnaum, Umudugudu witiriwe Yesu
Umudugudu witiriwe Yesu Kirisitu
Uyu mudugudu witiriwe Yesu wubatse ku buryo abahasuye babona n'aho kwicara bakaruhuka
Uru rusengero rwubatse hejuru y'aho Yesu yari atuye
Amabuye yari yubatse uyu mudugudu witiriwe Yesu abungabungwa bikomeye nk'urwibutso rukurura ba mukerarugendo
Nyuma y'igihe Yesu yishwe akazuka, abamwemeraga bubatse bazirika ikomeye muri uyu mudugudu ariko nayo yaje gusenyuka bitewe n'imyaka
Uru rusengero rwubatse hejuru y'aho bivugwa ko Yesu yari atuye ku myaka 30
Ukinjira aho Yesu yabonekeye abarobyi ubona ko hatunganyijwe neza cyane
Ukihagera ubona ibishushanyo bigaragaza ko ariho Yesu yabonekeye abarobyi
Ku nkengero z'inyanja ya Galilaya aho bivugwa ko abarobyi bari bari baburaniwe mbere yuko Yesu abiyereka
Aho Yesu yabonekeye abarobyi hasurwa cyane na ba mukerarugendo
Ukinjira i Tabgha aho Yesu yatuburiye imigati uhasanga urukuta rukwereka aho ugiye kwinjira
Aha niho Yesu yatuburiye imigati n'amafi abari bamukurikiye bararya barahaga
I Tabgha uhasanga ibimenyetso byerekana igitangaza Yesu yahakoreye
I Tabgha aho Yesu yatuburiye imigati akagaburira abarenga ibihumbi bitanu utabariyemo abagore n'abana ubu hubatse urusengero rukomeye
Ukinjira ku nyanja ya Galilaya usanga imodoka nyinshi z'abaje kuhatemberera
Uyu mudugudu ushingiye ku mateka ya Bibiliya uri mu ikomeye iri hafi na Galilaya
Agace kitiriwe Mariya Magadalina kubatsweho umudugudu ukomeye
Ukigera i Galilaya mbere yo kwinjira ubona inkingi ifatwa nk'ikimenyetso cy'uko wahageze
Mu nyanja ya Galilaya haba hari ubwato bufasha ba mukerarugendo kuryoherwa
Hagati mu nyanja ya Galilaya
Inyanja ya Galilaya ifite amateka akomeye muri Bibiliya
Uri hagati mu nyanja uba witegeye umusozi wa Tabora wubatseho umujyi ukomeye
Iruhande rw'inyanja ya Galilaya hari inzu ibitse amateka, aha niho hari igice cy'ubwato bivugwa ko bwakoreshwaga ku bwa Yesu bwatoraguwe n'abarobyi mu 1986
Iki ni igice cy'ubwato bwatoraguwe n'abarobyi mu nyanja ya Galilaya
Mu nyanja ya Galilaya benshi baba bahasohokaniye n'imiryango yabo
Mu nyanja ya Galilaya benshi bahava bahakoreye isengesho nk'impamba y'uru rugendo
Pastor bakunda kwita Prophet Jean Paul Uyoboye Kingdom Prayer Network Ministry itegura ibiterane byububyutse mu bihugu bitandukanye, nawe yari yitabiriye uru rugendo rwa 'Twende Jerusalem'

Amafoto:Nsengiyumva Emmy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .