Icya semuhanuka? Inkuru ya Davis D n’umukobwa umushinja inda no kumurya amafaranga

Yanditswe na Nsengiyumva Emmy
Kuya 16 Ukuboza 2020 saa 10:31
Yasuwe :
0 0

Mu ijoro ryo kuri uyu wa Kabiri tariki 15 Ukuboza 2020, ku mbuga nkoranyambaga igikuba cyacitse, ubwo hakwiraga amajwi ya Davis D aganira n’umukobwa bivugwa ko bakundanaga ndetse bitegura no kubyarana ariko basubiranyemo.

Iby’iyi nkuru byatunguye benshi gusa ku rundi ruhande, hari abagaragaje ko ari uburyo bwa gihanzi bwo gushaka ibizwi nko “gutwika” ku buryo indirimbo uyu muhanzi ateganya gushyira hanze izasamirwa hejuru.

Mu majwi yagiye hanze, bombi batangira baganira neza umukobwa amubaza iby’urugendo aherukamo mu Mujyi wa Dubai, ariko uko umunota ushira umukobwa agatangira kurya karungu ati “Burya urarenze pe, waba umukinnyi mwiza wa filime. Wabibasha pe. Biratangaje kubona umuntu ajya mu kazi, ukagaruka ukamvugisha ari uko avuye mu kato.”

Uyu musore abwira uyu mukobwa ko bitari kumukundira ko bavugana kuri WhatsApp akaba ariyo mpamvu yahisemo kumubwira ngo bajye bavugana kuri Application yitwa ‘Botim’ ikoreshwa cyane mu bihugu by’Abarabu.

Davis D yari amaze ibyumweru bibiri ari i Dubai kuhakorera indirimbo, ni naho bivugwa ko yahuriye n’undi mukobwa yifashishije mu ifatwa ry’amashusho akaza guca inyuma umukunzi we muri icyo kiganiro wavugaga ko yitwa Aisha.

Aisha akomeza abaza uyu musore ukuntu atigeze amuvugisha kuri WhatsApp, undi mu kwisobanura akavuga ko bitari kumukundira kubera akazi yari arimo ati ‘uzi akazi nari ndimo? Uzi ibibazo nahuye nabyo?’

Uyu muhanzi agera aho akabwira uyu mukobwa ko yari ari mu kazi kenshi, undi akamubaza ati “wowe urishoboye ku buryo wakwigira gutyo? Ese ninde ibyo ubigufashamo?”

Davis D akomeza avuga ko atigeze agira ikibazo cy’amafaranga [kuko ngo hari ayo yari yahawe n’uyu mukobwa ari nayo yakoresheje] ahubwo byari akazi kenshi.

Aisha mu kumusubiza ati “Ahubwo wagize ikibazo cy’ibyo wari urimo wibagirwa ko hari uwo wasize, w’ingirakamaro binarenze icyo!”

Aisha agera aho akamubaza ati “Burya umukobwa ukoresha mu mashusho y’indirimbo ugera aho ukisanzura ukanatereta?”

Bagera aho bagatongana, Davis D akamubaza ngo ‘uri igiki? Uri mama?’

Undi mu kumusubiza agira ati “Wiratana iki? imodoka y’amafaranga yanjye nikuriye ku ikofi nkayikugurira?” akamucyurirra ko atabasha no kwikodeshereza inzu ndetse ko nta n’icupa yabasha kwigurira, Davis yarangiza ati “Ese iwanjye unywa amazi?”

Aisha hari aho agera akabwira Davis D ati “Nyubahira icyo ndi cyo niba wibagiwe icyo nagufashije, nibura unyubahe nk’umuntu twabanye.”

Davis mu kumusubiza aramubaza ati “Noneho imodoka ifite imyanya ine uragira ngo njye nyigendamo njye nyine? Njye ngutwaramo wenyine?”

Uyu mukobwa ahita amusubiza ko bibaye byiza byagenda gutyo. Anamubwira ko izo nzu n’imodoka amukangisha nawe azabyigurira.

Umukobwa amucyurira amubwira ko izina afite uyu munsi ariwe arikesha, undi akabitera utwatsi amubwira ko atariko bimeze.

Ati “Ibintu nari mfite muri gahunda yari wowe, noneho wowe waramfashe mba umunyururu wawe ku buryo umukobwa wese ngomba kuvugana nawe nzajya mbanza kukubaza.”

Aisha akomeza avuga ko ikibazo gihari atari uwo mukobwa ahubwo “Ikibazo ni icyo mwakoranye muri Dubai.” Akanamubwira ko afite ibimenyetso byinshi bigaragaza ko yaryamanye n’uwo mukobwa.

Undi mu kumusubiza akamubwira ngo “Ni uko wabonye ko urwego ashobora kungezaho rutandukanye n’urwo wowe wangejejeho?”

Aisha ahita amuseka akamubwira ko umukobwa wagiye mu mashusho y’indirimbo nta bushobozi yaba afite.

Aisha yigamba kuba ariwe wishyurira Davis D indirimbo kuva ku majwi yayo, amashusho no kugera igiye hanze.

Davis D aherutse kujya i Dubai kuhakorera indirimbo yise ‘Bon’ iri hafi kujya hanze mu minsi mike iri imbere. Ariko uyu mukobwa aramushishuriza akamubwira ‘ko amashusho y’indirimbo yibwiraga ko agiye kujya hanze, atazigera ahajya ikibazo cyabo kitarakemuka.’

Davis D agera aho akamubaza ngo “Warangurije?” undi ati “Ariko ntabwo nagutwerereye.” Bityo uyu muhanzi yungamo ati “Icyo wanshakagaho warakiguze.”

Umukobwa mu gusubiza ati “ni umwana kandi naramuguhaye, icyo nagushakagaho havuyemo umwana.”

Davis D amaze kumva ko yateye uyu mukobwa inda bigera aho akamubwira ko agomba kwimenya kuko bari baravuganye ko atazatwita.

Undi mu gusubiza amubwira ko yafashe amajwi ndetse afite ibimenyetso ku buryo uyu muhanzi akwiriye gucisha make.

Davis D ati “ibyo bintu ubiceceke. Ibyo bintu ndabyishyura.” Uyu mukobwa mu kumusubiza ati “Nta muhanzi ujya wemera kujya mu by’abana, mubemera barakuze. Byose ngiye kubishyira hanze.”

Muri aya majwi yasakaye hanze arangira Davis D asaba imbabazi umukobwa, undi agahita amukupa.

Hari amajwi ya Aisha yandi yagiye hanze ari kuganyira umukobwa w’inshuti ye, avuga ko ntacyo atakoreye uyu muhanzi ariko we akaba ari kumuca inyuma, muri ayo majwi y’uyu mukobwa urusha imyaka Davis D, aba avuga yamukuye kure ku buryo atari akwiriye kumwihenuraho.

Yaba ari inkuru mpimbano?

-  Nta modoka ye agira

-  Ni umuhanzi ukiba iwabo bivuze ko adakodesha

-  Si ubwa mbere akoze ibisa n’ikinamico mu rwego rwo kwishakira kumenyekana

Abazi neza Davis D baganiriye na IGIHE nyuma y’uko iyi nkuru igiye hanze bahamya ko uyu musore yaba yabeshye icya Semuhanuka.

Ku bw’aba bamuzi neza, iyi nkuru ni impimbano kuko uyu muhanzi nta nzu yigeze yibanamo mu myaka ibiri ishize.

Umwe mu bo twaganiriye waduhaye amakuru, yagize ati” Davis D arabeshya rwose, imyaka ibiri avuga amaze akodesherezwa inzu nta muntu utazi ko yabaga iwabo kwa Se.”

Uyu akomeza avuga ko usibye kuba aba kwa Se, mu Karere ka Nyarugenge mu Murenge wa Nyamirambo, uyu muhanzi nta modoka ye bwite yari yatunga.

Mu kiganiro twagiranye na Davis D muri Mata 2020, twamusanze mu rugo kwa se, ku buryo ibivugwa n’abakeka ko yaba yabeshye ko yibana baba bafite ukuri.

Ikindi kandi Davis akunze kugaragara mu modoka z’abantu batandukanye ariko ibyo kuba afite imodoka ye bwite, si benshi babihamya.

Mu biganiro bitandukanye n’itangazamakuru, Umubyeyi wa Davis D yagiye yumvikana ahamya ko ari we ufasha umuhungu we mu muziki ijana ku ijana.

Hari n’aho uyu mubyeyi yageraga agahamya ko Davis D aba mu rugo iwe, anabimushimira ko kuba icyamamare ntave mu rugo ari kimwe mu bigaragaza ikinyabupfura yakuranye.

Si ubwa mbere Davis D abeshye

Mu minsi ishize Davis D yakunze kumvikana mu itangazamakuru avuga ibintu bitandukanye mu rwego rwo gukomeza kuvugwa.

Urugero ni mu 2018. Icyo gihe yazengurukije umunyamakuru wa Kigalihits inzu ya Se umubyara ahamya ko ari urugo rwe rushya.

Uyu kandi hari izindi shene za Youtube yagiye agaragaraho avuga ko ahaye Asinah imodoka ihenze n’amafaranga akayabo mu rwego rwo kumwigarurira, ibintu biba bisa no kurangaza abakurikira imyidagaduro yo mu Rwanda bagahora bamuhugiyeho.

Hari umwe mu banyamakuru b’imyidagaduro watubwiye ko mu myaka mike ishize, uyu muhanzi yamusabye ko bakora inkuru izo arizo zose n’iyo zitaba zo ariko zituma avugwa cyane [ibisigaye byitwa gutwika].

Davis D yagiye akora ibihangano byinshi birimo nk’indirimbo yitwa ‘Biryogo’ yatangiriyeho ‘Sweet Love’, ‘Irekure’, ‘Go Down’, ‘Hennessy’. Izaciye ibintu ni iyo yise Dede na Micro.

Muri iki kiganiro Davis D yagaragaje amadolari ahaye umukunzi wa Asinah ndetse n'uyu muhanzikazi ariko bishirira kuri youtube
Davis D yemereye imodoka ihenze Asinah birangirira mu biganiro
Davis D yatembereje umunyamakuru urugo rwa Se ahamya ko ari inzu ye bwite
Urugo yatemberejemo Kigalihits arwita urwe, ni kwa Se. Ni ho twamusuye mu mezi umunani ashize
Birakekwa ko Davis D yahimbye iyi kinamico mu rwego rwo gushyushya abantu imitwe mbere y'uko indirimbo ye isohoka
Davis D akubutse i Dubai aho yafatiye amashusho y'iyi ndirimbo ye nshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .