00:00:00 IGIHE NETWORK KN KINYARWANDA EN ENGLISH FR FRANCAIS

Yategetse ko nta Munyarwanda uririmba ‘Live’: Ibyabereye inyuma y’amarido mu gitaramo cya Tayc i Kigali

Yanditswe na Akayezu Jean de Dieu
Kuya 31 July 2022 saa 08:23
Yasuwe :

Nel Ngabo yabikomojeho mu ndirimbo ‘Muzadukumbura’, mu kumvikanisha ko n’ubwo nta muhanuzi wemerwa iwabo ariko hari igihe kizagera ‘imihanda ikibuka imvune abahanzi bagize n’ibyishimo batanze binyuze mu miziki myiza bakoreye Abanyarwanda.

Uyu musore uri mu bahanzi bagezweho ni umwe mu bagombaga kuririmba mu gitaramo cyatumiwemo umuhanzi w’Umunya-Cameroun wavukiye mu Bufaransa, Julien Bouadjie uzwi nka Tayc [Tey-K].

Muri iki gitaramo cyabaye mu ijoro ryo ku wa Gatandatu rishyira ku Cyumweru tariki 31 Nyakanga 2022, Nel Ngabo ntiyageze ku rubyiniro. Ni ko byanagenze kuri bagenzi be, Rickie Pius Rukabuza [Deejay Pius] na Ngabo Richard [Kevin Kade].

Muri rusange iki gitaramo cyagombaga kuririmbamo Tayc n’abahanzi Nyarwanda barindwi ariko muri bo Ruti Joel, Seyn, Inki na Kivumbi King ni bo baririmbye gusa, abandi urubyiniro barurebesheje amaso ntibarukandagiraho.

Igitaramo ubwacyo cyagenze neza ariko hari ibitavuzwe byabaye birimo kuba abo bahanzi bataririmbiye abakunzi babo no kuba umwe mu baririmbye yateje umwuka mubi hagati ya Tayc n’abateguye igitaramo.

Nyuma yo kubona ibyo, IGIHE yakoze icukumbura ryimbitse ku cyatumye abo bahanzi bataririmba n’ibindi bitamenyekanye muri iki gitaramo.

Umuhanzi Tayc yataramiye mu Rwanda banamwambika igitambaro gifite amabara nk'ay'Ibendera ry'Igihugu

  Akavuyo mu migendekere y’igitaramo

Muri Gashyantare 2022, ni bwo byatangajwe bwa mbere ko Tayc wamamaye mu ndirimbo zirimo ‘N’y pense plus’, ‘Le Temps’ n’izindi azaririmbira i Kigali, abakunzi b’umuziki we n’intyoza mu Gifaransa batangiye kumwitegura.

Kuva icyo gihe igitaramo cyaramamajwe mu bitangazamakuru, ku mbuga nkoranyambaga n’ubundi buryo bwose ku buryo abantu benshi bamenye amakuru yacyo.

Imbaraga zashyizwe mu kucyamamaza zitandukanye n’izashyizwe mu migendekere yacyo kuko aho kuba myiza yarushijeho gusiga umwuka mubi hagati y’abateguye iki gitaramo na bamwe mu bahanzi.

Muri rusange cyatangiye saa Mbili z’umugoroba n’ubwo uwahageze mbere ho amasaha abiri yabonaga ko abitabiriye bari bube benshi cyane ko ku mirongo y’aho binjirira abantu bari uruvunganzoka.

Imbere mu cyumba cya BK Arena cyabereyemo iki gitaramo abantu binjiraga urusorongo ariko aba-Dj bakizamuka bavangaga imiziki kugira ngo binjize mu mwuka abakigezemo.

Ibijyanye n’amasaha cyagombaga gutangiriraho ntiyari azwi gusa byari byavuzwe ko amarembo agomba kuba afunguye saa Cyenda. Si ko byagenze kuko abiteguye kwakira abaje muri iki gitaramo bahageze ahagana saa Kumi.

Ubwo igitaramo cyatangiraga, abahanzi bakizamuka barimo Inki bagiye ku rubyiniro bararirimba, buri umwe agahabwa indirimbo ebyiri, ukabije zikaba eshatu. Uyu yaririmbye indirimbo ye yise ‘Entre nous’, ahita ahamagara Ruti Joel ku rubyiniro bafatanya kuririmba iyo bahuriyemo yitwa ‘Miliyoneri’.

Ruti Joel yahise yanzika, ahereye ku ndirimbo ye yise ‘Igikobwa’.

Muri rusange abahanzi bo mu Rwanda baririmbye barimo Kivumbi King na Christopher ntibahawe umwanya munini wo kuririmba.

IGIHE yaje kumenya amakuru y’uko Christopher ubwo yaririmbaga mu buryo bwa ‘Live’ yateje umwuka mubi hagati y’abateguye igitaramo n’abashinzwe kureberera inyungu za Tayc.

Uwaduhaye amakuru yagize ati “Urumva ikibazo cyabayeho, Christopher yaje aririmba mu buryo bwa Live kandi bizwi ko Tayc aririmba Playback’, urumva rero ibyo bintu byababaje Tayc n’abajyanama be.”

Christopher akiva ku rubyiniro, hakiriwe abavanga imiziki ndetse byari biteganyijwe ko abahanzi barimo Nel Ngabo, Deejay Pius na Kevin Kade bahita bakurikiraho ariko si ko byagenze.

Abateguye igitaramo babonye amasaha avuduka, bahitamo kubwira aba bahanzi ko batakiririmbye kubera ko Tayc wari umushyitsi mukuru agomba kumara isaha ku rubyiniro.

Mu gushaka kumenya uko byagendekeye abahanzi bataririmbye, IGIHE yagiranye ikiganiro kigufi na Ishimwe Clement ureberera inyungu za Nel Ngabo avuga ko bari biteguye gutarama ariko batungurwa no kwangirwa kuririmba.

Ati “Ntabwo yaririmbye [Nel Ngabo] ariko yari ahari kandi yaziye ku gihe. Twaje tujya mu rwambariro, dutegereza ko batubwira ko igihe kigeze, tugiye ku rubyiniro batwangira kuririmba, tubajije ikibazo batubwira ko nta mwanya uhari.”

“Twababwiye duti ariko twaje turi hano muri Arena saa Moya, twicaye amasaha n’amasaha nta wigeze avuga ngo […] none mutangiye kutubwira ko nta mwanya.”

Kuba abahanzi b’Abanyarwanda bataririmbye ariko byanatewe ahanini n’imikoreshereze mibi y’igihe kubera ko nka Tayc yakoresheje amasaha arenga abiri ku rubyiniro kuko yabimburiwe n’Umuhanzikazi Ocevne bavanye mu Bufaransa.

Ocevne uri mu bahanzi bakizamuka yakoresheje iminota nka 30 ndetse nyuma ye hajyaho umu-Dj wa Tayc na we abanza kwereka ab’i Kigali impano ye.

Kuri Ishimwe Clement asanga bitumvikana uburyo abahanzi b’Abanyarwanda bari baranakoreshejwe mu kwamamaza igitaramo batahawe umwanya.

Ati “Sinzi n’abandi bantu b’abahanzi batazwi yazanye na bo, babanje kuririmba batari no kuri gahunda y’abagombaga kuririmba. Umwanya rero abahanzi bacu bagombaga kuririmbamo ni wo abo bahanzi bazanye na Tayc baririmbyemo.”

“Impamvu umuntu ategura igitaramo agashyiramo abahanzi, ni uko aba ashaka ko wa muhanzi akurura abafana be, ni ukuvuga ngo hari abaje baje kureba Tayc ariko hari n’abari baje kureba abandi bahanzi bari bari kuri ruriya rutonde rw’abagomba kuririmba.”

  Amategeko ya Tayc yarushaga amabuye kuremera

Ntitwabashije kumenya ibikubiye mu masezerano Tayc yagiranye n’abamutumiye mu gitaramo i Kigali, ndetse biragoye kumenya ibyo bemeranyije kumukorera haba mu gitaramo cyangwa hanze yaho igihe cyose ari mu Rwanda.

Ku rundi ruhande ariko amakuru IGIHE yamenye avuga ko itsinda ryazanye n’uyu muhanzi hari ibyo ryari ryategetse abategura igitaramo birimo no kuba abantu bafata amashusho n’amafoto batemerewe gukandagira ku rubyiniro uretse abantu bane yihitiyemo.

Ibijyanye no kujya mu rwambariro nabyo kandi byari byashyizweho nyirantarengwa kubera ko nta wari wemerewe kuhakandagira. Ni mu gihe kandi ku rubyiniro yari yashyizeho igihe agomba kumaraho.

Bivugwa ko yari yategetse abamutumiye ko amara isaha ku rubyiniro n’ubwo ubaze umwanya yamaze n’uwo abahanzi bakizamuka yazanye bakoresheje ari amasaha abiri [Saa 10:35-12:20].

Akandi gashya kiyongereyeho ni ako kuba yarabonye Christopher aririmbye mu buryo bwa ‘Live’, agasaba ko nta wundi muhanzi wongera kuririmba acurangirwa kuko we yari yateguye Playback.

Uwaduhaye amakuru yagize ati “Yageze aho ategeka ko nta wundi muhanzi wemerewe kuririmba Live kubera ko we yari bukore playback. Na Christopher buriya byakuruye umwuka mubi ni nayo mpamvu bamuvanye kuri stage bamwirukansa.”

Ni ibintu bisa n’ibishimangirwa na Ishimwe wahishuye ko igihe cyo kujya ku rubyiniro cyageze, Nel Ngabo arahamagarwa ariko agezeyo babonye atangiye gucomeka ibyuma ngo aririmbe ‘live’ baramubuza.

Yagize ati “Mbere y’uko tujya kuri stage abateguye igitaramo batangiye kutubwira ko tugomba gukora Playback kandi twe twari dufite ‘Band’ yacu kuko twagombaga gukora ‘Live’ twari twanabibabwiye kare. Ubwo rero twababwiye ko bidashoboka ko twakora playback.”

Yakomeje agira ati “Ikindi kibazo ni uko itsinda rya Tayc, ryaje rikabona ko hari abacuranzi b’Abanyarwanda barimo gukora ‘Live’ bakabona ko ngo bisa nabi kubera ko bo bagiye gukora ‘Playback’ ngo barashaka ko baza kujyaho bavanyeho ibyuma byose bya ‘Live’.”

Avuga ko abacuranzi bafasha Nel Ngabo bageze ku rubyiniro, ariko bagakurwaho ngo habanze hategurwe urubyiniro rwa Tayc.

Ishimwe Clement usanzwe anayobora Kina Music, avuga ko abahanzi bo mu Rwanda bakwiye guhabwa agaciro n’abategura ibitaramo kuko bigira ingaruka ku muziki iyo abanyamahanga bashyize igitutu ku bateguye igitaramo bigatuma ab’imbere mu gihugu banimwa umwanya wo kuririmba.

Tayc yari yashyizeho amategeko agomba kubahirizwa n'abateguye igitaramo yaririmbyemo
Igitaramo cya Tayc cyitabiriwe ku rugero rwo hejuru
Tayc yari yasanzwe n'ibyishimo mu gitaramo yakoreye i Kigali, inkumi zamweretse urugwiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .