Yabaye umukozi mu busitani! Ibintu bitangaje kuri Lucky Dube umaze imyaka 12 atabarutse

Yanditswe na Uwiduhaye Theos
Kuya 19 Ukwakira 2019 saa 09:40
Yasuwe :
0 0

Ku wa 18 Ukwakira, hibukwa umuhanzi w’icyamamare mu njyana ya Reggae, Lucky Philip Dube wishwe mu 2007.

Lucky Dube ni umuririmbyi ukomoka mu gihugu cya Afurika y’Epfo, waranzwe no gukora ndetse no gukunda injyana ya Reggae.

Uyu muhanzi wabaye icyamamaye yavutse tariki 3 Kanama 1964 ahazwi nka Mpumalanga mu gace ka Ermelo muri Afurika y’Epfo, atabaruka tariki 18 Ukwakira 2007 i Rosettenville. Ubu umubiri we uruhukiye hafi ya Newcastle, mu ntara ya Kwazulu Natale.

Nyina umubyara ni we wamwise “Lucky” bivuga ’Umunyamahirwe’, iri zina ryaturutse ku bihe bitoroshye by’uburwayi bukomeye Lucky Dube yanyuzemo nyuma y’amezi make avutse gusa akaza kubaho.

Lucky Dube n’umuvandimwe we witwa Joe bakuze barerwa n’umubyeyi umwe, .

Ku myaka 18 ubwo Lucky Dube yigaga mu mashuri yisumbuye, yategerezaga ko ibiruhuko bigera kugira ngo ajye gukoresha indirimbo ze za mbere, icyo gihe yakoranaga n’itsinda rya The Love Brothers, ari naryo ryamufashije kugera kuri Album ye ya mbere yise “Lucky Dube and The Supersoul", mu 1982 ari nayo yatumye afatwa nk’umuhanzi uhamye.

Lucky Dube yatabarutse ku myaka 43, amaze kubaka izina mu muziki w’injyana ya Reggae. Yagiye yegukana ibihembo bikomeye bya muzika ku rwego rwa Afurika ndetse no ku Isi yose nka “Ghana Music Awards” yahawe mu 1996, nk’umuhanzi mpuzamahanga w’umwaka, “World Music Awards de Monte Carlo”, “Serious Reggae Business” yahawe nk’umuhanzi ufite Album yagurishijwe neza ndetse n’ibindi.

Lucky Dube, inshuti y’u Rwanda

Lucky Dube akiriho, yagiye agaragaza gukunda no guha agaciro ikiremwamuntu cyane, bitari ibyo kuharirimbira gusa ahubwo no mu buzima bwe busanzwe, kuko yababazwaga n’akarengane abantu bamwe bagirira abandi.

Ubwo yasuraga u Rwanda, akigerera ku Rwibutso rushyinguwemo inzirakarengane za Jenoside yakorewe Abatutsi rwa Kigali ku Gisozi, yasohotse atabasha kuvugana n’itangazamakuru kubera ikiniga cyinshi ahubwo yahise asuka amarira, kwihangana biramunanira kubera uburyo yabonye inzirakarengane zishwe.

Lucky Dube yakoreye ibitaramo bitandukanye mu gihugu cy’u Rwanda birimo Fespad ndetse n’ibindi yakoraga mu buryo bw’umwimerere.

Lucky Dube yavugaga ko yemera Imana imwe gusa, ku bamuzi neza bahamya ko atanywaga itabi ndetse n’ibindi bisindisha. Yubahaga imyemerere ndetse n’umuco bya buri muntu.

Ibintu 11 wamenya kuri Lucky Dube

1.Umubyeyi we yamwise Lucky Dube bisobanuye umunyamahirwe, nyuma yaho mukuru we yari yapfuye afite amezi atandatu gusa.

2. Akiri umwana yakoze mu busitani ashaka amafaranga yo kujya ku ishuri

3. Hari abavugaga ko se ari umunya-Zimbabwe

4. Indirimbo ze za mbere zari ziganjemo ikizulu.

5. Yanze kunywa Marijuana, ibisindisha no kuba yakoresha ikindi kiyobyabwenge kugira abere urugero rwiza abana be.

6. Yagaragaye muri filime zitandukanye zirimo iyitwa ‘Voice in the Dark, ‘Getting Lucky’ na ‘Lucky Strikes Back’

7. Yabanje kuririmba mu njyana gakondo yitwa Mbaqanga, mbere yo gutangira Reggae mu 1984

8. Yari afite abana barindwi

9. Yakundaga amafarasi

10. Yari yarasinye amasezerano muri label ikomeye muri Amerika yitwa Motown

11. Mu 1992 yavuze ijambo agaragaza ko guverinoma yashyiragaho amategeko akandikwa mu bitabo bitandukanye ariko ntajye mu mitwe y’abaturage.

Zimwe mu ndirimbo za Lucky Dube

Lucky Dube yari akunzwe mu muziki wa Reggae
Lucky Dube urupfu rwe rwabaye inkuru mbi ku Isi yose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza