Urwishe ya nka! Dr Jiji yagarutse mu muziki akora ibihangano bishotora benshi

Yanditswe na Uwiduhaye Theos
Kuya 1 Werurwe 2021 saa 05:21
Yasuwe :
0 0

Umuririmbyi Dr Jiji, ubusanzwe witwa Janvier Mugabukwari wamamaye mu muziki w’u Rwanda kubera kuririmba ku nsanganyamatsiko yihariye kandi igaruka cyane ku bagore n’ibijyanye n’imibonano mpuzabitsina, yagarutse mu muziki akiri wa wundi nyuma y’igihe yari amaze atumvikana.

Uyu muhanzi afite indirimbo nshya yise ‘Umama’. Agaragaramo ari kumwe n’umukobwa aba atakagiza, wambaye umwambaro wa bikini indirimbo hafi ya yose. Hari aho Dr Jiji agaragara bari kumwe n’uyu mukobwa mu gitanda ari kumukorakora baryamye undi nawe yatwawe reka sinakubwira n’ahandi agaragara bari kumwe uyu mukobwa ari kubyina yambaye uwo mwambaro.

Uyu muhanzi yabwiye IGIHE ko ari indirimbo yakoze ashaka kuvuga ku bakobwa b’ibizungerezi.

Ati “Ni indirimbo nakoze nshaka kuvuga ku bakobwa b’ibizungerezi barimo na Shaddy Boo. Ni aho igitekerezo nakivanye nta handi. Nayikoze mu ndimi ziganjemo Igiswahili, kuko nifuje ko ifata isoko ry’aka karere ka Afurika y’Iburasirazuba.”

Uyu muhanzi wari umaze imyaka irenga itanu acecetse, yavuze ko yari amaze igihe akusanya ubushobozi ngo abashe kwagura ubuhanzi bwe no gukora ibikorwa by’indashyikirwa mu muziki we.

Dr Jiji yavugishije benshi hagati ya 2013 na 2015 kubera ibihangano yashyiraga hanze byiganjemo abakobwa bambaye bikini (icyo gihe bafatwaga nk’abambaye ubusa), ndetse n’ubutumwa bwabaga buri mu bihangano bye buganisha ku gutera akabariro.

Dj Jiji mu kiganiro yahaye IGIHE mu minsi ishize yabajijwe icyo atekereza ku buryo yakoragamo umuziki mu myaka yashize ndetse niba ari nako agiye kugaruka awukoramo, asubiza ko abavugaga ko akora ibidakwiye bamuzizaga ubusa.

Ati “Nari ntewe ishema n’ibyo nakoraga kiriya gihe kuko nari nzi ibyo nkora. Ugomba gukora ibintu bitarimo ubwana kandi ukaba uzi igihe bizamara niba bizaramba. Abantu bazi umuziki bazi ko nashyize ibuye ry’ifatizo ku muziki nyarwanda. Urebye uyu munsi isura ufite ukayigereranya n’ibyo banzizaga kiriya gihe wavuga ko banzizaga ubusa.”

Yakomeje avuga ko ashobora gukora ibindi bintu abantu ntibabyumve neza ariko mu myaka y’indi nk’itandatu bagasanga baramuzizaga ubusa.

Dr Jiji w’imyaka 39 usanzwe akora akazi ko k’ubuganga, azwi cyane mu ndirimbo zitandukanye zirimo ‘Antere ibuye’ yakoranye na Bruce Melodie, ‘Super Market’, ‘Welcome to bed’ yamaganiwe kure na Minisiteri y’Umuco kubera amashusho yayo arimo ibijya gusa n’ubusambanyi n’izindi.

Uyu mugabo iyi ndirimbo ye yahagaritswe ubwo yayisohoraga kubera abakobwa barimo bagaragaza amabere n’ibindi birimo amashusho avugwaho kuba ari urukozasoni ndetse mu majwi yayo harimo umukobwa uri kuniha nk’uri gukora imibonano mpuzabitsina.

Umukobwa Dr Jiji yifashishije ni uku agaragara mu mashusho y'indirimbo ye nshya
Dr Jiji wari umaze igihe adakora umuziki yagarutse
Dr Jiji yagarutse mu muziki yongera kuza akora ibihangano bisembura ibyiyumviro bya benshi
Dr Jiji azwiho ko atajya akora amashusho cyangwa indirimbo ngo birangire hatagaragayemo abakobwa bambaye bidasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .